"އިސްރާއީލު ޕާސްޕޯޓު މަނާ ކުރުމުގެ ބިލު ފާސްކުރީ ނަތަންޔާހޫ އަށް ވެސް ރާއްޖެ އާދެވޭ ގޮތަށް" : މީކާއިލް

އިސްރާއީލު ޕާސްޕޯޓު މަނާ ކުރުމުގެ ބިލު ފާސް ކުރީ އިސްރާއިލު މީހުންނަށް އާދެވޭ ގޮތަށް ކަމަށާއި ބިލު ފާސްކޮށްފައި ވަނީ ބިލުގެ މަގްސަދާއި ވެސް ޚިލާފަށް ކަމަށް ބިލު ހުށަހެޅުއްވި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.

އޭނާ އެފަދައިން ވިދާޅުވީ އަންގާރަ ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.

Advertisement

އަންގާރަ ދުވަހު އެ ބިލު މަޖިލީހުން ފާސް ކުރީ ޖުމުލަ 83 މެންބަރުންގެ ވޯޓާއެކު އެވެ. އެ ބިލު ފާސްކޮށްފައި ވަނީ އެމްޑީޕީގެ މެމްބަރުންގެ ވޯޓާއި ވެސް އެކުގައެވެ.

އެހެންނަމަވެސް ބިލަށް ވޯޓު ދިނީ ބިލު އޮތް ގޮތާއި މެދު ފުރިހަމަ އަށް ރުހޭތޯ ނޫން ކަމަށް މީކާއިލް ވިދާޅުވިއެވެ. "އިސްރާއީލު ޕާސްޕޯޓު މަނާ ކުރުމުގެ ބިލު ފާސްކުރީ ނަތަންޔާހޫ އަށް ވެސް ރާއްޖެ އާދެވޭ ގޮތަށް" ކަމަށް ފާހަގަކުރައްވާ އޭނާ ވިދާޅުވީ ބިލަށް ވޯޓު ދޭން އެމްޑީޕީން ނިންމީ، އެ ބިލަށް އެމްޑީޕީން ވޯޓު ނުދީފި ނަމަ ސަރުކާރުގެ މެމްބަރުން އެކަމާއި މެދު ފިތުނަ އުފައްދާނެތީ ކަމަށެވެ.

ޑުއެލް ސިޓިޒެންޝިޕް އޮންނަ މީހުންނަށް ރާއްޖެ އާދެވޭ ގޮތަށް އެ ބިލު ފާސްކުރުމުން އެކަމާއި މެދު އެމްޑީޕީގެ ޕީޖީ ލީޑަރ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް އާއި އެމްޑީޕީގެ އެހެނިހެން މެމްބަރުން ވަނީ ކަންބޮޑުވުން ފާޅުކުރައްވާފައެވެ. އެގޮތުން އެ ބިލު މިހާރު ފާސްކުރީ ރައްޔިތުން ބޭނުންވި މަގްސަދު ހާސިލްވާ ގޮތަށް ނޫން ކަމަށް ވެސް މެމްބަރުން ވަނީ ވިދާޅުވެފައެވެ. މީގެ އިތުރުން ނާޒިލް ވަނީ ކުރިއަށް އޮތްތަނުގައި އެކަމާއި މެދު އެމްޑީޕީގެ ޕީޖީ ގްރޫޕްގައި މަޝްވަރާ ކޮށް އިސްރާއިލް ޕާސްޕޯޓް އޮތް އެއްވެސް މީހަކަށް ރާއްޖެ ނާދެވޭ ގޮތަށް ހަމަޖެއްސުމަށް އަމަލު ކުރެވިދާނެ ގޮތެއް ހޯދާނެ ކަމަށް ވިދާޅުވެފައެވެ.

އިސްރާއީލުގެ ޕާސްޕޯޓްގައި ދިވެހިރާއްޖެ އެތެރެވުން ހުއްޓުވުމަށް ހުށަހަޅައިފައިވާ މައްސަލަ އާއި ގުޅިގެން ފަލަސްތީނަށް އިސްރާއީލުން ދެމުންގެންދާ ހަމަލާތައް ހުއްޓާލަންދެން އިސްރާއީލް ޕާސްޕޯޓުގައި ރާއްޖެ އެތެރެވުން މަނާކުރުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ)ން ނިންމީ ހޯމަ ދުވަހުއެވެ.

އެގޮތަށް ނިންމާފައި ވަނީ ހޯމަ ދުވަހު ބޭއްވި އެ ކޮމިޓީގެ ބައްދަލުވުމުގައި ކަމަށް ވާ އިރު މި ނިންމުން ނިންމާފައި މި ވަނީ އިސްރާއިލް ޕާސްޕޯޓު މަނާކުރަން ދިވެހި ސަރުކާރުން ނިންމާފައިވާ ކަމަށް ސަރުކާރުން އިއުލާނުކުރިތާ 316 ދުވަސް ފަހުންނެވެ.

މި އިސްލާހު ހުށަހަޅަނީ އިމިގްރޭޝަންގެ އެދުމުގެ މަތިން ކަމަށް ޕީއެންސީން ބުނި ނަމަވެސް އެއީ ބަލައިގަނެވޭ ވާހަކަ އެއް ނޫން ކަމަށް މީކާއިލް ވިދާޅުވިއެވެ. އިމިގްރޭޝަނުން ބުނެފައި ވަނީ ބިދޭސީން ރާއްޖެ އެތެރެވާ އިރު އެ މީހުން ނިސްބަތްވާ ޤައުމިއްޔަތު ދެނެގަތުމަށް ބަލަނީ، އެ ބިދޭސީން ހުށަހަޅާ ޕާސްޕޯޓު ކަމަށެވެ. އެހެންކަމުން އެ މީހާ އަކީ ދެ ގައުމެއްގެ ޕާސްޕޯޓު އޮންނަ ޑުއަލް ސިޓިޒަނެއްކަން ކަށަވަރު ނުކުރެވޭ ކަމަށް އިމިގްރޭޝަނުން ބުނެއެވެ. އެއީ މިހާ ކުރިއަރާފައިވާ ޒަމާނެއްގައި ޤަބޫލުކުރެވޭ ކަމެއް ނޫން ކަަމަށް މީކާއިލް ވިދާޅުވިއެވެ.

މީގެ ކުރިން ބަންޑާރަ ނައިބު އަހުމަދު އުޝާމް ވެސް ވަނީ އިސްރާއީލްގެ ޕާސްޕޯޓު އޮންނަ އެންމެންނަށް ރާއްޖެއަށް އެތެރެ ނުވެވޭ ގޮތަށް އޮތް އޮތުން ބަދަލުކުރުމަށް ވަކާލާތުކުރައްވާފައެވެ.

10 ޖޫން 2024 ގައި އެ ބިލު މަޖިލީހަށް ބަލައިގަތުމަށް ފާސްކޮށް، މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް ފޮނުވިއެވެ. ނަމަވެސް މީގެ ކުރިން މި ބިލާ ގުޅިގެން ކޮމިޓީގެ ބައްދަލުވުމެއްވެސް ނުބާއްވާތީ އެކަމަށް މެމްބަރުން އައީ ފާޑުކިޔަމުންނެވެ.