ނަފުރަތުގެ ބިލް ފާސް ކުރަން ނުފެންނަ ކަމަށް ގުރައިދޫ ދާއިރާގެ މެމްބަރު ހުށަހެޅުއްވި ހުށަހެޅުން ފާސް ނުކުރަން ޖުޑަިޝަރީ ކޮމިޓީން ނިންމައިފިއެވެ.
ގާނޫނުލް އުގޫބާތަށް އމިސްލާހު ގެންނެވުމަށް، ތުޅާދޫ ދާއިރާގެ މެމްބަރު ހިސާން ހުސައިން ހުށަހެޅުއްވި ބިލު ދިރާސާ ކުރުމަށް ބުދަ ދުވަހުގެރޭ ކުރިއަށްގެންދިޔަ ޖުޑިޝަރީ ކޮމިޓީގެ ބައްދަލުވުމުގައި ބިލު ފާސްކުރަން ނުފެންނަށް ކަމަށް ނިންމައި ކޮމިޓީން ބިލު ބޭރު ކުރުމަށް ގުރައިދޫ ދާއިރާގެ މެމްބަރު އިބްރާހީމް ރިޒާ ހުޅަހެޅުއްވިއެެވެ.
ރިޒާގެ ހުށަހެޅުއްވުމަށް ތާއީދު ކުރެއްވީ ކެންދޫ ދާއިރާގެ މެންބަރު އަލީ ހުސައިނެވެ. ވިދާޅުވީ، އެޗްއާރުސީއެމުން ދިން ލަފާގައި އެ ބިލުގެ 126 ވަނަ މާއްދާގައި ހުރި ހުރިހާ އަކުރެއް އުނިކުރަންޖެހޭ ކަން ފާހަގަކޮށްފައިވާ ކަމަށެވެ. އެހެންކަމުން މުޅި ބިލު ބިނާކޮށްފައިވާ މައިގަނޑު އަސާސް ގޯސްކަމަށް ފާހަގަކުރެވޭ ކަމަށާއި، އެ ބިލު އަނބުރާ ފޮނުވާލަންޖެހޭ ކަމަށް ގަބޫލުކުރައްވާ ކަމަށެވެ.
މި ހުށަހެޅުއްމަށް ރައްދު ދެއްވައި މެމްބަރުން ވިދާޅުވީ، އާންމުންގެ މެދުގައި އެހާ ޚިޔާލު ތަފާތުވުން އުފެދިފައި އޮތް ކަމެއްގައި އެއްވެސް މަސައްކަތެއް ނުކޮށް ބިލު ބޭރުކޮށްލުމަކީ، ތާއީދު ކުރެވޭނެ ކަމެއް ނޫން ކަމަށެވެ. ކޮމިޓީގެ މުގައްރިރު، މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވީ، ބިލާ ގުޅޭ ގޮތުން އެކި މުއައްސަސާ ތަކުން ޚިޔާލު ހޯދިއިރު ވެސް ބިލު ބޭރުކޮށްލުމަށް އެއްވެސް މުއައްސަސާއަކުން ލަފާ ދީފައި ނުވާ ކަމަށެވެ.
ތިން މުއައްސަސާއެއްގެ އިތުރުން އާއްމު އެކި ފަރާތްތަކުގެ ކޮމެންޓު އެ ބިލަށް ލިބިފައިވާ ކަމަށް އިންތި ވިދާޅުވިއެެވެ. އެގޮތުން އިސްލާމިކް މިނިސްޓްރީ އާއި ޕްރޮސެކިޔުޓާ ޖެނެރަލްގެ އޮފީހުގެ އިތުރުން ހިއުމަން ރައިޓްސް ކޮމިޝަނުގެ ހިޔާލު ހޯދަން ކޮމިޓީން އެދުމުން، އެ ތިން މުއައްސަސާއިން ވެސް ވަރަށް ތަފްސީލީ ހިޔާލުތަކެއް ދީފައިވާ ކަމަށް ވިދާޅުވިއެވެ.
ކޮމިޓީގެ ނައިބު މުގައްރިރު، ފޮނަދޫ ދާއިރާގެ މެމްބަރު މޫސާ ސިރާޖް ވިދާޅުވީ، އެ ބިލުގައި ހިމެނޭ ބައެއް މާއްދާތަކުގެ ބަސްމަގު ބަދަލުކުރަންޖެހޭ ކަން ގަބޫލުކުރައްވާ ކަމަށާއި، ލިބިފައިވާ ހިޔާލުތައް ދިރާސާ ކުރަން ކޮމިޓީން އެއްވެސް މަސައްކަތެއް ނުކޮށް އެ ބިލު ބޭރުކޮށްލުމަކީ ވަރަށް ޒިންމާދާރުކަން ކުޑަ ކަމެއް ކަމުގައެވެ.
23 ވަނަ ދުވަހުގެ ނިޔަލަށް މި ބިލު ދިރާސާކޮށް ނިންމަން މީގެ ކުރިން ސުންގަނޑި ކަނޑައަޅާފައިވީ ނަމަވެސް، މަޖިލީހުގެ މި ހިނގާ ދެ ވަނަ ދައުރު ޖުލައި މަހުގެ އަށް ވަނަ ދުވަހަށް އިތުރުކޮށްފައިވާތީ، ބިލުގެ މަސައްކަތް ނިންމާ ސުންގަނޑި އިތުރުކުރަން މުގައްރިރު ހުށަހެޅުއްވިއެވެ. އެގޮތުން ޖުލައި މަހުގެ 1ވަނަ ދުވަހަށް ކޮމިޓީގެ މަސައްކަތްތައް ނިންމައި، މަޖިލީހުގެ ތަޅުމަށް ފޮނުވުމަށް ހުށަހެޅުއްވިއެވެ.
ކޮމިޓީގައި ހުށަހެޅުނު ދެ ހުށަހެޅުމަށްވެސް ވަނީ ވަކިވަކިން ވޯޓަށް އައަހާފައެެވެ.
އެގޮތުން، އަންނަ މަހުގެ އެއް ވަނަ ދުވަހަށް މި ބިލުގެ ސުންގަޑި އިތުރުކުރަން ފާސްވީ ހަތް މެމްބަރުންގެ ވޯޓުންނެވެ.
އެ ބިލު ބޭރުކޮށްލުމަށް ހުށަހެޅުއްވި ހުށަހެޅުމާ ދެކޮޅަށް ހަތް މެމްބަރުން ވޯޓު ދެއްވުމުން އެ ހުށަހެޅުން ފާހެއް ނުވިއެވެ. ބޭރުކުރަން ފެންނަ ކަމަށް ވޯޓުދެއްވީ 2 މެމްބަރުންނެވެ.
