ޔޫރޯ 2020 - ފިންލެންޑާއި ބެލްޖިއަމުގެ ކުރިމަތިލުން
21 ޖޫން 2021 | ހޯމަ 10:53މެޗުން މޮޅުވެ ފިންލެންޑަށް ދެވަނަ ބުރުގެ ޖާގައެއް ހޯދޭނޭ
ފިންލެންޑް މެޗުގެ ކުރިން ބެލްޖިއަމުން ކުރިއަށްގެންދިޔަ ތަމްރީނުތަކުގެ ތެރެއިން
ޔޫރޯ 2020 ގެ ގްރޫޕް ބީ ގައި ހޯމަ ދުވަހުގެރޭ ފިންލެންޑާއި ބެލްޖިއަމް ބައްދަލުކުރާއިރު، ބެލްޖިއަމް ވަނީ މީގެ ކުރިން ދެވަނަ ބުރުގެ ޖާގައެއް ކަށަވަރުކޮށްފައެވެ. ސެއިންޓް ފީޓަސްބާގުގެ ކްރެސްޓޮވްސްކީ ސްޓޭޑިއަމުގައި ކުޅޭ މެޗަށް ދެ ޓީމުން ތައްޔާރުވެފައިވާއިރު، މި މެޗު ބެލްޖިއަމަށް މުހިންމު ވަނީ ސައްތައިން ސައްތަ ރިކޯޑަކާއެކު ދެވަނަ ބުރަށް ދިޔުމަށެވެ. އަނެއްކޮޅުން ފިންލެންޑަށް މި މެޗު މުހިންމު ވަނީ މެޗުން މޮޅުވެ އެ ޓީމަށް މުޅިން އަލަށް ދެވަނަ ބުރުން ޖާގަ ހޯދުމުގެ ފުރުސަތު އޮތުމުންނެވެ.
ކޮންމެ ޓީމަކުންވެސް މިހާތަނަށް ޔޫރޯގައި ދެ މެޗު ކުޅެފައިވާއިރު، ފުރަތަމަ މެޗުން ބެލްޖިއަމް ވަނީ ރަޝިއާ އަތުން 3-0 ގެ ނަތީޖާއަކުން މޮޅުވެފައެވެ. އަދި ދެވަނަ މެޗުން ޑެންމާކް އަތުން ބެލްޖިއަމް މޮޅުވީ 2-1 ގެ ނަތީޖާއަކުންނެވެ. ޔޫރޯގައި ކުޅުނު ފުރަތަމަ މެޗުން ޑެންމާކް އަތުން 1-0 ގެ ނަތީޖާއަކުން ފިންލެންޑް މޮޅުވި ނަމަވެސް، ދެވަނަ މެޗުގައި ރަޝިއާ އަތުން ފިންލެންޑް ވަނީ 1-0 ގެ ނަތީޖާއަކުން ބަލިވެފައެވެ.
މި ގްރޫޕަށް ބަލާލާއިރު ކުޅުނު ދެ މެޗު ކާމިޔާބުކޮށް އެއްވަނައިގައި އޮތް ބެލްޖިއަމުން ހަ ޕޮއިންޓް ހޯދާފައިވާއިރު، ދެވަނައިގައި އޮތް ރަޝިއާ އާއި ތިންވަނައިގައި އޮތް ފިންލެންޑަށް ދެ މެޗުން ވަނީ ތިން ޕޮއިންޓް ލިބިފައެވެ. އަދި ގްރޫޕްގެ ފުލުގައި އޮތް ޑެންމާކަށް މިހާތަނަށް ޕޮއިންޓެއް ލިބިފައެއް ނުވެއެވެ.
ކޮންމެ ގްރޫޕަކުންވެސް އެންމެ މޮޅު ދެ ޓީމު ދެވަނަ ބުރަށް ދަތުރުކުރާއިރު، ދެވަނަ ބުރުގެ ޖާގައެއް ދެން ލިބޭނީ ތިންވަނައިގައި ނިންމާ ހަ ޓީމުގެ ތެރެއިން އެންމެ ރަނގަޅު ހަތަރު ޓީމަށެވެ.
ފިންލެންޑް މެޗުގެ ކުރިން ވާހަކަދައްކަމުން ބެލްޖިއަމުގެ ކޯޗު ރޮބާޓޯ މާޓިނޭޒް ބުނީ ފިންލެންޑުން މި މުބާރާތުގައި މިހާތަނަށް ކުޅުނު މެޗުތަކުގައި ތަފާތު މޮޅު ކުޅުމެއް ދައްކާފައިވާ ކަމަށާއި، ހާއްސަކޮށް ކައުންޓަ އެޓޭކުތަކުގައި ފިންލެންޑުން ތަފާތު ދައްކަމުން އަންނަ ކަމަށެވެ. އެހެންކަމުން ފިންލެންޑަށް ވަރަށް ބޮޑަށް ސަމާލުވާން ޖެހޭ ކަމަށާއި، މި މެޗު ފަސޭހަ ކޮށްލައިފިނަމަ ލަނޑު ލިބުމުގެ ފުރުސަތު އެބައޮތް ކަމަށްވެސް މާޓިނޭޒް ބުންޏެވެ.
ފިންލެންޑްގެ ކޯޗު މާކިން ކެނޭވާ ބުނީ މި މެޗަށް ފިންލެންޑުން ނުކުންނަނީ ތާރީޚު ބަދަލުކޮށް، މުޅިން އަލަށް ދެވަނަ ބުރު ކުޅުމުގެ އަޒުމުގައި ކަމަށެވެ. އަދި މި މެޗުން މޮޅުވެ ދެވަނަ ބުރުގެ ޖާގަ އެއް ހޯދުމަށް އޭނާގެ ޓީމުން ތައްޔާރަށް އޮތް ކަމަށާއި، އެކަމަކު ބެލްޖިއަމަކީ މި ގްރޫޕްގައި އޮތް އެންމެ ވަރުގަދަ ޓީމު ކަމަށެވެ. އެހެންކަމުން އެ ޓީމު ބަލިކުރަން އުނދަގޫވާނެ ކަމަށްވެސް ކެނޭވާ ބުންޏެވެ.
ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާ ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.
މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސެއިން ފަރިޔާޒެވެ. ފަރިޔާޒާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ބީ ގެ އެނަލިސްޓް މުޙައްމަދު ނިޒާމް (ނިޒާމްބެ) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން ސޮބާހު މުޙައްމަދު (ސޮބާ) ބައިވެރިވެވަޑައިގަންނަވާނެއެވެ.
ފިންލެންޑާއި ބެލްޖިއަމް ބައްދަލުކުރާ މެޗު ފަށާނީ ހޯމަ ދުވަހުގެރޭ ރާއްޖެ ގަޑިން ދަންވަރު 00:00 ގައެވެ.
