އެސްއެމްއީ ޑިވެލޮޕްމެންޓް ފައިނޭސް ކޯޕަރޭޝަން (އެސްޑީއެފްސީ)ގެ މި އަހަރުގެ ފަންޑުގެ ބޮޑުބައެއް ޓާގެޓު ކުރާނީ ކޮވިޑް-19ގެ ސަބަބުން ގެއްލުން ލިބިފައިވާ ވިޔަފާރިތައް އަލުން ކޮޅަށް ޖެހުމަށް ކަމަށް އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވެއްޖެއެވެ.

އިކޮނޮމިކް މިނިސްޓަރ ފައްޔާޒު އިސްމާއިލް ވަނީ އެސްޑީއެފްސީގެ މި އަހަރުގެ ފަންޑުގެ ބޮޑުބައެއް ޓާގެޓު ކޮށްފައިވަނީ ކޮވިޑް-19ގެ ސަބަބުން ގެއްލުން ލިބުނު ވިޔަފާރިތައް ކޮޅަށް ޖަހައި ކުރިއަށްގެންދޭނެ ގޮތަށް މަގުފަހިކުރުމަށް ކަމަށާއި ބޭންކުގެ ލޯނުތައް ބައްޓަންކުރާނީ މި އަމާޒު ހާސިލުކުރުމަށް ކަމަށް ވިދާޅުވެފައެވެ. އެހެންކަމުން ސަރުކާރުން ފޯރުކޮށްދޭ ފުރުސަތުގެ ބޭނުން ހިފައި ރަނގަޅު ނަތީޖާއެއް ނެރުމަށް ސަރުކާރާއެކު މަސައްކަތްކުރާނެ ކަމަށް އުއްމީދު ކުރައްވާކަމަށް މިނިސްޓަރ ވިދާޅުވިއެވެ.

އިކޮނޮމިކް މިނިސްޓްރީ އާއި އެސްޑީއެފްސީ ގުޅިގެން އެކުލަވާލާފައިވާ ކޮވިޑް-19 ސަސްޓެއިނަބިލިޓީ ސްޓިމިއުލަސް ޕެކޭޖުގެ ދަށުން، ކޮވިޑްގެ ސަބަބުން ވިޔަފާރިތަކަށް އެންމެ ބޮޑަށް އަސަރުކޮށްފައި ހުރި ދާއިރާތަކަށް އިސްކަން ދެވޭނެ ކަމަށް މިނިސްޓަރ ވިދާޅުވިއެވެ. އެގޮތުން ކޮވިޑުން ރައްކާތެރިވުމަށް އެޅުނު ފިޔަވަޅުތަކުގެ ސަބަބުން އެންމެ ބޮޑަށް އަސަރު ކުރި ރަށްތަކުގެ ވިޔަފާރިތަކަށް އިސްކަންދެވޭނެ ކަމަށް މިނިސްޓަރ ވިދާޅުވިއެވެ. އޭގެތެރޭގައި ގްރޭޓަރ މާލޭ އޭރިއާ ލޮކްޑައުންކުރުމުގެ ސަބަބުން އަސަރުކުރި ރަށްތަކަށް އިސްކަންދެވޭނެ ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ކޮވިޑްގެ ސަބަބުން ބަންދުކުރަން ޖެހުނު ވިޔަފާރިތަކަށް އިސްކަންދޭނެ ކަމަށެވެ. އެގޮތުން ސެލޫންތަކާއި ޖިމް ތަކަކީ ކޮވިޑްގެ ސަބަބުން އެއްވެސް ވަރަކަށް ވިޔަފާރި ނުކުރެވި ބަންދުކުރަން ޖެހުނު ވިޔަފާރިތައް ކަމަށާއި ކެފޭ ރެސްޓޯރެންޓްތަކުން ޑެލިވަރީ އާއި ޓޭކްއަވޭގެ ޚިދުމަތް ފޯރުކޮށްދެވުނު ނަމަވެސް ވިޔަފާރީގެ ބޮޑުބައެއް ކުރިއަށް ނުގެންދެވި ހުރި ވިޔަފާރިތަކެއް ކަން މިނިސްޓަރ ފާހަގަކުރެއްވިއެވެ.

އޭގެ އިތުރުން މިނިސްޓަރ ވަނީ މިފަހަރު ތައާރަފްކުރެވިގެން މިދިޔަ ކޮވިޑް-19 ސަސްޓެއިނަބިލިޓީ ސްޓިމިއުލަސް ޕެކޭޖަކީ ރިލީފް ލޯނަކަށްވުރެ އެސްޑީއެފްސީގެ ފަރާތުން ހިންގާ ބިޒްނަސް ކްލިނިކްތަކެއްގެ ތެރެއިން، ކޮންސަލްޓަންޓުންގެ އެހީތެރިކަމާއެކު ލޯނުތަކަށް އެދޭ ފަރާތްތަކާ މަޝްވަރާކުރެވިގެން، އެ ވިޔަފާރި ބައްޓަން ކުރެވޭނެ ގޮތަށް، އެއަށް ބޭނުންވާނެ ފައިސާއާ އަދި އެހެނިހެން ފަންނީ އެހީތެރިކަން ދީގެން ކުރިއަށް ގެންދިއުމަށް ރާވާފައިވާ ސްކީމެއް ކަމަށް ވިދާޅުވެފައެވެ. އެގޮތުން ދެފަރާތުން ވާހަކަދައްކާ ނިމޭއިރު، ވިޔަފާރިއަކީ ކުރިއަށް ނުގެންދެވޭނެ ވިޔަފާރިއެއް ކަމަށް ނިންމިއްޖެ ނަމަ އެވިޔަފާރި އެހެން ވިޔަފާރިއަކަށް ކޮންވަރޓްކުރުމުގެ ފުރުސަތު ލިބިގެންދާނެ ކަމަށް މިނިސްޓަރ ވިދާޅުވިއެވެ.