އައިޖީއެމްއެޗްގެ ޚިތާނީ ކޭމްޕް: ބޮޑެތި ބަދަލުތަކަކާއެކު ޖުލައި 10ން އޯގަސްޓް 5ށް!
ޖުލައި 7ގެ ނިޔަލަށް ނަން ނޯޓުކުރެވޭނެ ކަމަށް އައިޖީއެމްއެޗްއިން ބުނޭ
އައިޖީއެމްއެޗްގެ ޚިތާނީ ކޭމްޕްގެ ތެރެއިން
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ޚިތާނީ ކޭމްޕް، ޖުލައި 10ން އޯގަސްޓް 5ށް ބޭއްވުމަށް ހަމަޖެހިފައިވާކަމަށް އެހޮސްޕިޓަލުން ހާމަކޮށްފިއެވެ.
މިކަން ހާމަކޮށް އައިޖީއެމްއެޗުން ކުރި ޓްވީޓްގައި ވަނީ، މިފަހަރުގެ ކޭމްޕް ކުރީގެ ކޭމްޕްތަކާ އެކި ގޮތްގޮތުން ތަފާތުވާނެކަން ހާމަކޮށްފައެވެ. އެގޮތުން މިފަހަރު ކޭމްޕް ބާއްވަނީ އެ ހޮސްޕިޓަލާއި ހުޅުމާލެ ހޮސްޕިޓަލް ގުޅިގެންކަމަށް ވަނީ ބުނެފައެވެ. ޚިތާނު ކުރުމުގެ އަމަލީ މަސައްކަތް މި ދެ ހޮސްޕިޓަލުގެ ސާޖަރީ ޑޮކްޓަރުން ކުރިޔަސް، ޚިތާނުކުރުމާއި އެޑްމިޓްކުރުން ކުރިއަށްދާނީ ހަމައެކަނި ހުޅުމާލެ ހޮސްޕިޓަލުގައިކަމަށް ވަނީ ބުނެފައެވެ.
މި ފުރުސަތު އައިޖީއެމްއެޗުން މި އަހަރުވެސް ހުޅުވާލީ 200 ކުދިންނަށެވެ. އައިޖީއެމްއެޗްއިން ބުނީ ޚިތާނުކުރުން ކުރިއަށްދާނީ ޖުލައި މަހުގެ 10 ވަނަ ދުވަހުން އޯގަސްޓު މަހުގެ 05 ވަނަ ދުވަހާ ހަމަޔަށް ކަމަށެވެ.
ހޮސްޕިޓަލުން ވަނީ ނަން ނޯޓްކުރުމުގެ ފުރުސަތު ޖުލައި 1ން 7ގެ ނިޔަލަށް ހުޅުވާލާފައެވެ. އެގޮތުން ހުކުރު ދުވަސް ފިޔަވައި، ބަންދުނޫން ކޮންމެ ދުވަހެއްގެ ހެނދުނު 8:00ން މެންދުރުފަހު 15:00އާ ދެމެދު ނަން ނޯޓު ކުރުން ކުރިއަށްދާނެއެވެ. ނަން ނޯޓުކުރުން ކުރިއަށްދާނީ ދަރުމަވަންތަ ކޮމްޕްލެކްސްގެ 3ވަނަ ފަންގިފިލާގެ ސާޖަރީ ޑިޕާޓްމެންޓް ކައުންޓަރުންކަމަށް އައިޖީއެމްއެޗުން ބުނެއެވެ. ނަން ނޯޓުކުރަން އަންނައިރު ކުއްޖާގެ އައިޑީކާޑު ގެނައުމަށް ހަނދާން ބެހެއްޓުމަށް އައިޖީއެމްއެޗުން އެދިފައިވެއެވެ.
ޚިތާނީ މޫސުމަކީ ރާއްޖޭގައި އަބަދުވެސް ވަރަށް ކުލަގަދަކަމާއެކު ފާހަގަކުރާ ދުވަސްވަރެއް ކަމުން، ކުދިންނަށް އުފާވެރި ހިތްހަމަޖެހޭ މާހައުލެއް ތައްޔާރުކޮށްދިނުމުގެ ގޮތުން އައިޖީއެމްއެޗްގެ އޮޕަރޭޝަން ތިއޭޓަރާއި، ޚިތާނީ ވޯޑް ކުޑަކުދިންނާ ގުޅޭގޮތަށް ޒީނަތްތެރި ކުރެވިފައިވާނެ ކަމަށް އައިޖީއެމްއެޗުން ބުނެއެވެ. ސްކޫލް ޗުއްޓީ ދުވަސް ވަރަކީ އާންމުކޮށް ރާއްޖޭގެ ހުރިހާ ސަރަހައްދެއްގައި ވެސް ޚިތާނީ މޫސުން ފާހަގަ ކުރާ ދުވަސްވަރެވެ. މި ދުވަސްވަރާ ދިމާކޮށް ގިނަ ހޮސްޕިޓަލްތަކެއްގައި ވެސް ޚިތާނީ މޫސުން ފާހަގަ ކުރަމުން ދެއެވެ.
