ދިވެހިރާއްޖެ މުސްތަގިއްލު ގައުމެއްގެ ގޮތުގައި ދެމިއޮތުމުގެ އަސްލަކީ އިސްލާމްދީން: ރައީސް މައުމޫން
20 ޑިސެމްބަރު 2017 | ބުދަ 05:04ރާއްޖެ އިސްލާމްވީ ދުވަސް ރަސްމީ ގޮތުން ފާހަގަ ކުރަން ފަށާފައިވަނީ އައްސުލްޠާން މުޙައްމަދު ފަރީދުލްޢައްވަލްގެ ރަސްކަމުގައި
ރައީސް މައުމޫން އަބްދުލް ގައްޔޫމް
ރާއްޖެ އިސްލާމްވި ދުވަސް ފާހަގަ ކުރަމުންދާއިރު ހަނދާން ކުރަންވީ، ދިވެހިރާއްޖެ، މިނިވަން މުސްތަޤިއްލު ޤައުމެއްގެ ގޮތުގައި މިއަދާ ހަމައަށްވެސް ދެމިއޮތުމުގެ އަސްލަކީ، މާތްވެގެންވާ އިސްލާމްދީން ކަމަށް ކުރީގެ ރައީސުލްޖުމްހޫރީއްޔާ މައުމޫން އަބްދުލް ގައްޔޫމް ވިދާޅުވެއްޖެއެވެ.
ރާއްޖެ އިސްލާމްވި ދުވަހާ ގުޅިގެން ރައީސް މައުމޫން ނެރުއްވި ބަޔާނުގައި ވިދާޅުވެފައި ވަނީ ދިވެހީންނަށް ލިބިފައިވާ އެންމެ ބޮޑު ނިޢުމަތަކީ އިސްލާމްދީނުގެ ހިދާޔަތުކަމާއި އަދި ދިވެހި ޤައުމިއްޔަތު ބިނާވެފައި ވަނީ އިސްލާމްދީނުގެ މަތިވެރި އުސޫލުތަކުގެ މައްޗަށް ކަމެވެ. ރާއްޖޭގެ ރައްޔިތުންގެ މެދުގައި ޒަމާނުއްސުރެ އުފެދިފައިވާ އަޚުވަންތަކަމުގެ ގުޅުމުގެ ރަމްޒަކީ، އިސްލާމްދީން ކަމަށް ރައީސް މައުމޫންގެ ބަޔާނުގައި ވިދާޅުވެފައިވެއެވެ.
ރާއްޖޭގެ ރައްޔިތުންގެ މެދުގައި މިއޮތް އަޚުވަންތަކަމުގެ ގުޅުމުގެ ރޫޙު ވަރުގަދަކޮށް، އިސްލާމްދީން ނޫން އެހެން ދީންތަކަށް މި ދިވެހި ފަސްގަނޑުން ޖާގަ ހޯދުމަށް އެކިއެކި ފަރާތްތަކުން ކުރަމުންދާ މަސައްކަތާމެދު ހޭލުންތެރިވެތިބެ، އެކަމާ ދެކޮޅަށް އަބަދުވެސް އެންމެން ގުޅިގެން މަސައްކަތް ކުރެއްވުމަށް ރައީސް މައުމޫން ވަނީ ގޮވައިލައްވާފައެވެ.
އެމަނިކުފާން ވިދާޅުވީ ރާއްޖެ އިސްލާމްވީ ދުވަހަކީ ހިޖުރައިން 548 ވަނަ އަހަރު ކަމުގައިވިޔަސް، މިދުވަސް ރަސްމީ ގޮތުން ފާހަގަކުރަން ފަށާފައިވަނީ އައްސުލްޠާން މުޙައްމަދު ފަރީދުލްޢައްވަލްގެ ރަސްކަމުގައި ހިޖުރައިން 1374 ވަނަ އަހަރު ކަމަށެވެ. އަދި އެއަށްފަހު މިދުވަސް ފާހަގަ ކުރުން ސަރުކާރުން ހުއްޓާލުމަށް ފަހު، 33 އަހަރު ފަހުން އަލުން ފާހަގަކުރަން ފަށާފައިވަނީ، ރައީސް މައުމޫންގެ ވެރިކަމުގެ ފަސް ވަނަ ދައުރުގަ އެވެ.
ރައީސް މައުމޫން ވިދާޅުވި ގޮތުގައި އެދުވަސްވަރަކީ ރާއްޖޭގައި ނަޞާރާ ދީން ފެތުރުމަށާއި، އަދި ނުސީދާ ގޮތަކަށް ފިކުރީ ހަނގުރާމައެއްގެ ސިފައިގައި، ރާއްޖޭގައި ޒަމާނުއްސުރެ އޮތް އިސްލާމީ ވަޙްދަތު ފުނޑުފުނޑު ކޮށްލުމަށް ބަޔަކު މަސައްކަތް ކުރަމުން ދިޔަ ދުވަސްވަރެކެވެ. އެގޮތުން ރާއްޖެ އިސްލާމްވި ދުވަސް ދައުލަތުން ރަސްމީކޮށް ފާހަގަ ކުރަންފެށީ، ރާއްޖެއަކީ ސައްތައިން ސައްތަ އިސްލާމީ ޤައުމަކަށް ވެފައި، ދިވެހީންގެ ހިތްތަކުގައި އިސްލާމްދީނަށް އޮތް ލޯބި އިތުރުކޮށް، އެ ދުވަސްވަރު ރާއްޖޭއަށް އަންނަން ފަށާފައިވާ އެކި ދީންތަކުގެ ފިކުރާއި ވިސްނުމުން ރާއްޖޭގެ ރައްޔިތުން ދުރުހެލިކޮށް އަދި މިޤައުމުގައި އޮތް ދީނީ ވަޙުދަތާއި ދީނީ އެއްބައިވަންތަކަން ޙިމާޔަތްކޮށް ދެމެހެއްޓުމުގެ މާތް މަޤްޞަދުގައި ކަމަށް ވެސް ރައީސް މައުމޫން ވިދާޅުވެފައިވެއެވެ.
