ކުޑަކުދިންގެ ހިޔާގެ މުވައްޒަފުންތަކެއް ޖިންސީ ފުރައްސާރަ ކުރި މައްސަލައެއް ނުބަލަން: މިނިސްޓްރީ
ޖިންސީ ފުރައްސާރަކުރި 7 މުވައްޒަފަކު ވަޒީފާއިން ކަނޑާލާފައިވާކަމަށް ވާހަކަތަކެއް ވަނީ ފެންމަތިވެފައި
ވިލިމާލޭގައި ހުންނަ ކުޑަކުދިންގެ ހިޔާ- މިތަން ހިންގަނީ ޖެންޑަރ މިނިސްޓްރީގެ ބެލުމުގެ ދަށުން
ކުޑަކުދިންގެ ހިޔާގެ މުވައްޒަފުންތަކެއް، ހިޔާގައި ދިރިއުޅޭ ކުދިންނަށް ޖިންސީ ފުރައްސާރަ ކުރި މައްސަލައެއް ބަލަމުން ނުދާކަމަށް ޖެންޑަރ މިނިސްޓްރީން ހާމަކޮށްފިއެވެ.
ވިލިމާލޭގައި ހުންނަ ކުޑަކުދިންގެ ހިޔާއާއި ހުޅުމާލޭގައި ހުންނަ ފިޔަވަތިވެސް ހިންގަނީ ޖެންޑަރ މިނިސްޓްރީގެ ބެލުމުގެ ދަށުންނެވެ. ހިޔާގައި ދިރިއުޅޭ ކުދިންނަށް ޖިންސީ ފުރައްސާރަކުރި މައްސަލާގައި 7 މުވައްޒަފަކު ވަޒީފާއިން ކަނޑާލާފައިވާކަމަށް ބުނާ ޚަބަރުތަކެއް މިހާރު ވަނީ ފެންމަތިވެފައެވެ.
މިކަމާ ގުޅޭގޮތުން ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން ޖެންޑަރ މިނިސްޓްރީގެ ޗައިލްޑް އެންޑް ފެމިލީ ޕްރޮޓެކްޝަން ސަރވިސް (ސީއެފްޕޭއެސް)ގެ ޑެޕިއުޓީ ޑިރެކްޓަރ ޖެނެރަލް ރިޝްމީ އާމިރު ވަނީ ތަފުސީލުކޮށްދެއްވާފައެވެ. ރިޝްމީ ވަނީ ހިޔާގައި މަސައްކަތްކުރާ މަސައްކަތް ކުރާ މުވައްޒަފުންގެ މައްސަލައެއް ބަލަމުންދާކަމަށެވެ. އެހެންނަމަވެސް، އެއީ ޖިންސީ ފުރައްސާރައެއް ނުވަތަ ގޯނާއެއް ކޮށްގެން ބަލާ މައްސަލައެއް ނޫންކަމަށް ރިޝްމީ ވިދާޅުވިއެވެ. މި މައްސަލާގައި މިނިވަން ތަހުގީގެއް ހަދައި، ކަން ހިނގައިދިޔަގޮތް އިންސާފުވެރިކޮށް ބެލުމަށް އެ މުވައްޒަފުން ވަގުތީގޮތުން ވަޒީފާއިން ވަކިކުރެވިފައިވާކަމަށް ވިދާޅުވިއެވެ. ރިޝްމީ ވަނީ ހިޔާތަކަކީ ކުދިންނަށް ރައްކާތެރިތަނަކަށް ހެދުމަށް ކުރަން ޖެހުނު ކޮންމެ މަސައްކަތެއް ކުރުމުގައި ސަރުކާރު ފަސްނުޖެހޭނެކަމަށް ވިދާޅުވެފައެވެ.
ޖިންސީ ގޯނާގެ މައްސަލަތައް ބެލުމުގައި މިނިސްޓްރީން ޚާއްސަ އުސޫލުތަކެއް އޮންނަ އިރު، މިހާރު އޮންނަ އުސޫލުގެ ދަށުން މުވައްޒަފަކު އެފަދަކަމެއް ކޮށްފިނަމަ ޖިނާއީ ދައުވާކުރުން ފަސްނުކުރާނެކަމަށް ޖެންޑަރ މިނިސްޓްރީއިން ވަނީ ބުނެފައެވެ.
