އެފްއޭއެމް އިން އިންތިޒާމުކޮށްގެން ބާއްވާ މިނިވަން ޗެމްޕިއަންޝިޕްގައި ސ.މަރަދޫ ފޭދޫ ކޮޅަށް ސ.ހިތަދޫ އިން ލަނޑު ގޯންޏެއް އޮއްސާލައިފިއެވެ.

އާދީއްތަ ދުވަހު ހަވީރު ކުޅުނު މި މެޗު މަރަދޫފޭދޫއާ ވާދަކޮށް ހިތަދޫން މެޗު ކާމިޔާބުކުރީ 0-9 ގެ ތަފާތުބޮޑު ނަތީޖާއަކުންނެވެ.

ސ.މީދޫ ފުޓުބޯޅަ ދަނޑުގައި ކުޅުނު މި މެޗު ފެށިގެން 8 ވަނަ މިނެޓުގައި ހިތަދޫން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ މިރާހް މުޙައްމަދެވެ. ހިތަދޫން މެޗުގެ ލީޑު ފުޅާކުރީ 15 ވަނަ މިނެޓުގައި މުޙައްމަދު އިންޝާލް ކާމިޔާބުކުރި ލަނޑުންނެވެ.

ހިތަދޫން ކާމިޔާބުކުރި ތިންވަނަ ލަނޑު 21 ވަނަ މިނެޓުގައި އިންޝާލް ކާމިޔާބުކުއިރު، ފަސްވަނަ ލަނޑު 33 ވަނަ މިނެޓުގައި ކާމިޔާބުކޮށްދިނީ މިރާހެވެ. މި ލަނޑުތަކާއެކު ފުރަތަމަ ހާފް ނިމުނީ 0-5 ގެ ތަފާތުބޮޑު ނަތީޖާއަކުން މަރަދޫފޭދޫގެ މައްޗަށް ހިތަދޫ ކުރީގައި އޮވެގެންނެވެ.

ދެވަނަ ހާފް ފެށީގެން މަރަދޫ ފޭދޫން އެޓީމުގެ ކުޅުން ރަނގަޅުކުރިއިރު، ލަނޑު ޖަހަންވެސް އެޓީމުން ވަނީ ފުރުސަތުތައް ތަނަވަސްކޮށްފައެވެ. މިގޮތަށް ކުޅެމުންދަނިކޮށް، މެޗުގެ 71 ވަނަ މިނެޓުގައި ހިތަދޫ ޓީމުން ވަނީ ހަވަނަ ލަނޑު ކާމިޔާބުކޮށްފައެވެ. މި ލަނޑަކީ މަރަދޫ ފޭދޫގެ އަބްދުﷲ ޝިފާޒް އަތުން ބައިކޮޅަށް ވަތް ލަނޑެކެވެ.

އޭގެ ހަތަރު މިނެޓު ފަހުން މިރާހް ވަނީ ލަނޑެއް ކާމިޔާބުކޮށް އޭނާގެ ހެޓްރިކް ފުރިހަމަކޮށްފައެވެ. މެޗުގައި ހިތަދޫ އިން ޖެހި 8 ވަނަ ލަނޑު އަދި ނުވަ ވަނަ ލަނޑު އެޓީމަށް ކާމިޔާބުކޮށްދިނީ ބަދަލުކުޅުންތެރިޔާ މުޙައްމަދު ސިޔާމެވެ.

މެޗުގެ މޮޅު ކުޅުންތެރިޔަކަށް ހޮވިފައިވަނީ ހެޓްރިކް ފުރިހަމަކުރި މިރާހް މުހައްމަދެވެ.