ރައްޔިތުންގެ މަޖިލީހުގެ ސަލާމަތީ ޚިދުމަތްތަކުގެ ކޮމިޓީ ނުވަތަ 241 ކޮމިޓީން ކުރިއަށްގެންދާ އިންކުއަރީއަށް ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު ހާޒިރުކޮށްފިއެވެ.

ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާގައި އެމަނިކުފާނުގެ ސެކިޔުރިޓީ ފެއިލްވެފައިވާ ގޮތުގެ އިންކުއަރީ 241 ކޮމިޓީން ފަށާފައިވަނީ، މެއި މަހުގެ 24 ވަނަ ދުވަހުއެވެ. އަދި ޖޫން މަހުގެ 5 ވަނަ ދުވަހުން ފެށިގެން އަންނަނީ އެކި މީހުން ކޮމިޓީއަށް ހާޒިރުކުރަމުންނެވެ. އޭގެތެރޭގައި ފުލުހުންނާއި ސިފައިންގެ އިސްވެރިންގެ އިތުރުން އެކިއެކި އޮފިސަރުންނާއި މިނިސްޓަރުން ވެސް ހިމެނެއެވެ.

އިންކުއަރީއަށް މެންބަރު އިލްޔާސް ހާޒިރުކޮށް ސުވާލުކޮށްފައިވަނީ ހޮނިހިރު ދުވަހުގެ ހެނދުނު 10:00 ގައެވެ. އެކަމާއި ގުޅިގެން މެމްބަރު އިލްޔާސް ވިދާޅުވީ 241 ކޮމިޓީގެ މެންބަރު ކަމުން މިދިޔަ ހަފުތާގައި އެކަހެރިވެވަޑައިގެންފައިވާ ކަމަށާއި ވަކި ފަރުދެއްގެ ހައިސިއްޔަތުން ކޮމިޓީއަށް ހާޒިރުވެ ބަޔާންދީފައިވާ ކަމަށެވެ.

މެމްބަރު އިލްޔާސާ ސުވާލުކޮށްފައިވާއިރު، މީގެ ކުރިން މެމްބަރު ވިދާޅުވީ ރައީސް ނަޝީދަށް އަމާޒުކޮށް ބަޔަކު ހަމަލާއެއް ދޭން ރާވަމުންދާ ކަމުގެ މައުލޫމާތު އާންމުންގެ މީހަކު ހިއްސާކުރުމުން އެކަން ޑިފެންސް މިނިސްޓަރ މާރިޔާ އަހުމަދު ދީދީގެ ސަމާލުކަމަށް ގެނެސްފައިވާނެ ކަަމަށާއި، ނަމަވެސް ފުލުހުންނަށް އެ މައުލޫމާތު ރިޕޯޓު ކުރުމަށް އަންގާފައި ނެތްކަމަށެވެ. ރައީސް ނަޝީދު އަވަހާރަކޮށްލަން ބަޔަކު ރާވަމުންދާކަމުގެ މައުލޫމާތު އާންމުންގެ މީހެއްގެ ފަރާތުން ލިބުނު ކަމަށެވެ. އެ އެމައުލޫމާތު ވަގުތުން ރައީސް ނަޝީދާ ހިއްސާ ކުރައްވާފައިވާނެ ކަމަށް ވެސް މެމްބަރު އިލްޔާސް ވިދާޅުވިއެވެ.

އޭގެ އިތުރުން، މިނިސްޓަރ އޮފް ޑިފެންސް މާރިޔާ އަހުމަދު ދީދީއަށް ގުޅުއްވައި ރައީސް ނަޝީދުގެ އިރުޝާދާއެކު، އެ މައުލޫމާތު މިނިސްޓަރަށް އަރުވާފައިވާނެ ކަމަށްވެސް އިލްޔާސް ވިދާޅުވިއެވެ. އިލްޔާސް ވިދާޅުވީ، އޭނާއަށް ލިބިފައިހުރި މައުލޫމާތުގެ ތަފްސީލު މިނިސްޓަރާ ހިއްސާ ކޮށްފައިވާނެ ކަމަށާއި، ރައީސް ނަޝީދުގެ ސަލާމަތާ ރައްކާތެރިކަން ބެލެހެއްޓުމުގެ ގާނޫނީ ޒިންމާ އަދާކުރަންޖެހޭ ފަރާތަކީ ޑިފެންސް މިނިސްޓްރީ ކަމަށްވާތީ އެ އެމުއައްސަސާއާ ހިއްސާކުރުމުން، މޯލްޑިވްސް ޕޮލިސް ސަރވިސް ނުވަތަ ކޮމިޝަނަރ އޮފް ޕޮލިސްއާ ވެސް ހިއްސާކުރުމަށް އަންގާފައި ނުވާ ކަމަށެވެ.

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށްދިން ޓެރަރިސްޓް ހަމަލާގައި އެމަނިކުފާނުގެ ސެކިޔުރިޓީ ފެއިލްވި ގޮތުގެ އިންކުއަރީ ކުރިޔަށްގެންދާ 241 ކޮމިޓީން މިހާރު ކުރަމުންދަނީ ރިޕޯޓް އެކުލަވާލުމުގެ މަސައްކަތެވެ. އެގޮތުން ބުދަ ދުވަހުގެ ނިޔަލަށް އިންކުއަރީން 49 މީހަކާ ވަނީ ސުވާލުކޮށްފައެވެ. ކޮމިޓީން މަސައްކަތްކުރަމުން އަންނަނީ މި މަސް ނިމެންވާއިރަށް އިންކުއަރީ ނިންމާލައި، ރިޕޯޓް ތަޅުމަށް ފޮނުވުމަށެވެ.