ބޭނުންވަނީ ޔޫރޯގެ ފައިނަލް މެޗު އިޓަލީގައި ބާއްވަން: އިޓަލީގެ ބޮޑުވަޒީރު

އިންގްލެންޑުގައި ކޮވިޑް-19ގެ ކޭސްތައް އިންތިހާއަށް އިތުރުވަމުންދާއިރު އެ ގައުމުގައި ޔޫރަޕިއަން ފުޓްބޯލް ޗެމްޕިއަންޝިޕް (ޔޫރޯ 2020) ގެ ފައިނަލް މެޗު ބާއްވަން ބޭނުން ނުވާ ކަމަށާއި، އިޓަލީގައި ފައިނަލް މެޗު ބޭއްވުންމާ ބުއްދިވެރިކަމަށް އިޓަލީގެ ބޮޑުވަޒީރު މާރިއޯ ޑްރަގީ ވިދާޅުވެއްޖެއެވެ.

ޖަރުމަނުގެ ބަރލިންގައި ކުރިއަށްދިޔަ ނޫސްވެރިންގެ ބައްދަލުވުމުގައި ކުރިމަތިކުރުވި ސުވާލަކަށް ޖަވާބުދެއްވަމުން އިޓަލީގެ ބޮޑުވަޒީރު މާރިއޯ ވަނީ ކޮވިޑް-19ގެ ކޭސްތައް އިންތިހާއަށް ގިނަ ގައުމެއްގައި ޔޫރޯގެ ފައިނަލް މެޗު ބާއްވަން އުޅޭނަމަ އެކަން ހުއްޓުވަން މަސައްކަތްކުރާނެ ކަމަށް ވިދާޅުވެފައެވެ.

އިންގްލެންޑުން ކޮވިޑް-19 ގެ 10،000ށް ވުރެ ގިނަ ކޭސް 24 ގަޑިއިރުގެ ތެރޭގައި ފެންނަމުންދާއިރު، އިޓަލީން 24 ގަޑިއިރުގެ ތެރޭގައި ފެންނަ ކޭސްތަކުގެ އަދަދު އެއް ހާހަށްވެސް ނާރައެވެ.

އިންގްލެންޑުގެ ވެރިރަށް ކަމަށްވާ ލަންޑަނުގެ ވެމްބްލީ ސްޓޭޑިއަމްގައި ޔޫރޯގެ ފައިނަލް މެޗު ކުޅުމަށް ރާވާފައިވާއިރު، އެ ގައުމުގެ ކޮވިޑް-19ގެ ހާލަތަށް ބަލައި ޔުއެފާއިން "ޕްލޭން ބީ" އެއް ގެންގުޅުމަކީ ބުއްދިވެރިކަމެއް ކަމަށް މާހިރުން ބުނާއިރު، ޔޫރޯގެ މެޗުތައް ޔޫރަޕުގެ އެގާރަ ގައުމެއްގެ އެގާރަ ސްޓޭޑިއަމެއްގައި ކުޅެވެމުންދާއިރު، ބައެއް ގައުމުތަކުން ވަނީ ކޮވިޑުގެ ގަވާއިދުތަކަށް ބޮޑެތި ލުއިތަކެއް ދީފައެވެ. އިންގްލެންޑުން ލުއިތަށް ނުދެންޏާ ވެމްބްލީ ސްޓޭޑިއަމުގެ ބަދަލުގައި ސެމީފައިނަލާއި ފައިނަލް ހަންގޭރީގެ ބުޑަޕެސްޓުގައި ކުޅޭގޮތަށް ހަމަޖައްސަން ޖެހިދާނެ ކަމަށް ޔުއެފާއިން މީގެ ކުރިން ވަނީ ބުނެފައެވެ. ޔުއެފާގެ މި އިންޒާރާ ގުޅިގެން އިނގިރޭސި ސަރުކާރާއި އިނގިރޭސި ފުޓްބޯޅަ އެސޯސިއޭޝަނާއި ލަންޑަނުގެ ސިޓީ ކައުންސިލަރުން އެއްތަންވެ މިހާރު ދަނީ މަޝްވަރާ ކުރަމުންނެވެ.

އިންގްލެންޑުގައި މިހާރު އަމަލުކުރަމުން އަންނަ އުސޫލުތަކުގެ ދަށުން ރީނދޫ ލިސްޓާއި ރަތް ލިސްޓުގައިވާ ގައުމުތަކުގެ މީހުން އިންގްލެންޑަށް އެތެރެވަންޏާ ދިހަ ދުވަހުގެ މުއްދަތަށް ކަރަންޓީނުވާން ޖެހެއެވެ. ޔޫރޯގައި މިފަހަރު ކުޅޭ 24 ގައުމުގެ ތެރެއިން ތުރުކީ ފިޔަވައި އެހެން ހުރިހާ ގައުމެއް ހިމެނެނީ އިންގްލެންޑުން ހަދާފައިވާ ރީނދޫ ލިސްޓުގައެވެ. ތުރުކީ އޮތީ ރަތް ލިސްޓުގައެވެ.