އިންޑިއާ ސިފައިން ޖާގަ ނުދީގެން ފްލައިޓް ނުޖެއްސުނު ކަމަށް ބުނެ ޗެނަލް 13އިން ފަތުރަނީ ދޮގު ޚަބަރެއް: މޯލްޑިވިއަން
އެ ދުވަހު މޯލްޑިވިއަންގެ ބޯޓުތައް ޝެޑިއުލާ އެއްގޮތަށް އޮޕަރޭޓްކޮށްފައިވޭ
މޯލްޑިވިއަންގެ ފްލައިޓެއް
އިންޑިއާ ސިފައިން ޖާގަ ނުދީގެން ފްލައިޓް ނުޖެއްސުނު ކަމަށް ބުނެ ޗެނަލް 13އިން ފަތުރަނީ ދޮގު ޚަބަރެއް ކަމަށް މޯލްޑިވިއަނުން ބުނެފިއެވެ.
މޯލްޑިވިއަނުން ބުނީ ހަނިމާދޫ އިންޓަރނޭޝަނަލް އެއަރޕޯޓަށް ޖައްސަން ދިޔަ ބޯޓަކަށް އިންޑިޔާ ސިފައިން ޖާގަ ނުދީގެން ނުޖެއްސުނު ކަމަށް ޗެނަލް 13އިން ރިޕޯޓްކޮށްފައިވަނީ ދޮގު ޚަބަރެއް ކަމަށާއި އެދުވަހު މޯލްޑިވިއަންގެ ބޯޓުތައް ޝެޑިއުލާ އެއްގޮތަށް އޮޕަރޭޓްކޮށްފައިވާ ކަމަށެވެ.
ޗެނަލް 13އިން ގެނެސްދިން މި ޚަބަރުގައި ބުނެފައިވަނީ ޖޫން 29 ވަނަ ދުވަހު ވެލާނާ އިންޓަރނޭޝަނަލް އެއަރޕޯޓުން ފުރައިގެން ހަނިމާދޫއަށް ދަތުރުކުރި، މޯލްޑިވިއަންގެ ފްލައިޓަކަށް 30 މިނެޓު ވަންދެން ރަންވޭއަށް ނުޖެއްސި، ހަނިމާދޫގެ މަތީގެ އެނބުރެން ޖެހުނު ކަމަށެވެ. ޗެނަލް 13އިން އިތުރަށް ބުނެފައިވަނީ އިންޑިއާގެ ޑޯނިއާ މެރިޓައިމް ސަވަޔަލެންސް މަތިންދާ ބޯޓުގެ މަސައްކަތެއް ކުރާ ކަމަށް ބުނެ ފްލައިޓް ޖެއްސުން ލަސްކުރި ކަމަށާއި، ފަހުން ފްލައިޓަށް ޖެއްސޭވަރުވީ އާދޭސްކޮށްގެން ކަމަށެވެ.
ޗެނަލް 13އިން ފަތުރާފައިވާ މި ޚަބަރު މޯލްޑިވިއަނުން ދޮގުކޮށްފައިވާއިރު ދޭދޭ ޤައުމުތަކާއެކު އޮންނަ ގުޅުންތަކަށް ނޭދެވޭ އަސަރު ކުރާގޮތަށް ދިވެހިރާއްޖޭގެ މީޑިއާތަކުގެ މަސައްކަތްތައް ކުރިއަށް ނުގެންދިޔުމަށް ފޮރިން މިނިސްޓްރީން ވަނީ އިލްތިމާސްކޮށްފައެވެ.
