ހދ. ކުޅުދުއްފުށި ރީޖަނަލް ހޮސްޕިޓަލް މަރާމާތުކުރުމުގެ މަޝްރޫޢުގެ ދަށުން މިހާރު ކުރިއަށްދަނީ ވާރޑް އިމާރާތުގެ ސީލިންގ މަސައްކަތްތައް ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނެފިއެވެ.
އެމްޓީސީސީން ބުނީ ހޮސްޕިޓަލް މަރާމާތުކުރުމުގެ މަޝްރޫޢުގެ މަސައްކަތުގެ 60 އިންސައްތަ ނިމިފައިވާ ކަމަށެވެ. މި މަޝްރޫޢުގެ ދަށުން ލެބޯރެޓަރީ އަކާއި ވާރޑް އިމާރާތެއް އެޅުމުގެ އިތުރުން އޯ.ޕީ.ޑީ ސަރަޙައްދު މަރާމާތު ކުރުމުގެ މަސައްކަތް ހިމެނެއެވެ.
ހެލްތު މިނިސްޓްރީން އެކުންފުންޏާ ހަވާލުކޮށްގެން ކުރިއަށްގެންދާ މި މަޝްރޫޢަކީ 30.3 މިލިއަން ރުފިޔާގެ މަޝްރޫއެކެވެ. މި މަޝްރޫޢުގެ ދަށުން 30 އެނދުގެ ވާރޑް ޢިމާރާތެއް އެޅުމާއި، އޯޕީޑީ ސަރަހައްދު މަރާމާތުކުރުމާއި، ވޯކްވޭއަކުން މައި ޢިމާރާތާއި އޮފީސް ޢިމާރާތް ގުޅުވައިލައި، ލެބޯޓަރީ މަރާމާތުކުރުން ހިމެނެއެވެ.
އެމްޓީސީސީއިން ރާއްޖޭގައި ތަރައްޤީގެ ބޮޑެތި މަޝްރޫޢުތަކެއް ހިންގަމުން އަންނައިރު އެމްޓީސީސީގެ ސީއީއޯ އާދަމް އާޒިމް ވިދާޅުވީ ސަރުކާރުން ތަރައްގީގެ މިފަދަ ބޮޑެތި މަޝްރޫއުތައް ހަވާލުކުރައްވައި އެ ކުންފުންޏަށް އިތުބާރު ކުރައްވާފައިވާތީ ސަރުކާރަށް އަދި ރައީސުލްޖުމްހޫރިއްޔާއަށް ޝުކުރުދަންނަވާ ކަމަށެވެ. އާޒިމް ވިދާޅުވީ ކުންފުނީގެ ފަރާތުން ސޮއިކުރާ ކޮންމެ ޕްރޮޖެކްޓެއް ވެސް ހަލުވި މިނެއްގައި ކުރިއަށްދާނެކަމުގެ ޔަގީންކަން ހުރިހާ ރައްޔިތުންނަށް ވެސް އަރުވާ ކަމަށެވެ.
އެމްޓީސީސީން މި މަޝްރޫއުގެ އަމަލީ މަސައްކަތް ފަށާފައިވަނީ މިދިޔަ އަހަރުގެ މެއި 17 ވަނަ ދުވަހުއެވެ.
