އެމްޑީޕީގެ އަހަރީ ދުވަސް ފާހަގަކުރާއިރު، މި ޕާޓީގެ މަސައްކަތް ނިމުނީ ކަމަށް ގަބޫލުކޮށް ތިބެގެން ނުވާނެ ކަމަށާއި، އަދިވެސް ޕާޓީ ކުރިއަށް މިދަނީ ނުތަނަވަސްކަމުގެ ތެރޭގައި ކަމަށް އެމްޑީޕީގެ ނައިބު ރައީސް، މުހައްމަދު ޝިފާޒް ވިދާޅުވެއްޖެއެވެ.
އެމްޑީޕީގެ 16 ވަނަ އަހަރީ ދުވަސް ފާހަގަކުރުމުގެ ގޮތުން އެ ޕާޓީން ބޭއްވި 177ވަނަ ގައުމީ މަޖިލީހުގެ ޖަލްސާގައި ވާހަކަދައްކަވަމުން، ޝިފާޒް ވިދާޅުވީ އެމްޑީޕީ އުފެދިގެން އައީ ވަރަށް ދަތި އުނދަގޫ ހާލަތެއްގައި ކަމަށެވެ. އެކަމަކު ޕާޓީ ވުޖޫދަށް އައިސް މާ ގިނަ ދުވަހެއް ނުވެ ވަރަށް ބޮޑެތި ކާބީތައް ހާސިލްކޮށްފައިވާ ކަމަށް ޝިފާޒް ވިދާޅުވިއެވެ. އެގޮތުން ގާނޫނުއަސާސީ އެކުލަވާލާ، އެ ތަސްދީގުކުރަން ވެސް ބުރަ ގިނަ މަސައްކަތްތަކެއް ކުރަން ޖެހުނުކަން ފާހަގަކުރެއްވިއެވެ.
ޝިފާޒް ވިދާޅުވީ އޭގެ ފަހުން ބޭއްވި ފުރަތަމަ އިންތިހާބު ވެސް އެމްޑީޕީ ކާމިޔާބުކޮށް މާ ގިނަ ދުވަސްތަކެއް ވެރިކަމުގައި ތިބެން ނުލިބުނު ކަމުގައި ވީނަމަވެސް ރައްޔިތުންނަށް ބޭނުންޖެހިފައިވާ އެތައް ކަމެއް ކާމިޔާބުކުރެވުނު ކަމަށެވެ. އެގޮތުން ހިލޭ ބޭސްފަރުވާ އާއި ފޮތް ފަންސުރު ފަދަ ތަކެތި ފޯރުކޮށްދިނުމަކީ އެމްޑީޕީން ގައުމަށް ކޮށްދިން އެންމެ މިހިންމު ކަންތައްތައް ތެރޭގައި ހިމެނޭ ކަންތައްތައް ކަމަށް ވިދާޅުވިއެވެ.
ޝިފާޒް ވިދާޅުވީ ބަޣާވާތަކުން ވެރިކަން ވައްޓާލުމުން ޕާޓީ މަގުމަތިވި ކަމަށެވެ. އެކަމަކު އަނެއްކާވެސް ޕާޓީގެ މެމްބަރުންގެ މަސައްކަތުން ދެވަނަ ވެރިކަމަށް ހޮވިފައިވާއިރު، މިހިސާބުން ކަންކަން ލުއިވެ ފަސޭހަވީ ކަމަށް ނިންމަން ނުވާނެ ކަމަށް ޝިފާޒް ވިދާޅުވިއެވެ.
އެނގިވަޑައިގަންނަވާނެ މިއަދު މި ހުރިހާ ކަމެއް އަޅުގަނޑުމެންނަށް ހާސިލްވި އިރުވެސް ނުތަނަވަސްކަން އެބަހުރި. 16 ވަނަ އަހަރީ ދުވަސް ފާހަގަކުރާއިރު އެންމެ ބޮޑު ނުތަނަވަސްކަމަކީ ނަފްސުގެ ރައްކާތެރިކަން ނެތުން. ސިއްރިއްޔާތުގައި އަޑީގައި ތިބެގެން ނޭނގި ހިންގަމުންދާ ކެމްޕޭނެއްގެ ވަރުގަދަކަމުގެ އިހުސާސް އެބަކުރެވޭ. މިއީ މިއަދު މިވާހަކަ ދައްކަން ޖެހޭ ކަމެއް.ޝިފާޒް
ޝިފާޒް ވިދާޅުވީ އިސްލާމް ދީނާއި ބީރައްޓެހި އުސޫލުތަކެއް އެއީ އިސްލާމީ އުސޫލުތައް ކަމުގައި ހަދައިގެން އެކަން ދައްކާ ގައުމަށް ފަތުރަން ބަޔަކު މަސައްކަތްކުރުމަކީ އެމްޑީޕީއަށް އަތް އުރާލައިގެން ތިބެވޭނެ ކަމެއް ނޫން ކަމަށެވެ. ޕާޓީގެ ރައީސް މުހައްމަދު ނަޝީދުގެ ފުރާނައަށް ދިން ޓެރަރިސްޓް ހަމަލާ އަކީ ވެސް އެކަމުގެ ހެއްކެއް ކަމުގައި ޝިފާޒް ވިދާޅުވިއެވެ. އަދި މިކަންކަމާ ދެކޮޅަށް ބަސްބުނާ މީހުންނާ ދެކޮޅަށް އެމީހުން މަރާލަން ގޮވުމަކީ ވެސް ނުރައްކާތެރި ކަމެއްގެ ގޮތުގައި ޝިފާޒް ވިދާޅުވިއެވެ.
ޝިފާޒް ވިދާޅުވީ މިއީ ހުސް ޕާޓީން ކުރަން ހުރި މަސައްކަތްތައް ކަމަށާއި، ޕާޓީގެ މަސައްކަތް ހުއްޓާލައިގެން ނުވާނެ ކަމަށެވެ. ޕާޓީއަށް 93،000 މީހުން ހަމަވެފައި ތިބީ ޕާޓީގައި ވަރަށް ގިނަ ވިސްނުންތަކެއް ހިމެނިގެން ކަމަށެވެ. އެހެންވީމަ ތަފާތު ހިޔާލުތައް ހުންނާނެ ކަމަށާއި، ތަފާތު ކަންކަން ހުންނާނެ ކަމަށެވެ. އެކަމަކު ޕާޓީގެ އަސާސްތަކާއި ޕާޓީގެ މަގްސަދާ އެއްގޮތަށް ކުރާ މަސައްކަތްތަކުގައި ފަސްޖެހިގެން ނުވާނެ ކަމަށް ޝިފާޒް ވިދާޅުވިއެވެ.
