އެމްޑީޕީއަކީ ގައުމު ބިނާކޮށް، ޙާލަތު ރަނގަޅުކުރުމުގެ އެންމެ މުހިންމު އެއް ތަރަހަ- ރައީސް ނަޝީދު

އެމްޑީޕީއަކީ ގައުމު ބިނާކޮށް، ހާލަތު ރަނގަޅުކުރުމުގެ އެންމެ މުހިންމު އެއް ތަރަހަކަމަށް ޕާޓީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.  

6 ޖޫން 2005ގައި ރަޖިސްޓްރީ ކުރި އެމްޑީޕީއަށް 16 އަހަރު ފުރުމުގެ މުނާސަބަތުގައި ކުރެއްވި ޓުވީޓްގައި ރައީސް ނަޝީދު ވަނީ، ގައުމު ހިންގުމުގައި އެމަނިކުފާނު ނިސްބަތްވެވަޑައިގަންނަވާ އެމްޑީޕީގެ މުހިންމުކަމަށް އަލިއަޅުއްވާލައްވާފައެވެ. އެމްޑީޕީގެ ދިދައިގެ ފޮޓޯއަކާއެކު ކުރެއްވި ޓުވީޓްގައި އެމަނިކުފާނު ވިދާޅުވެފައި ވަނީ، ގައުމެއް ބިނާކޮށް ރައްޔިތެއްގެ އާންމު ހާލަތު ރަނގަޅުވުމުގެ އެންމެ މުހިންމު ތަރަހައަކީ އިންތިޒާމުވެގެން ހިންގާ، ސުލްހަވެރި ސިޔާސީ ހަރަކާތްކަމަށެވެ. ދިވެހިރާއްޖޭގައި މި ނިޒާމުގެ ދިވެހި މުއައްސަސާއަކީ އެމްޑީޕީކަމަށް ރައީސް ނަޝީދު ސިފަކުރެއްވިއެވެ. އަދި ޕާޓީގެ އަހަރީ ދުވަހުގެ ތަހުނިޔާ މެމްބަރުންނަށް ފޮނުއްވައި، އުފާވެރި އަހަރުތަކެއް ޕާޓީއަށް ލިބުމަށް އެދިވަޑައިގެންފައި ވެއެވެ.

ރައީސް ނަޝީދުގެ އިތުރުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުވެސް ވަނީ އަހަރީ ދުވަހުގެ ތަހުނިޔާ ޕާޓީގެ އެންމެހާ މެންބަރުންނަށް ފޮނުއްވާފައެވެ.

މި މުނާސަބާގައި އެމްޑީޕީން ނެރުނު ބަޔާނުގައި ބުނެފައިވަނީ 16 ވަނަ އަހަރު ފުރުން ފާހަގަކުރަން ޖެހިފައި މިވަނީ ޕާޓީގެ އެންމެހައި މެމްބަރުންނަށާއި ޕާޓީއަށް ތާއީދުކުރާ އެންމެހައި ފަރާތްތަކަށް ނުހަނު ބޮޑު ސިހުމަކާއި ހިތާމައެއް ލިބިފައިވާ ދަނޑިވަޅެއްގައި ކަމަށެވެ. އަދި ޕާޓީގެ ރައީސް، ރައީސް މުޙައްމަދު ނަޝީދު އަވަހާރަކޮށްލުމަށް ދިން ނުރައްކާތެރި ޓެރަރިސްޓް ހަމަލާގައި، އެމަނިކުފާނުގެ ފުރާނަފުޅު ކިރިޔާ ސަލާމަތްވެ، ޒަޚަމްކޮށްލާފައިވާ ވަގުތެއްގައި ކަމަށެވެ. މި ހަމަލާއަކީ އެމަނިކުފާނު އަވަހާރަކޮށްލުމަށް ދިން ހަމަލާއެއްގެ އިތުރަށް، ޕާޓީގެ ފިކުރަށާއި ޕާޓީ ބިނާވެފައިވާ އަސްލުތަކަށާއި ޕާޓީގެ ނުގުޑާ އަޒުމަށާއި ހިތްވަރަށް ދިން ހަމަލާއެއް ކަމަށް ބަޔާނުގައިވެއެވެ.

އެމްޑީޕީގެ އަހަރީ ދުވަސް ފާހަގަކުރާއިރު، އެޕާޓީން ވަނީ ޑިމޮކްރަސީ ރާއްޖެއަށް ގެނައުމުގައި ގިނަ މަސައްކަތްތައް ކޮށްފައެވެ. މީގެ އިތުރުން 2018ގައި ބޭއްވި ރިޔާސީ އިންތިޚާބާއި، 19ވަނަ ރައްޔިތުންގެ މަޖިލީހުގެ އިންތިޚާބުގައި އެމްޑީޕީއަށް ވަނީ ބޮޑު ކާމިޔާބީއެއް ލިބިގެން ގޮސްފައެވެ. އަދި ބައި ލައްކައަށް ވުރެ ގިނަ މެމްބަރުންނާއެކު ރާއްޖޭގައި އޮތް އެންމެ ބޮޑު ސިޔާސީ ޕާޓީއަކީ ވެސް އެމްޑީޕީއެވެ.