މިސްކިތްތަކުގެ ހުރުމަތް ދަމަހައްޓައި ބެލެހެއްޓުން ހަރުދަނާކުރުމަށް ސަރުކާރަށް ގޮވާލާ މައްސަލައެއް ހުށަހަޅައިފި
މިމައްސަލަ ހުށަހެޅުއްވީ މަޑުއްވަރީ ދާއިރާގެ މެމްބަރު އާދަމް ޝަރީފް
މަޑުއްވަރީ ދާއިރާގެ މެމްބަރ އާދަމް ޝަރީފް
މިސްކިތްތަކުގެ ހުރުމަތް ދަމަހައްޓައި ބެލެހެއްޓުން ހަރުދަނާކުރުމަށް ސަރުކާރަށް ގޮވާލާ މަޑުއްވަރީ ދާއިރާގެ މެމްބަރ އާދަމް ޝަރީފް މަޖިލީހަށް މައްސަލައެއް ހުށަހަޅުއްވައިފިއެވެ.
ބުދަ ދުވަހުގެ ޖަލްސާއަށް ހުށަހެޅުއްވި މިމައްސަލައިގައި ވަނީ ކޮވިޑް-19 އާ ގުޅިގެން މާލޭގެ ބައެއް މިސްކިތްތައް ބަންދުކޮށްފައިވަނިކޮށް ބައެއް ފަރާތްތަކުން މިސްކިތްތަކުގެ ގަދަރާއި ހުރުމަތް ކެނޑޭފަދަ ވިޔާނުދާ ދީނާ ޚިލާފު އަމަލުތައް ހިންގަމުންދާތީ އާއި މިސްކިތުގައި މަސްތުވާތަކެތި ވިއްކުމާއި އެތަކެތި ބޭނުން ކުރުމުގެ އިތުރުން އެފަދަ ފަރާތްތަކުން މިސްކިތުގައި ނިދުމާއި ފެންވެރުމާއި ކައިބޮއި ހެދުންފަދަ ކަންކަން ކުރަމުންދާ ކަމަށެވެ.
މިކަންކަމަކީ އިސްލާމީ-ދިވެހި މުޖުތަމައުގައި އެއްގޮތަކަށްވެސް ހިނގިޔަދީގެން ނުވާނެ ކަންކަމަށް ވާތީ އާއި އެފަދަ ކަންކަމަކީ ރާއްޖޭގައި އިސްލާމްދީނުގެ މަތިވެރިކަމާއި އިސްލާމީ ރިވެތި އުސޫލުތައް ނެތިކޮށްލާފަދަ ނުބައި ކަންކަމަށް ވާތީއާއި މިސްކިތްތަކަކީ މިބިންމަތީގައި ހުރުމަތްތެރިވެގެންވާ އަދި ގަދަރު އުފުލިގެންވާ މާތްﷲގެ ގެކޮޅު ކަމުގައިވާތީ ކަމަށް މިކަންކަން ހުއްޓުވަން ޖެހޭ ކަމަށް ޝަރީފް ވިދާޅުވިއެވެ.
މިސްކިތްތަކުގެ ހުރުމަތް ދަމަހައްޓައި އެތަންތަނުގެ ރައްކާތެރިކަން ކަށަވަރުކޮށް މިސްކިތްތައް ބެލެހެއްޓުން މިހާރަށްވުރެ ހަރުދަނާކުރުމަށާއި މިސްކިތްތަކުގައި ހިންގާ ހަޑިމުޑުދާރު އަމަލުތައް ވަގުތުން ހުއްޓުވުމަށާއި މިސްކިތުގެ ގަދަރު ކުޑަވާފަދަ އަމަލުތައް ހިންގަމުންދާ ފަރާތްތަކަށް ނަސޭހަތްތެރިވުމަށާއި އެފަދަ ފަރާތްތަކާމެދު ގާނޫނީ ފިޔަވަޅު އެޅުމަށް ސަރުކާރާ ގޮވާލާ މިމައްސަލަ ހުށަހަޅުއްވާކަމަށް ޝަރީފް ވިދާޅުވިއެވެ.
މިމައްސަލައަށް ބަހުސްކުރުމާމެދު ނެގުނު ވޯޓުގައި ބައިވެރިވެވަޑައިގެންނެވި މެމްބަރުންގެ ތެރެއިން 31 މެމްބަރުން ވަނީ މިމައްސަލައަށް ބަހުސްކުރެއްވުމަށް ފެންނަކަމަށް ވޯޓު ދެއްވާފައެވެ. އެއާއެކު މިމައްސަލައަށް މެމްބަރުން ވަނީ ބަހުސްކުރައްވާފައެވެ.
