ޑެލްޓާ ވޭރިއަންޓްގެ ކޭސްތަކާ\އެކު ބަންގްލަދޭޝް ލޮކްޑައުނަކަށް

އިންޑިއާގެ ކޮވިޑް ވޭރިއަންޓެއް ކަމަށްވާ ޑެލްޓާ ވޭރިއަންޓްގެ ކޭސްތައް ބަންގްލަދޭޝްގައި އިތުރުވެ އެގައުމުގައި އެއް ހަފުތާގެ ލޮކްޑައުނެއް ސަރުކާރުން އިއުލާންކޮށްފިއެވެ.

ހޯމަ ދުވަހުން ފެށިގެން ބަންގްލަދޭޝްގައި ލޮކްޑައުން އިއުލާންކޮށްފައިވާއިރު ސަރުކާރާއި އަމިއްލަ އޮފީސްތައް ހަފުތާއެއްގެ މުއްދައްތަށް ބަންދުކުރުމަށް ވަނީ ނިންމާފައެވެ. އެއްތަނުން އަނެއް ތަނަށް ދަތުރުކުރެވޭނީ ހަމައެކަނި ސިއްހީ ބޭނުންތަކަށް ކަމަށާއި އެމަޖެންސީ ހާލަތުގައި މެނުވީ އެއްވެސް މީހަކަށް ގެއިން ބޭރަށް ނުނިކުމެވޭނެ ކަމަށް ވެސް ސަރުކާރުން ވަނީ ބުނެފައެވެ.

މި އުސޫލުތައް ތަންފީޒުކުރުމަށްޓަކައި މަގުތަކަށް ފުލުހުން ވަނީ ނެރެފައެވެ. ހާލަތަށް ރިޔާއަޔަތްކޮށް އަސްކަރިއްޔާގެ އޮފިސަރުންވެސް މަގުތަކުގައި ހަރަކާތްތެރިވާނެ ކަމަށް ސަރުކާރުން ބުނެއެވެ. މިއީ ވަރަށް ނުރައްކާތެރި ހާލަތެއް ކަމަށާއި ފިޔަވަޅުތައް އަޅައި ކޮވިޑް ކޮންޓްރޯލް ނުކުރެވިއްޖެނަމަ އިންޑިއާއަށް ކުރިމަތިވި ކަންތައް ބަންގްލަދޭޝަށް ކުރިމަތިވެދާނެ ކަމަށް ވެސް ބުނެއެވެ.

މެއި މަހުގެ މެދެއްހާ ހިސާބުން ފެށިގެން ބަންގްލަދޭޝްގަ2އި ކޮވިޑް ކޭސްތައް އިންތިހާއަށް އިތުރުވާން ފަށާފައިވާއިރު، އިންޑިއާގެ އިމާއި ކައިރީގައިވާ ސަރަހައްދުތަކުގައި ހޮސްޕިޓަލްތައް ވަނީ ތޮއްޖެހިފައެވެ. ހުކުރު ދުވަހު ބަންގްލަދޭޝުން ކޮވިޑް-19ގެ 6،000 ކޭސް ރިޕޯޓްކޮށްފައި ވާއިރު، 108 މަރު ވަނީ ރިޕޯޓްކޮށްފައެވެ. މިއީ ދެ ވަނަ އަށް އެއް ދުވަހެއްގައި އެންމެ ގިނަ މީހުން މިބަލީގައި މަރުވި ދުވަހެވެ.

މެއި މަހު އިންޑިއާއިން ދުވާލެއްގެ މައްޗަށް ފެންނަމުން ދިޔަ ހަތަރު ލައްކަ ކޭހުގެ އަދަދު މިހާރު ވަނީ 50،000ށް ދަށްވާން ފަށާފައެވެ. އެހެންނަމަވެސް ޑެލްޓާ ޕްލަސް ވޭރިއަންޓް ފެނުމާއެކު ހުޅަނގު އިންޑިއާގައި ވަނީ ފިޔަވަޅުތައް ވަރުގަދަކޮށްފައެވެ.