ނަފުރަތުގެ އަމަލުތައް ހިންގުމަކީ އިސްލާމްދީން މަނާކުރާ ކަންކަން، އެކަން ބަލައެއް ނުގަނެވޭނެ: އިސްލާމިކް މިނިސްޓްރީ
ނަފްރަތުގެ ބިލަށް މިނިސްޓްރީ އޮފް އިސްލާމިކް އެފެއާޒްގެ ރައުޔު ހޯދުމަށް ރައްޔިތުންގެ މަޖިލީހުން ހުށަހަޅާފައިވޭ
އިސްލާމިކް ޑރ. އަހްމަދު ޒާހިރު
މުޖުތަމައުގެ ފަރުދުންގެ މެދުގައި ނަފުރަތާއި ރުޅިވެރިކަން އުފެއްދުމާއި، ތިމާއާ ދެބަސްވާ ކޮންމެ މުސްލިމަކު ކާފަރުކުރުމާއި، އިސްލާމްދީނުގެ އިލްމުވެރިންނާއި އެނޫން ވެސް މުސްލިމުންގެ ބޮލުގައި ދޮގު އިލްޒާމު އެޅުވުމާއި އެކިބާވަތުގެ ވާދަވެރިކަމުގައި ފިތުނަފަސާދަ އާއި ނަފުރަތުގެ އަމަލުތައް ހިންގުމަކީ އިސްލާމްދީން މަނާކުރާ ކަންކަން ކަމަށް ބަޔާންކޮށް އެއީ މިނިސްޓްރީން ބަލައިގަނެ ތަރުހީބު ދޭނެ ކަމެއް ނޫން ކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީން މިހެން ބުނީ ނަފްރަތުގެ އަމަލުތައް ހުއްޓުވުން ނަމުގައި 9/2014 ދިވެހިރާއްޖޭގެ ގާނޫނުލް އުގޫބާތުގެ 23 ވަނަ މާއްދާގެ ފަހަތަށް މާއްދާއެއް އިތުރުކުރަން ހުށަހެޅިފައިވާ ބިލަށް މިނިސްޓްރީ އޮފް އިސްލާމިކް އެފެއާޒްގެ ރައުޔު ހޯދުމަށް ރައްޔިތުންގެ މަޖިލީހުން ހުށަހަޅާފައިވުމާ ގުޅިގެންނެވެ.
މި ބިލާމެދު އިސްލާމިކް މިނިސްޓްރީގެ ރައުޔު ހޯދުމަށް މަޖިލީހުން ފޮނުވުމާ ގުޅިގެން ބައެއް ދީނީ އިލްމުވެރިންނާއި ގާނޫނީ ވަކީލުންނާ މަޝްވަރާކޮށް އެ ބިލު ފާސްވެގެން އަންނަ އިރު ދިވެހިރާއްޖޭގެ އިސްލާމީ ޝަޚްސިއްޔަތަށް ބުރޫއަރައި، ދިވެހިރާއްޖޭގައި އިސްލާމްދީނުގެ ދައުވަތު ފުޅާކުރުމަށް ހީނަރުކަމެއް ނާންނާނެ ގޮތަކަށް ފަރުމާ ކުރުމަށް މަޝްވަރާ ކުރެވުނު ކަމަށެވެ. މިނިސްޓްރީން ބުނީ މި މަޝްވަރާތަކުގެ މައްޗަށް ބިނާކޮށް މިނިސްޓްރީގެ ރައުޔު ބިނާކޮށްފައިވާނީ މައިގަނޑު ތިންކަމެއްގެ މައްޗަށް ރިއާޔަތްކޮށްގެން ކަމަށެވެ.
ފުރަތަމަ ކަމަކީ އިސްލާމް ދީނުގެ ނަމުގައި މީހުންގެ އަބުރާއި މުދަލާއި ފުރާނައަށް ގެއްލުން ލިބުމަށް މަގުފަހިވާފަދަ ކުށްތައް މަނާކުރުމާއި، އިސްލާމް ދީނުގެ ދައުވަތު ފެތުރުމާއި ހެޔޮކަންކަމަށް ގޮވާލުމާއި ނުބައިކަންކަން ނަހީކުރުމުގެ މަތިވެރި ވާޖިބަށް ހުރަސްއެޅިދާފަދަ މާއްދާތައް އިސްލާހު ކުރުމާއި، އިސްލާމްދީނާ ދެކޮޅަށް ހިންގޭ ނަފުރަތުގެ އަމަލުތައް އެބިލުގައި ހިމެނުން ކަމަށް މިނިސްޓްރީން ބުނެއެވެ.
އަދި މާތްވެގެންވާ އިސްލާމްދީނަށް ފުރައްސާރަކޮށް އިސްލާމްދީނާ ދެކޮޅަށް ހިންގޭ ނަފުރަތުގެ އަމަލުތައް އިތުރުވަމުންދާ ދުވަސްވަރެއްގައި ނަފުރަތުގެ ކުށް ބަޔާންކޮށް ގާނޫނެއް ވުޖޫދު ކުރެވޭހިނދު އިސްލާމްދީނާ ދެކޮޅަށް ހިންގޭ ނަފުރަތުގެ އަމަލުތައް އެ ގާނޫނުގައި ހިމެނުމަކީ މުހިއްމު ކަމެއް ކަމަށް ވެސް ބަޔާންކޮށްފައިވެއެވެ.
މިނިސްޓްރީން ބުނީ އިސްލާމްދީނާއި މުސްލިމުންނާ ދެކޮޅަށް ނުވަތަ އިންސާނިއްޔަތާ ދެކޮޅަށް ބައެއް ގައުމުތަކުން ނުވަތަ ޖަމާއަތްތަކުން ޖަރީމާތައް ހިންގާ ހިނދު އެކަމާދެކޮޅަށް މުސްލިމުންނާއި ޣައިރު މުސްލިމުން ވެސް ހިމެނޭގޮތަށް ހިންގާ ސުލްހަވެރި ބައިނަލްއަގުވާމީ ގޮތުން ވެސް ބަލައިގަނެވޭ ކަންކަން ކަމުގައި ވާތީ އެފަދަކަންކަން ޖިނާއީ ކުށެއްގެ ގޮތުގައި މާނަ ކުރެވިދާނެތީ އެފަދަ ބައެއް ލަފުޒުތަކަށް ވެސް މިނިސްޓްރީގެ ރައުޔުގައި ރިއާޔަތް ކުރިކަމަށެވެ.
އިސްލާމިކް މިނިސްޓްރީން އިތުރަށް ބުނީ އިސްލާމް ދީނާ ގުޅުންހުރި މިފަދަ މުހިންމު ބިލެއް ފާސްކޮށް ގާނޫނަކަށް ވުމުގެކުރިން މަޖިލީހުން މިނިސްޓްރީގެ ރައުޔު އޮޅުންފިލުއްވުމަކީ ރަނގަޅު ކަމެއް ކަމަށާއި މި ބިލު ގާނޫނަކަށް ވެގެން އަންނައިރު ރާއްޖޭގެ ދީނީ އިލްމުވެރިންގެ ލަފާފުޅަށް މިނިސްޓްރީން ހުށަހެޅި ހުރިހާ އިސްލާހުތައް އޭގައި ހިމަނާނެކަމަށް ޔަގީން ކުރާކަމަށެވެ.
