އަމާޒަކީ ކޮވިޑްގެ ކުރިން ރާއްޖޭގެ އިގުތިސާދު އޮތް ހާލަތަށް ރުޖޫޢަކުރުން - މިނިސްޓަރ އަމީރު
24 ޖޫން 2021 | ބުރާސްފަތި 06:522020 ވަނަ އަހަރު ރާއްޖޭގެ އިގުތިސާދު 34 އިންސައްތަ ދަށަށް ދިޔަ
ފިނޭންސް މިނިސްޓަރު އިބްރާހިމް އަމީރު
ކޮވިޑް-19ގެ ކުރިން ރާއްޖޭގެ އިގުތިސާދު އޮތް ހިސާބަށް އަލުން އިގުތިސާދު ގެންދިއުމަށް ކުރަންޖެހޭ ޚަރަދުތައް މިހާރު ކުރުމަކީ ސަރުކާރުން އިސްކަންދީގެން ކުރަމުން އަންނަ ކަމެއްކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ކޮވިޑްގެ ސަބަބުން ގެއްލުން ލިބެމުންދާ ވިޔަފާރިތަކަށް އެހީވުމަށް ސަރުކާރުން އެކުލަވާލާފައިވާ ސްޓިމިއުލަސް ޕްކޭޖުތައް ތައާރަފްކުރުމާ ގުޅިގެން މިނިސްޓަރ އަމީރު ދެއްކެވި ވާހަކައިގައި އެމަނިކުފާނު ވަނީ ސަރުކާރުގެ އަމްދަނީއަށް ބޮޑެތި ލޮޅުންތައް އައި ނަމަވެސް ސިއްހީ ގޮތުންނާއި އިޖުތިމާއީ ގޮތުން އަދި އިގުތިސާދީ ގޮތުން ދިމާވެފައިވާ ގޮންޖެހުންތައް ހައްލުކުރުމަށް ގިނަ ޚަރަދުތަކެއް ކުރަމުން ކަމަށް ވިދާޅުވެފައެވެ.
މިނިސްޓަރ ވަނީ ކޮވިޑް-19 އާ ގުޅިގެން ދައުލަތުގެ އާމްދަނީއަށް ވަރަށްބޮޑު ލޮޅުމެއް އައިސްފައިވާ ކަމަށާއި 2020 ވަނަ އަހަރު ރާއްޖޭގެ އިގުތިސާދު 34 އިންސައްތަ ދަށަށް ދިޔަކަން ފާހަގަކުރައްވާފައެވެ. އޭގެ ސަބަބުން ސަރުކާރުން އަންދާޒާކުރި އާމްދަނީ 15 ބިލިއަން ރުފިޔާއިން ދަށަށް ދިޔަކަމަށް މިނިސްޓަރ ވިދާޅުވިއެވެ. އަދި 2021 ވަނަ އަހަރު ވެސް ދައުލަތުގެ އާމްދަނީއަށް ލޮޅުން އައިސްފައިވާ ކަމަށް މިނިސްޓަރ ވިދާޅުވިއެވެ.
މިނިސްޓަރ އަމީރު ވަނީ މިގޮންޖެހުންތަކާ އެކުވެސް ސަރުކާރުން ދަނީ ސިއްހީ، އިޖުތިމާއީ އަދި އިގުތިސާދީ ހަރަކާތްތަކަށް ރިލީފް ޕެކޭޖުތައް ދެމުން ކަމަށާއި މީގެ ބޭނުމަކީ ކޮވިޑް-19ގެ ސަބަބުން ވިޔަފާރިތަކަށާއި އާންމު ފަރުދުންގެ ދިރިއުޅުމަށް އަންނަ ލޮޅުންތަކަށް އެހީތެރިކަން ފޯރުކޮށްދިނުން ކަމަށް ވިދާޅުވެފައެވެ. އެގޮތުން 2020 ވަނަ އަހަރުން ފެށިގެން މި އަހަރުގެ މިހާތަނަށް އަމިއްލަ ފަރުދުންނަށާއި ވިޔަފާރިތަކަށް ބޭންކް އޮފް މޯލްޑިވްސް އަދި އެސްއެމްއީ ޑިވެލޮޕްމެންޓް ފައިނޭސް ކޯޕަރޭޝަން މެދުވެރިކޮށް 1.7 ބިލިއަން ރުފިޔާގެ ރިލީފް ލޯނު ފޯރުކޮށްދީފައިވާނެ ކަމަށް މިނިސްޓަރ ފާހަގަކުރެއްވިއެވެ.
އޭގެ އިތުރުން ރާއްޖޭގެ ސިއްހީ ދާއިރާގެ ކެޕޭސިޓީ އިތުރުކުރުމަށާއި ކޮވިޑް-19ގެ ސަބަބުން ކުރަންޖެހުނު އިތުރު ކަންކަމަށް ސަރުކާރުން އިތުރު 1.7 ބިލިއަން ރުފިޔާ ޚަރަދުކޮށްފައިވާނެ ކަމަށް މިނިސްޓަރ ވަނީ ފާހަގަކުރައްވާފައެވެ. މިނިސްޓަރ ވިދާޅުވީ ކޮވިޑް-19 އާ ގުޅިގެން މިކުރެވުނު ޚަރަދުތަކަކީ ރާއްޖޭގެ މިހާރުގެ ގައުމީ އުފެއްދުންތެރިކަމުގެ ނިސްބަތުން ހަ އިންސައްތަކަމަށެވެ. މިއީ ނެޝަނަލް ރިޒިލިއަންސް އެންޑް ރިކަވަރީ ޕްލޭންގެ ދަށުން ކުރެވޭ މަސައްކަތްތަކެއް ކަމަށާއި ސަރުކާރުގެ އަމާޒަކީ 2019 ވަނަ އަހަރު ރާއްޖޭގެ އިގުތިސާދު އޮތް ހާލަތަށް ވީހާވެސް އަވަހަށް އިޤްތިސާދު ރުޖޫއަކުރުން ކަމަށް މިނިސްޓަރ ވިދާޅުވިއެވެ. އަދި މި އަމާޒަށް ވާސިލުވުމައްޓަކައި ކުރަންޖެހޭ ހުރިހާ ޚަރަދެއް ކުރަމުންގެންދިއުން ކަމަށް މިނސިްޓަރ ވިދާޅުވިއެވެ.
ފިނޭންސް މިނިސްޓްރީ އާއި ބޭންކް އޮފް މޯލްޑިވްސް ގުޅިގެން ދޫކުރަމުންދާ ކޮވިޑް-19 އިކޮނޮމިކް ސްޓިމިއުލަސް ޕެކޭޖާ ގުޅޭގޮތުން ވާހަކަދައްކަވަމުން މިނިސްޓަރ ވަނީ މި ޕޭކޭޖުގެ ދަށުން ދޫކުރެވޭ ފައިނޭންސިން އަކީ ރާއްޖޭގެ ތާރިހުގައި ވެސް ފާހަގަކޮށްލެވޭނެ ވަރުގެ އިންޓްރެސްޓް ރޭޓަކާއެކު ދޫކުރެވޭ ފައިނޭންސިން އެއް ކަމަށް ވިދާޅުވެފައެވެ. މި ލޯނުތަކަކީ ވަރަށް ލުއި ލޯނުތަކެއް ކަމަށާއި މި ލޯނުތަކުގެ ސަބަބުން މިދަނޑިވަޅުގައި ގޮންޖެހުންތަކާ ކުރިމިތިލާން ޖެހިފައިވާ ވިޔަފާރިތަކަށް ވަރަށް ބޮޑު ލުއިތަކެއް ލިބިގެންދާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ އަމީރު ވިދާޅުވީ މި ހުރިހާ ސްޓިމިއުލަސް ޕެކޭޖުތަކުގެ ބޭނުމަކީ ރާއްޖޭގެ އިޤްތިސާދު ވެއްޓިފައިމިވާ އަޑިގަނޑުން ވީހާވެސް އަވަހަށް އަރައިގަނެ، ކޮވިޑްގެ ކުރިން އިޤްތިސާދު އޮތް ހާލަތަށް ދިއުން ކަމަށެވެ. ސަރުކާރުން މިހާރު މިގެންގުޅޭ ސިޔާސަތުތަކާއެކު މި އަހަރު ރާއްޖޭގެ އިޤްތިސާދު 18 އިންސައްތަ ކުރިއަރާނެ ކަމަށް ގަބޫލުކުރައްވާކަމަށް މިނިސްޓަރ ވަނީ ވިދާޅުވެފައެވެ.
