އެމެރިކާއިން ގާޒާ އާރާސްތުރުކުރުމަށް ދޭން ވައުދުވި އެހީ އެމެރިކާގެ ސެނެޓަރ ހިފަހައްޓައިފިއެވެ.

އެމެރިކާއިން ދޭން ނިންމި 50 މިލިއަން ޑޮލަރުގެ އެހީއަކީ، ގާޒާގެ މަގުތަކާއި، ފެނުގެ ނިޒާމު މަރާމާތުކުރުމަށް ދޭ އެހީއެކެވެ. އެމެރިކާގެ ސެކެރެޓަރީ އޮފް ސްޓޭޓް، އެންޓޮނީ ބްލިންކަން މެދުއިރުމައްޗަށް ކުރި ދަތުރުގައި އެހީ ދޭނެ ކަމަށްވަނީ ވައުދުވެވަޑައިގެންފައެެވެ.

ރިޕަބްލިކަން އަށް ނިސްބަތްވާ ސެނެޓަރ ޖޭމްސް ރިޝް ވަނީ، މިދިޔަ މަހު ކޮންގްރެސްއިން ފާސްކުރިގޮތަށް ފަންޑު ހިފަހައްޓާފައެެވެ. މިއީ އޭނާ ފަލަސްތީނަށް އެހީ ފޯރުކޮށްނުދިނުމަށް ކުރި ކަމެއް ކަމަށް ވަނީ ބެލެވިފައެެވެ. އަދި މިއީ ސިޔާސީ ނިންމުމެއް ކަމަށްވެސް ފަލަސްތީނުގައި ހަރަކާތްތެރިވާ ޔޫއެސް އެއިޑުންވަނީ ބުނެފައެެވެ. ފަންޑު ދޫކުރަން ޖެހޭ ކަމަށްވެސް ވަނީ ބުނެފައެވެ.

މިއީ ގާޒާގެ ރައްޔިތުންނަށް އިތުރު ތަކުލީފު ދިނުމަށް ކުރި ކަމެއް ކަމަށް ޔޫއެސް ކެމްޕެއިން ފޯރ ޕަލަސްޓީނިނަން ރައިޓްސް ގެ އެގްޒެކެޓިވް ޑިރެކްޓަރ އަހުމަދު އަބުޒްނައިދު ވަނީ ބުނެފައެވެ.

މެއި މަހުގެ ތެރޭގައި މެދުކެނޑުމެއްނެތި 11 ދުވަހު ދިން ހަމަލާތަކުގައި ގާޒާގެ މީހުން ދިރިއުޅޭ އެތައް އިމާރާތެއް ވަނީ ބިމާ ހަމަވެފައެވެ. އެއް ލައްކައެއްހާ ގާޒާ ރައްޔިތުންގެ ގެދޮރުވަނީ ގެއްލިފައެވެ. އެ ހަމަލާތަކުގައި ޝަހީދުވި ގާޒާގެ ރައްޔިތުންގެ އަދަދު 256ށް އަރައެވެެ. އޭގެ ތެރޭގައި 66 ކުޑަކުދިންވެސް ހިމެނެއެވެ.