ރައްޔިތުންގެ މަޖިލީހުގެ ސަލާމަތީ ޚިދުމަތްތަކުގެ ކޮމިޓީ ނުވަތަ 241 ކޮމިޓީން ކުރިއަށްގެންދާ އިންކުއަރީއަށް އޭޑީކޭގެ ޑޮކްޓަރުންގެ ޓީމު ހާޒިރުކޮށް ސުވާލު ކޮށްފިއެވެ.

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ހަމަލާގައި އެމަނިކުފާނުގެ ސެކިޔުރިޓީ ފެއިލްވެފައިވާ ގޮތުގެ އިންކުއަރީ 241 ކޮމިޓީން ފަށާފައިވަނީ، މެއި މަހުގެ 24ވަނަ ދުވަހުއެވެ. އަދި ޖޫން މަހުގެ 5ވަނަ ދުވަހުން ފެށިގެން އަންނަނީ އެކި މީހުން ކޮމިޓީއަށް ހާޒިރުކުރަމުންނެވެ. އޭގެތެރޭގައި ފުލުހުންނާއި ސިފައިންގެ އިސްވެރިންގެ އިތުރުން އެކިއެކި އޮފިސަރުންނާއި މިނިސްޓަރުން ވެސް ހިމެނެއެވެ.

މި އިންކުއަރީއަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު ވެސް ހޮނިހިރު ދުވަހުގެ ހެނދުނު 10:00ގައި ހާޒިރުކޮށްފައިވެއެވެ. އެކަމާގުޅިގެން މެމްބަރު އިލްޔާސް ވިދާޅުވީ 241 ކޮމިޓީގެ މެންބަރު ކަމުން މިދިޔަ ހަފުތާގައި އޭނާ އެކަހެރިވެވަޑައިގެންފައިވާ ކަމަށާއި، ވަކި ފަރުދެއްގެ ހައިސިއްޔަތުން ކޮމިޓީއަށް ހާޒިރުވެ ބަޔާންދީފައިވާ ކަމަށެވެ.

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށްދިން ޓެރަރިސްޓް ހަމަލާގައި އެމަނިކުފާނުގެ ސެކިޔުރިޓީ ފެއިލްވި ގޮތުގެ އިންކުއަރީ ކުރިޔަށްގެންދާ 241 ކޮމިޓީން މިހާރު ކުރަމުންދަނީ ރިޕޯޓް އެކުލަވާލުމުގެ މަސައްކަތެވެ. އެގޮތުން ބުދަ ދުވަހުގެ ނިޔަލަށް އިންކުއަރީން 49 މީހަކާ ވަނީ ސުވާލުކޮށްފައެވެ. ކޮމިޓީން މަސައްކަތްކުރަމުން އަންނަނީ މި މަސް ނިމެންވާއިރަށް އިންކުއަރީ ނިންމާލައި، ރިޕޯޓް ތަޅުމަށް ފޮނުވުމަށެވެ.