ކުޑަ ކުއްޖަކަށް ޖިންސީ ގޯނާކުރި މީހަކު 32 އަހަރަށް ޖަލަށް ލުމަށް ހުކުމްކޮށްފި
1 ޖުލައި 2021 | ބުރާސްފަތި 12:46އޭނާގެ މައްޗަށް ދެ ގާނޫނެއްގެ ދަށުން 4 ދައުވާއެއް އުފުލާފައިވޭ
ޝަރީއަތުގެ ސެޝަނެއްގައި ޕީޖީގެ ވަކީލަކު އޮންލައިންކޮށް ބައިވެރިވެވަޑައިގަންނަވަނީ
ކުޑަ ކުއްޖަކަށް ޖިންސީ ގޯނާ ކުރި މީހަކު 32 އަހަރަށް ޖަލަށް ލުމަށް ހުކުމް ކޮށްފިއެވެެ.
ދޮންދަރިއަކަށް ޖިންސީ ގޯނާކުރި މައްސަލައިގައި އުމުރުން 52 އަހަރުގެ ޢަބްދުﷲ ޢަލީ މޫސާގެ މައްޗަށް ދައުވާ އުފުލާފައިވަނީ، 2020ވަނަ އަހަރުގެ އޮގަސްޓް 19ވަނަ ދުވަހު ޏ. ފުވައްމުލަކު މެޖިސްޓްރޭޓް ކޯޓުގައެވެ. މައްސަލައިގެ ރިޕޯޓް ލިބި އޭނާ ހައްޔަރުކޮށްފައިވަނީ، 2020ވަނަ އަހަރުގެ ޖުލައި މަހުއެވެ.
އޭނާގެ މައްޗަށް ދެ ގާނޫނެއްގެ ދަށުން 4 ދައުވާއެއްވަނީ އުފުލާފައެެވެ. ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުޞޫލުތަކަކަށް ޢަމަލުކުރުމުގެ ޤާނޫނުގެ ދަށުން ކުޑަކުއްޖަކަށް އެމީހެއްގެ ޖިންސީ ގުނަވަނެއްކަމަށް ބެލެވޭ އެއްވެސް ތަނެއް ދެއްކުމުގެ ކުށުގެ ދަޢުވާއާއި، އިތުބާރުކުރަންޖެހޭ މަޤާމެއްގައި ހުރި މީހަކު، ޖިންސީ ޢަމަލެއް ބަޔަކު ހިންގާ މަންޒަރު ކުޑަކުއްޖާއަށް ދެއްކުމުގެ ކުށުގެ ދަޢުވާއާއި، އިތުބާރުކުރަންޖެހޭ މަޤާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ ޢަމަލެއް ހިންގުމުގެ ކުށުގެ ދަޢުވާވެސް އޭގެތެރޭގައި ހިމެނެއެވެ.
ދިވެހިރާއްޖޭގެ ޤާނޫނުލްޢުޤޫބާތުގެ ދަށުން އޮރިޔާންކާޑު ގެންގުޅުމުގެ ކުށުގެ ދަޢުވާވެސް ވަނީ އޭނާގެ މައްޗަށް އުފުލިފައެވެ. މި ދައުވާތައް ސާބިތުވެ، 32 އަހަރާ 1 މަހާ 27 ދުވަހުގެ ޖަލު ހުކުމެއް ބުރާސްފަތި ދުވަހު އޭނާގެ މައްޗަށްވަނީ ކޮށްފައެވެ.
ޕްރޮސެކިއުޓަރ ޖެނެރަލްވަނީ އައްޑޫގައި ގާއިމްކޮށްފައިވާ ޕީޖީ އޮފީހުގެ ގޮފިން ކުރި މަސައްކަތަކީ ކާމިޔާބު މަސައްކަތެއް ކަމަށް ވިދާޅުވެފައެވެ.
