ރައީސް ނަޝީދަށް އަމާޒުކޮށްދިން ހަމަލައާ ގުޅިގެން ހައްޔަރުކޮށްފައިވާ ބައެއް މީހުންގެ ވަކީލުންނާމެދު ކަންބޮޑުވުންތަކެއް
ވަކީލުންގެ ގޮތުގައި މަސައްކަތްކުރަނީ މެޖިސްޓްރޭޓްކަމުން ވަކިކުރަން ނިންމާފައިވާ މުހައްމަދު ރާގިބުގެ ލޯ ފާމުންކަމަށް ނާޒިމް ވިދާޅުވި
ރައީސް ނަޝީދަށް ދިން ހަމަލައާ ގުޅިގެން ފުލުހުން ކުރިޔަށްގެންދިޔަ އޮޕަރޭޝަނުގެ ތެރެއިން
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާގައި ހައްޔަރުކޮށްފައިވާ ބައެއް މީހުންގެ ވަކީލުންނާ ގުޅޭ ގޮތުން ނަޝީދުގެ ކޮއްކޯފުޅު ނާޒިމް އަބްދުއްސައްތާރު ކަންބޮޑުވުން ފާޅުކުރައްވައިފިއެވެ.
އެކަމުގެ ކަންބޮޑުވުން ފާޅުކުރައްވާ ނާޒިމް ކުރެއްވި ޓްވީޓެއްގައި ވިދާޅުވެފައިވަނީ ހައްޔަރުކޮށްފައިވާ ބައެއް މީހުންގެ ވަކީލުންގެ ގޮތުގައި މަސައްކަތްކުރައްވަނީ ކ. ޖުޑީޝަލް ދާއިރާގެ އިސް މެޖިސްޓްރޭޓްކަމުގައި ހުންނަވަނިކޮށް މަގާމުން ވަކިކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމުމުން އިސްތިއުފާ ދެއްވި މުހައްމަދު ރާގިބު އަހުމަދުގެ ލޯ ފާމްގެ ބައެއް ވަކީލުން ކަމަށާއި ރާގިބާއި އޭނާގެ ދަށުން މަސައްކަތްކުރައްވާ ވަކީލުން ނަޝީދާ މެދު އިންސާފުވެރި ވާނެ ކަމަށް ގަބޫލު ނުކުރައްވާކަމަށެވެ. އޭގެތެރޭގައި ނާޒިމް ފާހަގަކުރައްވާފައިވާ ބައެއް ވަކީލުންނަކީ ރައީސް ޔާމީނުގެ ލޯޔަރުންގެ ޓީމުގައި ހަރަކާތްތެރިވެވަޑައިގަންނަވާ އާދަމް އާސިފް، ލޯޔަރ ޝަޒީމު ވަހީދު އަދި ލޯޔަރ ނާޝިދެވެ.
ނާޒިމްގެ މިޓްވީޓަށް ޖަވާބު ދެއްވަމުން ލޯޔަރު އާސިފް ވަނީ އެއީ ދޮގެއްކަމަށް ވިދާޅުވެފައެވެ. އަދި ލޯޔަރ ޝަޒީމް ކުރެއްވި ޓްވީޓެއްގައި ވިދާޅުވެފައިވަނީ ރައީސް ނަޝީދަށް ދިން ހަމާލާގައި ތުހުމަތުކުރެވޭ އެއްވެސް މީހެއްގެ ދިފާއީ ވަކީލަކަށް ތަހުގީގު މަރުހަލާގައި މަސައްކަތްކޮށްފައި ނުވާނެ ކަމަށާއި ކުރިމިނަލް ކޯޓުގައި ވަކާލާތުކޮށްފައިވެސް ނުވާނެކަަމަށެވެ.
ނާޒިމް ކުރެއްވި ޓްވީޓަށް ޖަވާބު ދެއްވަމުން ރާގިބް ވިދާޅުވެފައިވަނީ ގާނޫނީ ވަކީލުންގެ ހުވާގައި އަދި ވަކީލުން ޢަމަލުކުރަންޖެހޭ ގާނޫނެއް ނުވަތަ ގަވާއިދެއްގައި، އުސޫލެއްގައި ވަކީލުން ވަކާލާތު ކުރަންޖެހޭނީ ވަކި ވައްތަރެއްގެ ނުވަތަ ވަކި ނަމެއްކިޔާ މީހުންނަށޭ ނެތްކަމަށެވެ.
ކ. ޖުޑީޝަލް ދާއިރާގެ އިސް މެޖިސްޓްރޭޓްކަމުގައި ރާގިބް ހުންނަވަނިކޮށް މަގާމުން ވަކިކުރުމަށް ޖޭއެސްސީން ނިންމާފައިވަނީ ރައްޔިތުންގެ މަޖިލީހުގެ ރައީސްގެ ހައިސިއްޔަތުން ޖޭއެސްސީގައި ނަޝީދު އިންނަވައިގެންނެވެ.
މީގެއިތުރުން ނާޒިމް ވަނީ ރައީސް ނަޝީދަށް ހަމަލާދިނުމަށް ފަންޑުކުރި މީހުން ރާގިބަށް އެނގޭނެކަމަށްވެސް ތުހުމަތު ކުރައްވާފައެވެ.
ނާޒިމް މިމޭރުމުން ކަންބޮޑުވުން ފާޅުކުރެއްވުމުން، ހައްޔަރުކޮށްފައިވާ މީހުންގެ ލޯޔަރުންގެ ގޮތުގައި މަސައްކަތްކުރަނީ ކޮންބައެއްތޯ އާއި އެމީހުންނަށް ފައިސާ ދައްކަނީ ކޮން ބައެއްތޯ އަންނަނީ ސުވާލުކުރަމުންނެވެ. އަދި ރައީސް ނަޝީދަށް އަމާޒުކޮށްދިން ހަމަލާއަށް ފަންޑުކުރި ބަޔަކު ހޯދާއިރު އެއީ މުހިންމު މައުލޫމާތެއްކަމަށް ބުނެ އަންނަނީ ޝުއޫރު ފާޅުކުރަމުންނެވެ.
މީގެއިތުރުން މިމައްސަލާގައި ހައްޔަރުކޮށްފައިވާ ބައެއް މީހުންނަށް ވަކީލުން ހަމަޖެއްސީ ކޮންބައެއްކަން އެމީހުންނަށްވެސް ނޭނގޭކަމަށް ވަނީ އެނގިފައެވެ. ކުށުގެ ތުހުމަތުގައި ހައްޔަރުކުރެވޭ މީހުންނާ ގުޅުންހުރި މީހުން އެމީހުންނަށް ވަކީލުން ހަމަޖައްސައިދީ އެމީހުން އެކަމުން ސަލާމަތްކޮށްދިނުމަށް މަސައްކަތްކުރުމަކީ ރާއްޖޭގައި އާންމުކޮށް ހިނގަމުން އަންނަކަމެކެވެ.
މެއި މަހުގެ 6 ވަނަ ދުވަހު ރައީސް ނަޝީދު އަވަހާރަކޮށްލުމަށް އައިއީޑީއެއް ގޮއްވާލައިގެން ދިން ހަމަލާގައި އަމަލީ ގޮތުން ބައިވެރިވި ފަސް މީހެއްގެ ވަނަވަރު ވަނީ ހާމަކޮށްފައެވެ. މިހަމަލާއާ ގުޅިގެން މިހާތަނަށް އަށް މީހަކު ވަނީ ހައްޔަރުކޮށްފައެވެ. މިހަމަލާގެ ތަހުގީގު މިމަހުގެ ތެރޭގައި ނިމޭނެކަމަށް ޕްރޮސެކިޔުޓަރ ޖެނެރަލް ހުސައިން ޝަމީމް ވަނީ ވިދާޅުވެފައެވެ.
