ޖަމިއްޔާތަކުން 31 އޮގަސްޓުގެ ކުރިން އަހަރީ ރިޕޯޓާއި ޑޮނޭޝަންގެ މައުލޫމާތު ހުށަހެޅުމަށް އެދިއްޖެއެވެ.

މޯލްޑިވްސް އިންލެންޑް ރެވެނިއު އޮތޯރިޓީ (މީރާ)އިން ނެރުނު އިއުލާނެއްގައި ވަނީ ކޮމިޝަނަރ ޖެނެރަލް ހުއްދަ ދީފައިވާ، ހިލޭސާބަހަށް މަސައްކަތް ކުރާ ޖަމިއްޔާތަކުން، އާމްދަނީން ޓެކްސް ނެގުމުގެ ގަވާއިދުގެ 48ވަނަ މާއްދާގެ ދަށުން ހުށަހަޅަން ޖެހޭ 2020 ވަނަ އަހަރުގެ އަހަރީ ރިޕޯޓާއި ޑޮނޭޝަންގެ މައުލޫމާތު ހުށަހެޅުމުގެ އެންމެ ފަހު ތާރީޚު 31 އޮގަސްޓް 2021ގެ ނިޔަަލަށް ފަސްކޮށްފައިވާ ކަމަށެވެ. މި ތާރީޚުގެ ނިޔަލަށް ލިޔެކިޔުން ހުށަނާޅާ ޖަމިއްޔާތައް ކޮމިޝަނަރ ޖެނެރަލް ހުއްދަ ދީފައިވާ ހިލޭސާބަހަށް މަސައްކަތް ކުރާ ޖަމިއްޔާތަކުގެ ލިސްޓުން އުނިކުރެވޭނެ ކަމަށް ވެސް މީރާ އިން ބުންޏެވެ.

މީރާ އިން މިހެން ބުނެފައިވާއިރު މީރާ އިން ޓެކުހުގެ ގޮތުގައި ބަލައިގަތް ފައިސާގެ އަދަދު ފާއިތުވި އަހަރުގެ އެ މުއްދަތާ އަޅާބަލާއިރު، 283.6 އިންސައްތަ އިތުރު ކަމަށް އެ އިދާރާއިން ވަނީ ދާދިފަހުން ހާމަކޮށްފައެވެ.

މީރާއިން ބުނީ މެއި މަހު އެއިދާރާއިން 783.88 މިލިޔަން ރުފިޔާ ބަލައިގަނެފައިވާނެ ކަމަށެވެ. މި އަދަދަކީ ލިބޭނެކަމަށް އަންދާޒާކުރި ވަރަށްވުރެ 16.7 އިންސައްތަ އިތުރު އަދަދެއް ކަމަށެވެ.

މެއި މަހު މީރާއިން ބަލައިގަތް ފައިސާގެ އެންމެ ބޮޑު ބައެއް ހިއްސާކުރަނީ ޖީއެސްޓީގެ ގޮތުގައި ލިބުނު 496.19 މިލިއަން ރުފިޔާއެވެ. އެއީ ލިބުނު އާމްދަނީގެ 63.3 އިންސައްތައެވެ. އަދި ގްރީން ޓެކުހުގެ ގޮތުގައި ލިބުނު 52.68 މިލިއަން ރުފިޔާ، 6.7 އިންސައްތަ ހިއްސާކުރާއިރު، އެއާޕޯޓް ޑިވެލޮޕްމެންޓް ފީގެ ގޮތުގައި ލިބުނު 33.44 މިލިއަން ރުފިޔާ ހިއްސާކުރަނީ 4.3 އިންސައްތައެވެ.

އޭގެ އިތުރުން އެއަރޕޯޓް ސަރވިސް ޗާޖްގެ ގޮތުގައި ލިބުނު 32.74 މިލިއަން ރުފިޔާއިން ހިއްސާކުރަނީ 4.2 އިންސައްތައެވެ. އަދި ވޯރކްޕަރމިޓް ފީގެ ގޮތުގައި ލިބުނު 29.32 މިލިއަން ރުފިޔާ ހިއްސާކުރަނީ 3.7 އިންސައްތައެވެ. އެހެނިހެން ޓެކުހާއި ފީގެ ގޮތުގައި ލިބިފައިވާ 139.51 މިލިއަން ރުފިޔާ ހިއްސާކުރަނީ 17.8 އިންސައްތައެވެ.

މީރާއިން މައުލޫމާތުދޭ ގޮތުގައި މެއި މަހު އެއިދާރާއަށް ލިބުނު އާމްދަނީގެ ތެރޭގައި 32.79 މިލިއަން ޑޮލަރު ހިމެނެއެވެ.

މީރާއިން މައުލޫމާތުދޭގޮތުގައި ފާއިތުވި އަހަރުގެ މެއި މަހު ލިބުނު އާމްދަނީ ދަށްވެފައި ވަނީ ކޮވިޑް-19އާ ގުޅިގެން މިދިޔަ އަހަރުގެ މެއި މަހު މާލެ ލޮކްޑައުންކޮށް، ރާއްޖޭގެ ބޯޑަރު ބަންދުކޮށްފައި އޮތުމުން، ފަތުރުވެރިކަމަށް އައި ހީނަރުކަމުގެ ސަބަބުން ކަމަށެވެ. އަދި އެމުއްދަތުގައި ލިބުނު އާމްދަނީއާ އަޅާބަލާއިރު، މިއަހަރުގެ މެއި މަހު އިންކަމް ޓެކްސް، ގުޑްސް އެންޑް ސަރވިސަސް ޓެކްސް، ގްރީން ޓެކްސް، އެއަރޕޯޓް ޑިވެލިޕްމެންޓް ފީ، އެއަރޕޯޓް ސަރވިސް ޗާޖް އަދި ޓޫރިޒަމް ލޭންޑް ރެންޓުގެ ގޮތުގައި ލިބުނު އާމްދަނީ ވަރަށް ބޮޑުތަން އިތުރުކަން މީރާއިން ފާހަގަކުރެއެވެ.

އޭގެ އިތުރުން، ކޮވިޑް-19 ފެތުރުން ކޮންޓްރޯލުކުރުމުގެ ގޮތުން ވަކި މުއްދަތަކަށް ސަރުކާރުގެ އޮފީސްތައް ބަންދުކުރުމަށް ނިންމާފައިވާތީ، މެއި މަހަށް އައިސްފައިވާ ސުންގަޑިތަކެއް ފަސްކުރެވިފައިވާކަމަށް މީރާއިން ބުނެއެވެ.