178 ކައުންސިލަކަށް އެސްޖީން ހޯދަން އިއުލާންކޮށްފި
21 ޖޫން 2021 | ހޯމަ 06:39މަގާމަށް ކުރިމަތިލުމަށް ސީއެސް ވިއުގަ އޮންލައިން ޕޯޓަލްގެ "އީ-ފާސް" އެކައުންޓެއް އޮންނަންވާނެ
މަގާމަށް މީހަކު ހޮވުމަށް ބޭއްވޭ އިންޓަވިއު، އިމްތިހާނު އަދި ޕްރެޒެންޓޭޝަން ހުށަހެޅުން އޮންނާނީ، ޖުލައި 11ން އޮގަސްޓް މަހުގެ އަށަކާދެމެދު
178 ކައުންސިލަކަށް ކައުންސިލްތަކުގެ އެންމެ އިސް އިދާރީ މުވައްޒަފުންގެ ގޮތުގައި ތިއްބެވުމަށް ހަމަޖެހިފައިވާ ސެކްރެޓަރީ ޖެނެރަލް (އެސްޖީ)ން ހޯދުމަށް ސިވިލް ސަރވިސް ކޮމިޝަނުން އިއުލާނު ކޮށްފިއެވެ.
ފުރިހަމަ ލާމަރުކަޒީ ނިޒާމަކަށް ގައުމު ހިންގުމަކީ މި ސަރުކާރުގެ ވައުދަކަށް ވާއިރު، ލާމަރުކަޒީ ގާނޫނަށް ގެނައި އިސްލާހާ އެކު ކައުންސިލްތަކުގެ ޒިންމާތައް ބޮޑުކޮށް ގިނަ ބާރުތަކެއް ދީ، އައު ކައުންސިލްތައް އިންތިޚާބުކޮށްފައިވާއިރު އެސްޖީގެ މަގާމަށް ކުރިމަތިލުމަށް މެނޭޖްމަންޓް، އެޑްމިނިސްޓްރޭޝަން، ގަވަރނަންސް، އަރބަން ސްޓަޑީސް، ސޯޝަލް ސައިންސް ނުވަތަ ކޮމިއުނިޓީ ޑިވެލޮޕްމަންޓްގެ ދާއިރާއިން ދިވެހިރާއްޖޭގެ ގައުމީ ސަނަދުތަކުގެ އޮނިގަނޑުން ދަށްވެގެން ލެވެލް 7 ގެ ސަނަދެއް ހާސިލްކޮށްވައިވާ މީހަކަށް ވާންޖެހޭނެއެވެ.
މިކަން ފުރިހަމަ ވުމާއެކު ސަރުކާރުގައި، ނުވަތަ ޕަބްލިކް ނުވަތަ ޕްރައިވެޓް ސެކްޓަރގައި، ނުވަތަ ގައުމީ ނުވަތަ ބައިނަލްއަގްވާމީ ޖަމުޢިއްޔާ ނުވަތަ ޖަމާއާތެއްގައި މަދުވެގެން 3 އަހަރު ދުވަހު މަސައްކަތްކޮށް، ސެކްރެޓަރީ ޖެނެރަލްގެ މަގާމަށް ކަނޑައަޅާފައިވާ މަގާމުގެ މަސައްކަތާގުޅޭ ތަޖުރިބާ ލިބިފައިވާ މީހަކަށް ވާންޖެހޭނެއެވެ.
އެސްޖީގެ މަގާމުގައި ހުންނަވާ ބޭފުޅެއްގެ މައިގަނޑު މަސްއޫލިއްޔަތުތަކަކީ ދިވެހި ސިވިލް ސަރވިސްގެ ގަވާއިދު 2014 ގެ ދަށުން ކައުންސިލް އިދާރާތަކުގެ އެންމެ އިސް އިދާރީ މުވައްޒަފުގެ ހައިސިއްޔަތުން އަދާކުރަންޖެހޭ ޒިންމާތައް އަދާކުރުމާއި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 126 ވަނަ މާއްދާގެ (ށ) ގައި ބަޔާންކޮށްފައިވާ މަސްއޫލިއްޔަތުތައް އަދާކުރުމެވެ. އަދި ދައުލަތުގެ މާލިއްޔަތުގެ ގަވާއިދުގެ 2.03 ވަނަ މާއްދާގައި ބަޔާންކޮށްފައިވާ މަސްއޫލިއްޔަތުތައް އަދާކުރުން ވެސް އެއީ އެސްޖީގެ ޒިންމާއެކެވެ.
ސިވިލް ސަރވިސް ކޮމިޝަނުން ބުނީ މަގާމަށް ކުރިމަތިލުމަށް ސީއެސް ވިއުގަ އޮންލައިން ޕޯޓަލްގެ "އީ-ފާސް" އެކައުންޓެއް އޮންނަންވާނެ ކަމަށެވެ. "އީ-ފާސް" އެކައުންޓެއް ނެތް ނަމަ "އީ-ފާސް" އެކައުންޓެއް ހަދަންވާނެއެވެ. މަގާމަށް އެދި ހުށަހަޅާނީ، ޖޫން 28 ވާ ހޯމަ ދުވަހުގެ 23:59 ގެ ކުރިން ސީއެސް ވިއުގަ އޮންލައިން ޕޯޓަލްގެhttps://myaccount.csc.gov.mv/CouncilSg ލިންކް މެދުވެރިކޮށެވެ. ސީއެސް ވިއުގަ އޮންލައިން ޕޯޓަލް މެދުވެރިކޮށް ނޫން ގޮތަކަށް ހުށަހަޅާ އެޕްލިކޭޝަނާއި ލިޔުންތައް ބަލައި ނުގަނެވޭނެ ކަމަށް ވެސް އެ ކޮމިޝަނުން ބުނެއެވެ.
މި މަގާމަށް މީހަކު ހޮވުމަށް ބޭއްވޭ އިންޓަވިއު، އިމްތިހާނު އަދި ޕްރެޒެންޓޭޝަން ހުށަހެޅުން އޮންނާނީ، ޖުލައި 11ން އޮގަސްޓް މަހުގެ 8އާ ދެމެދުއެވެ. އެއް އިދާރާއަށް ވުރެ ގިނަ އިދާރާތަކުގެ މަގާމުތަކަށް ކުރިމަތިލާ މީހުންނަށް އިމްތިހާން އަދި އިންޓަރވިއު ކުރިއަށް ގެންދާނީ އެއްފަހަރާއެވެ. އިމްތިހާނު އޮންނާނީ ސިވިލް ސަރވިސް ކޮމިޝަނުން ކަނޑައަޅާ ތަނެއްގައެވެ. އިންޓަރވިއު އަދި ޕްރެޒެންޓޭޝަން ކުރިއަށް ގެންދެވޭނީ "ވީޑިއޯ ކޮންފަރެންސް" މެދުވެރިކޮށެވެ.
