ދުބާއީން ވަޑައިގެން ކަރަންޓީނު ވުމެއްނެތި ނަރީޝް މަސައްކަތަށް ނިކުންނަވަނީ
އެނބުރި ރާއްޖެ ވަޑައިގެންނެވީ މިދިޔަ އާދިއްތަ ދުވަހު
މާލެ ސިޓީގެ ޑެޕިއުޓީ މޭޔަރ އަޙުމަދު ނަރީޝް
އަމިއްލަ ދަތުރުފުޅެއްގައި ދުބާއީ އަށް ވަޑައިގަތުމަށް ފަހު މާލެ ސިޓީގެ ޑެޕިއުޓީ މޭޔަރ އަޙުމަދު ނަރީޝް ކައުންސިލްގެ މަސައްކަތަށް ނިކުންނަވަން ފައްޓަވައިފިއެވެ.
އިތުބާރު ހުރި މަސްދަރަކުން "ރާއްޖެއެމްވީ"އަށް ކަށަވަރުވެފައިވާގޮތުގައި ނަރީޝް ދުބާއީއަށް ވަޑައިގަތީ މިދިޔަ ބުދަ ދުވަހުއެވެ. އަދި އެނބުރި ރާއްޖެ ވަޑައިގަތީ މިދިޔަ އާދިއްތަ ދުވަހުއެވެ.
ކޮވިޑް-19އާ ގުޅިގެން އެޗްޕީއޭއިން ކަނޑައަޅާފައިވާ އުސޫލުގައި ވާގޮތުން ރާއްޖެއިން ބޭރުގެ ކޮންމެ ގައުމަކުން ވެސް ރާއްޖެ އައުމަށް ފަހު 14 ދުވަހުގެ ކަރަންޓީން މުއްދަތެއް ހަމަކުރަން ޖެހެއެވެ.
ނަމަވެސް ނަރީޝް އެ މުއްދަތު ހަމަނުކުރައްވައި، މިދިޔަ ހޯމަ ދުވަހު މާލެ ސިޓީ ކައުންސިލް އިން ބޭއްވި މާލެ ސިޓީ ކައުންސިލްގެ 04 ވަނަ ދައުރުގެ 08 ވަނަ ރަސްމީ އާންމު ޖަލްސާގައި ބައިވެރިވެވަޑައިގެންނެވިއެވެ. އެ ޖަލްސާގެ ފޮޓޯތައް ސިޓީ ކައުންސިލްގެ ރަސްމީ ޓުވިޓަރ އެކައުންޓުގައި ވެސް ވަނީ އާންމުކޮށްފައެވެ. އެ ފޮޓޯތަކަކީ ހޯމަ ދުވަހު ނަގާފައިވާ ފޮޓޯތަކެއް ކަން އިތުބާރުހުރި ފަރާތަކުން ވަނީ ރާއްޖެ އެމްވީ އަށް ކަށަވަރުކޮށްދީފައެވެ.
މައުލޫމާތު ލިބިފައިވާ ގޮތުގައި އޭގެ ފަހުން ވެސް ނަރީޝް އަންނަނީ ރަސްމީކޮށް މަސައްކަތަށް ނިކުންވާ ސިޓީ ކައުންސިލްގެ އިދާރާގައި ހަރަކާތްތެރިވެ ވަޑައިގަންނަވަމުންނެވެ.
އެޗްޕީއޭގެ ކަރަންޓީން ގަވާއިދާއި އަދި މި ނޫން ވެސް އެހެން ގަވާއިދުތަކާ ޚިލާފުވެއްޖެ ނަމަ ވަކި އަދަދަކުން ޖޫރިމަނާކުރާއިރު، ގާނޫނީ ޝަޚްޞެއް ނަމަ ނުވަތަ އެފަދަ މަގާމެއްގައި ހުންނަވާ ބޭފުޅެއް ނަމަ ޖޫރިމަނާ ކުރާ އަދަދު ބޮޑުވެއެވެ.
