އޮޑިޓަރ ޖެނެރަލްގެ މަގާމަށް ހުސައިން ނިޔާޒީ އައްޔަން ކުރުމަށް ކޮމިޓީން ފާސްކޮށްފި
ނިޔާޒީ މަގާމަށް އައްޔަން ކުރަން ފާސްކުރީ އާދިއްތަ ދުވަހުގެ ކޮމިޓީގައި ބައިވެރިވެވަޑައިގެންނެވި މެމްބަރުންގެ އިއްތިފާގުން
ހުސައިން ނިޔާޒީ
އޮޑިޓަރ ޖެނެރަލްގެ މަގާމަށް ގ. އައިފަ، ހުސައިން ނިޔާޒީ އައްޔަން ކުރުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކޮށްފިއެވެ.
އޮޑިޓް ގާނޫނުގެ 2 ވަނަ މާއްދާގައިވާ ގޮތުގެމަތިން އޮޑިޓަރ ޖެނެރަލްގެ މަގާމަށް ހުސައިން ނިޔާޒީ، ގ. އައިފަ، އައްޔަން ކުރުމަށް ފާއިތުވި ބުދަ ދުވަހުގެ މަޖިލީހުގެ ޖަލްސާއަށް ރައީސުލްޖުމްހޫރިއްޔާ ވަނީ ސިޓީއެއް ފޮނުއްވާފައެވެ
ސިޓީގައި ވަނީ އޮޑިޓަރ ޖެނެރަލްގެ މަގާމުގައި ހުންނެވި ހ. އާހަމަ ހަސަން ޒިޔާތު، އެ މަގާމުން އިސްތިއުފާ ދެއްވާފައިވާތީ، އޮޑިޓް ގާނޫނުގެ 2 ވަނަ މާއްދާގައިވާ ގޮތުގެމަތިން، އާންމުކޮށް އިއުލާންކުރުމުން، އެކަމަށް އިޖާބަދެއްވި ބޭފުޅުންގެ ތެރެއިން ހުސައިން ނިޔާޒީ އައްޔަންކުރުމަށްޓަކައި އެބޭފުޅާގެ ނަންފުޅު ރައްޔިތުންގެ މަޖިލީހަށް ހުށަހަޅުއްވައިދެއްވައި، މަޖިލީހުން ނިންމެވިގޮތް އަންގަވައި ދެއްވުމަށް އެދޭ ކަމަށެވެ.
މާލިޔަތު ކޮމިޓީން މި މައްސަލަ ދިރާކުރުމަށް ފަހު ކޮމިޓީން ވަނީ ހުސައިން ނިޔާޒީ ހާޒިރުކޮށް ސުވާލުކޮށްފައެވެ. ނިޔާޒީ އެ މަގާމަށް އައްޔަން ކުރަން ފާސްކުރީ އާދިއްތަ ދުވަހުގެ ކޮމިޓީގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.
އޮޑިޓަރ ޖެނެރަލްގެ މަގާމު ހުސްވެފައިވަނީ ބޮޑު ޚިޔާނާތުން މަންފާވިކަމަށް އެސެޓް ރިކަވަރީ ކޮމިޝަނުން އެކުލަވާލާފައިވާ ލިސްޓުގައި އޮޑިޓަރ ޖެނެރަލް ކަމުގައި ހުންނެވި ހަސަން ޒިޔާތު ހިމެނިވަޑައިގެންފައިވާތީ އެ މަނިކުފާނު އަމިއްލަފުޅަށް އިސްތިއުފާ ދެއްވުމުންނެވެ. ޒިޔާތު އިސްތިއުފާ ދެއްވާފައިވަނީ މިދިޔަ މެއި މަހުގެ 12 ވަނަ ދުވަހުއެވެ.
