އެމްޑީޕީން އެދެނީ އިސްލާހުތައް ފާސްކޮށް، ދީނާ ގުޅުވައިގެން ނަފްރަތު އުފެއްދުމުގެ އަމަލުތަކަށް ނިމުމެއް އައުން
އަމިއްލަ ނަފްސުގެ ރައްކާތެރިކަން އޮތް ތަނެއްގެ ގޮތުގައި ރާއްޖެ ބިނާކުރުމަކީ އެމްޑީޕީގެ އެންމެ އިސް އެއް އަމާޒު
އެމްޑީޕީގެ ގައުމީ ހިންގާ ކޮމިޓީގެ ބައްދަލުވުމެއްގެ ތެރެއިން
މޯލްޑިވިއަން ޑިމޮކްރަޓިކް ޕާޓީގެ އެދުމަކީ ޤާނޫނުލްއުޤޫބާތަށް އިސްލާހުގެނައުމުގެ ބިލު ވީހާވެސް އަވަހަކަށް ރައްޔިތުންގެ މަޖިލީހުން ފާސްކޮށް، ދީނާއި ގުޅުވައިގެން މުޖުތަމައުގައި ވަކިވަކި ފަރުދުންނާމެދު ނަފްރަތު އުފެއްދުމުގެ އަމަލުތަކަށް ނިމުމެއް އައުން ކަމަށް އެޕާޓީން ބުނެފިއެވެ.
ޤާނޫނުލްއުޤޫބާތުގެ ބިލާ ގުޅޭގޮތުން އެމްޑީޕީން ނެރެފައިވާ ބަޔާނެއްގައި އެޕާޓީން ބުނެފައި ވަނީ ކޮންމެ ރައްޔިތަކަށް ވެސް، އަމިއްލަ ނަފްސުގެ ރައްކާތެރިކަން އޮތް ތަނެއްގެ ގޮތުގައި ރާއްޖެ ބިނާކުރުމަކީ އެމްޑީޕީގެ އެންމެ އިސް އެއް އަމާޒު ކަމަށާއި ޤާނޫނުލްއުޤޫބާތުގެ ބިލު ވީހާވެސް އަވަކަށް ފާސްކޮށް، ދީނާ ގުޅުވައިގެން މުޖުތަމައުގައި ނަފްރަތު އުފެއްދުމުގެ އަމަލުތަކަށް ނިމުމެއް އައުމަށް އެޕާޓީން އެދޭކަމަށެވެ.
ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހަޅާފައިވާ ދިވެހިރާއްޖޭގެ ޤާނޫނުލްއުޤޫބާތަށް އިސްލާހު ގެނައުމުގެ ބިލު، ހުށަހަޅާފައިވަނީ ދީން ހަތިޔާރަކަށް ބޭނުންކޮށްގެން، މުސްލިމުންގެ ބޮލުގައި ދީނާއި ގުޅުވައި ތަފާތު ލޭބަލްތައް އަޅުވައި، މުޖުތަމައުގައި ވަކިވަކި ފަރުދުންނާމެދު ނަފްރަތު އުފައްދައި، އާޚިރު ނަތީޖާއެއްގެ ގޮތުން، އެމީހުންގެ ލޭ ހުއްދަކަމަށް ބަޔަކަށް ޤަބޫލުކުރެވި، އެމީހުން މަރައި އަދި، ގެއްލުވާލުމުގެ ހާދިސާތަކެއް ރާއްޖޭގައި ހިނގާފައިވާތީ، ނަފްރަތުގެ އަމަލުތަކަކީ ޖިނާއީ ކުށެއްގެ ގޮތުގައި ކަނޑައެޅުމުގެ ބޭނުމުގައިކަމަށް އެމްޑީޕީން ބުނެއެވެ. އަދި މި ބިލު ފާސްކުރުމަކީ ރާއްޖޭގެ ޤާނޫނު އަސާސީއިން ކޮންމެ ފަރުދަކަށް ވެސް ލިބިގެންވާ ނަފްސު ރައްކާތެރިކުރުމާއި، ދިރިހުރުމުގެ ހައްޤު ކަށަވަރުކުރުމަށް މުހިއްމު ކަމެއްކަމަށް އެމްޑީޕީން ބުނެއެވެ.
ނަމަވެސް، މި ބިލު ރައްޔިތުންގެ މަޖިލީހަށް ފޮނުވި ހިސާބުން ފެށިގެން މި ބިލާ މެދު ރައްޔިތުންގެ ހިތްތަކުގައި ނުބައި ޝުއޫރުތަކެއް އުފައްދައި، މި ބިލަކީ ދީނާ ޚިލާފު ބިލެއްކަމަށް ރައްޔިތުންނަށް ވިސްނައިދޭން ބަޔަކު މީހުން މަސައްކަތްކުރާ ކަމަށާއި، އެކަމަކީ ނުރައްކާތެރި މަސައްކަތެއް ކަމަށާއި، އެ މަސައްކަތް އެމްޑީޕީން ހަރުއަޑުން ކުށްވެރިކުރާކަމަށް އެ ޕާޓީގެ ބަޔާނުގައި ވަނީ ބުނެފައެވެ. އެމްޑީޕީން ވަނީ މި ބިލަށް ތާއީދުކޮށް ރައްޔިތުންގެ ތެރެއިން ވަރަށް ގިނަ ބަޔަކު ޕެޓިޝަނެއްގައި ސޮއިކުރަމުންދާ މި ދަނޑިވަޅުގައި، މި ބިލާ ދެކޮޅަށް ޕެޓިޝަނެއް ހަދައި، އެ ޕެޓިޝަނަށް ނެތް ތާއީދެއް އޮތްކަމަށް ދެއްކުމަށް ހީލަތްތެރި އުކުޅުތައް ބޭނުންކުރާކަމީ ޕާޓީއިން ކަންބޮޑުވާ ކަމެއްކަމަށް ބުނެފައެވެ.
އެމްޑީޕީން މިގޮތަށް އެދިފައިވާއިރު، މި ބިލާމެދު އާންމުން ދަނީ އެކި ގޮތްގޮތަށް ވާހަކަ ދައްކަމުންނެވެ. އަދި ބިލު އިތުރަށް ދިރާސާކުރުމަށް ޖުޑީޝަރީ ކޮމިޓީއަށް ފޮނުވާފައިވާއިރު، ބިލުގައި ރަނގަޅު ކަންކަން ހުރިކަމަށް ދީނީ އިލްމުވެރިން ވަނީ އިއްތިފާގުވެފައެވެ. އެގޮތުން އައްޑޫސިޓީގެ ހިތަދޫގެ ޖަމުޢިއްޔާއެއް ކަމަށްވާ ޖަމްއިއްޔަތުލް އުލަމާއިން ވަނީ މި ބިލަކީ މިވަގުތު ދިވެހި އުއްމަތަށް ވަރަށް މުހިންމު ބިލެއް ކަމަށް ބުނެފައެވެ. އަދި މައިގަނޑު ގޮތެއްގައި މި ބިލަކީ ރަނގަޅު ބިލެއް ކަމަށާއި ބިލުގައިވާ ދެ ނަންބަރަކަށް ކުޑަ އިސްލާހެއް ގެންނަން ޖެހޭ ކަމަށް ފެންނަ ކަމަށް އެ ޖަމިއްޔާ އިން ވަނީ ބުނެފައެވެ. އަދި ޖުޑިޝަރީ ކޮމެޓީއާ އެކަން ހިއްސާ ކުރާނެ ކަމަށް ވެސް ވަނީ ބުނެފައެވެ.
މަޖިލީހަށް ހުށަހެޅުނު އިސްލާހުގެ ބިލުގައި ވަނީ އާންމު ތަނެއްގައި މީހަކު އިސްލާމްދީނާ ޚިލާފު ނުވަތަ އިސްލާމް ދީނާ ދެކޮޅު މީހެއްކަމަށް ތުހުމަތު ކުރުމާއި، މީހަކާމެދު ނަފްރަތު އުފެއްދުމާއި، މުސްލިމަކު ކާފަރެއްގެ ގޮތުގައި ތުހުމަތު ކުރުން އެއީ ކުށެއް ކަމަށެވެ. މިއީ ޖުނަހުގެ އެއްވަނަ ދަރަޖައިގެ ކުށެއް ކަމަށް އިސްލާހުގައި ބުނެފައިވެއެވެ. އެދަރަޖައިގެ ކުށަކަށް ދެވޭ އެންމެ ބޮޑު އަދަބެއް ކަމަށް ގާނޫނުލްއުގޫބާތުގައި ބަޔާން ކޮށްފައިވަނީ 1 އަހަރުގެ ޖަލު ހުކުމެކެވެ.
މިފަދަ އަމަލެއް ހިންގުމާއެކު، އަނިޔާވެރިކަމަށް ގޮވާލައި އެކަމަށް ހިތްވަރު ދިނުމާއި، ބައިވެރިވުމަކީ ވެސް ކުށެއް ކަމަށާއި، މީހެއްގެ ސިޔާސީ ފިކުރަކަށް ބަލައި ޖިސްމާނީ އަނިޔާއެއް ދިނުމާއި، ބައިވެރިވުމާއި، ރޭވުމަކީ ވެސް ކުށެއް ކަމަށް އިސްލާހުގައި ވެއެވެ. މިފަދަ އަމަލުތަކަކީ ޖިނާއަތުގެ 4 އަދި 5 ވަނަ ދަރަޖައިގެ ކުށެއް ކަމަށް ވެއެވެ. މިފަދަ މައްސަލައެއް އެމީހެއްގެ މައްޗަށް ސާބިތު ވެއްޖެނަމަ 2 އަހަރާ 4 އަހަރާ ދެމެދުގެ ހުކުމެއް އަންނާނެއެވެ.
މީހެއްގެ ނަސްލާއި، އުފަންވީ ގައުމާއި، ކުލައަށް ބަލައިގެން ޖިސްމާނީ އަނިޔާއެއް ދިނުމާއި އެފަދަ ކަމެއް ރޭވުމާއި، އެމީހަކަށް ތަފާތުކުރުން ނުވަތަ އެމީހަކާ މެދު ތަފާތުކުރުމަށް ގޮވާލުމަކީ ވެސް ކުށެކެވެ. މިފަދަ އަމަލެއް ހިންގުމުގައި މީހަކު މަރުވެއްޖެނަމަ އެ ކުށަކީ، ޖިނާއަތުގެ އެއްވަނަ ދަރަޖައިގެ ކުށެއް ކަމަށް އިސްލާހުގައި ވެއެވެ. އެ މީހަކަށް މަރުގެ އަދަބު ނޫނީ އުމުރަށް ޖަލަށް ލުމަށް ހުކުމް ކުރެވޭނެއެވެ.
މިފަދަ އަމަލެއް ހިންގީ ކިޑްނެޕްކޮށްގެން، ނުވަތަ ޖިސްމާނީ އަނިޔާއެއް ދީގެން، ނުވަތަ މަރުގެ އިންޒާރު ދީގެން ކަމުގައިވާނަމަ އެއީ 2 ވަނަ ދަރަޖައިގެ ކުށެކެވެ. އެފަދަ މައްސަލައެއް ސާބިތު ވެއްޖެ ނަމަ 15 އަހަރަށް ޖަލަށް ލެވޭނެއެވެ. އެނޫން ހާލަތްތަކުގައި މިބާވަތުގެ ކުށަކީ ޖިނާއަތުގެ 4 ވަނަ ދަރަޖައިގެ ކުށެއް ކަމަށް އިސްލާހުގައިވެއެވެ.
