އެސްޑީއެފްސީގެ ލޯނުތަކަށް އެދި ހުށަހެޅުން ވަގުތީ ގޮތުން މެދުކަނޑާލަން ނިންމައިފި

މި އަހަރުގެ އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އިން ދޫކުރަމުންދިޔަ ލޯނުތަކަށް އެދި ހުށަހެޅުން ވަގުތީ ގޮތުން މެދުކަނޑާލަން ނިންމައިފިއެވެ.

އެސްޑީއެފްސީން ބުނީ މި އަހަރުގެ މާލީ ހިސާބުތައް ނިންމުމަށާއި، އެ ކޯޕަރޭޝަނުން ދެމުންދާ ޚިދުމަތްތައް އިތުރަށް ފުރިހަމަކުރުމަށް ގެންނަންޖެހޭ ބަދަލުތައް ގެނައުމުގެ ގޮތުން، މި މަހުގެ 25 ވަނަ ދުވަހުން ފެށިގެން ލޯނަށް އެދި ހުށަހަޅާ ފޯމު ބަލައިގަތުން ވަގުތީ ގޮތުން މެދުކަނޑާލެވޭނެ ކަމަށެވެ. އަދި އަންނަ އަހަރު ލޯނަށް އެދި ހުށަހަޅާ ފޯމު ބަލައިގަންނާނީ ފެބްރުއަރީ މަހުގެ އެއްވަނަ ދުވަހުން ފެށިގެން ކަމަށްވެސް އެ ކޯޕަރޭޝަނުން ބުނެއެވެ.

އެސްޑީއެފްސީން ބުނީ އެންމެ ކުދި، ކުދި އަދި މެދު ފަންތީގެ ވިޔަފާރިތަކަށް ބޭނުންވާ މާލީ އެހީތެރިކަން ފޯރުކޮށްދިނުމުގެ ގޮތުން އެ ކޯޕަރޭޝަނުން މި އަހަރުގެ ތެރޭ 285 ފަރާތަކަށް ޖުމްލަ 395 މިލިޔަން ރުފިޔާގެ ލޯނު ދޫކޮށްފައިވާ ކަމަށެވެ.

މީގެ އިތުރުން އެންމެ ގިނަ ލޯނު ދޫކޮށްފައިވަނީ ފަތުރުވެރިކަމުގެ ދާއިރާއާ ގުޅުންހުރި ވިޔަފާރިތަކަށާއި، ކޮމާޝިއަލް ވިޔަފާރިތަކަށް ކަމަށާއި، މިއަދާއި ހަމައަށް މުޅި ރާއްޖޭގެ ހުރިހާ އަތޮޅެއް ހިމެނޭގޮތަށް 144 ރަށެއްގައި ވިޔަފާރި ހިންގާ ކުރިއެރުވުމަށް ލޯނު ދޫކޮށްފައިވާ ކަމަށްވެސް ބުނެއެވެ. އެސްޑީއެފްސީން މިހާތަނަށް ދޫކޮށްފައިވާ ލޯނުތަކުގެ 33 އިންސައްތަ ލޯނަކީ އަންހެނުންނާއި ޒުވާނުންނަށް ދޫކޮށްފައިވާ ލޯނުތަކެވެ.

މި އަހަރުގެ ތެރޭގައި ދުނިޔެއަށް ފެތުރިގެންދިޔަ ކޮވިޑް-19 ބަލިމަޑުކަމާ ގުޅިގެން އެންމެ ކުދި، ކުދި އަދި މެދު ފަންތީގެ ވިޔަފާރިތަކަށާއި، އަމިއްލަ މަސައްކަތްކުރާ ފަރާތްތަކަށް ދިމާވެފައިވާ މާލީ ދަތިތަކުން އަރައިގަތުމަށް ވެދިން އެހީތެރިކަމަށް އަލިއަޅުވާލައި އެސްޑީއެފްސީން ބުނީ ސަރުކާރުގެ އިގުތިސާދީ ރިކަވަރީ ޕެކޭޖުގެ ދަށުން "ކޮވިޑް-19 ވިޔަފާރި އެހީ" ގެ ނަމުގައި މިނިސްޓްރީ އޮފް ފިނޭންސްއާ ގުޅިގެން ލޯނެއް ތައާރަފުކުރެވި، 2173 ފަރާތަކަށް 376 މިލިޔަން ރުފިޔާގެ ލޯނުގެ އެހީ ދޫކޮށްފައިވާ ކަމަށެވެ.

މި ލޯނުގެ ސަބަބުން ވިޔަފާރިތަކަށާއި، އާމްދަނީ ހޯދުމަށް އަމިއްލަ މަސައްކަތްކުރާ ފަރާތްތަކަށް ދިމާވެފައިވާ މާލީދަތިތަކަށް ލުޔެއް ލިބި، އެ ފަރާތްތަކަށް ދިމާވެފައިވާ ގޮންޖެހުންތަކުން އަރައިގަތުމުގެ މަގު ފަހިވެގެން ދިޔަ ކަމަށްވެސް އެ ކޯޕަރޭޝަނުން ބުނެއެވެ.

އަދި އެސްޑީއެފްސީގެ އަމާޒަކީ ކޯޕަރޭޝަނުން ދޭ ޚިދުމަތްތައް އިތުރަށް ފުރިހަމަކޮށް، ދިވެހިރާއްޖޭގެ އެންމެ ކުދި، ކުދި އަދި މެދު ފަންތީގެ ވިޔަފާރިތަކުގެ އިތުބާރާއި ޔަގީންކަން ލިބިފައިވާ ތަރައްގީގެ ބައިވެރިއެއްގެ ގޮތުގައި ދެމިއޮތުން ކަމަށްވެސް ވަނީ ބުނެފައެވެ.