ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސާގެ މައްޗަށް އުފުލާފައިވާ ދައުވާގެ ޝަރީއަތުގެ ފުރަތަމަ އަޑު އެހުން ކެންސަލްކޮށްފިއެވެ.

ކްރިމިނަލް ކޯޓުން އެ މައްސަލައިގެ އަޑުއެހުންތައް ފަށަން ޖޫން 21 ވީ ހޯމަ ދުވަހުގެ ހެނދުނު 11:00ގައި ތާވަލުކޮށްފައި އޮތް ނަމަވެސް، މި އަޑުއެހުން ކެންސަލްކޮށްފައިވާކަން އެ ކްރިމިނަލް ކޯޓުން ވަނީ ހާމަކޮށްފައެވެ. އަޑުއެހުން ކެންސަލްކުރީ މި މައްސަލަ ބައްލަވާ ގާޒީ ސަލާމުގައި ހުންނެވުމުންކަމަށް އެ ކޯޓުން ވަނީ ހާމަކޮށްފައެވެ.

އީސަގެ ގެވެށި އަނިޔާގެ މައްސަލައެއް ފުލުހަށް ހުށަހެޅީ މެއި މަހުގެ 18 ވަނަ ދުވަހުގެ ރެއެވެ. އީސަ އަށް ތުހުމަތު ކުރެވެނީ، އޭނާގެ ކުރީގެ އަނބިކަނބަލުންނަށާއި ދަރިފުޅަށް އަނިޔާ ކުރި މައްސަލައެވެ.

އެ މައްސަލައިގައި އީސަގެ މައްޗަށް އުފުލާފައި ވަނީ ގާނޫނުލްއުގޫބާތުގެ 120 ވަނަ މާއްދާގެ (ހ) ގެ 1 ވަނަ ނަންބަރާ ހަވާލާދީ، އެމާއްދާގެ (ށ) ގެ 2 ވަނަ ނަންބަރުގެ ދަށުން، އަނިޔާއެއް ދިނުމުގެ ކުށުގެ ދައުވާއެވެ.

އީސައަށް ތުހުމަތު ކުރެވޭ ގެވެށި އަނިޔާގެ މައްސަލަ ކުރިއަށް ނުގެންދިއުމަށް އޭނާގެ ފަރާތުން އަނިޔާ ލިބުނު ކަމަށް ބުނާ، އޭނާގެ ކުރީގެ އަނބިކަނބަލުން އަސްރާ ނަސީމް ފުލުސް އޮފީހުގައި ވަނީ އެދިފައެވެ. އަސްރާ އެގޮތަށް އެދުނު ނަމަވެސް، ފުލުހުން ނިންމީ އެ މައްސަލަ ކުރިއަށްގެންދިއުމަށެވެ. އީސަ ވަނީ އޭނާގެ މައްޗަށް ކުރެވޭ ތުހުމަތުތައް ދޮގުކޮށްފައެވެ. އަދި ފުލުހުންނަށް އިތުބާރު އޮތް ކަމަށާއި ދައުލަތުގެ އެންމެހާ މުއައްސަސާތަކަށް އެއްބާރުލުން ދޭނެ ކަމަށް ވަނީ ވިދާޅުވެފައެވެ.

އެ މައްސަލައިގައި އީސަ ހައްޔަރުކުރުމުގެ އަމުރަކަށް ވެސް ޕީޖީން އެދުނެވެ. ނަމަވެސް ކްރިމިނަލް ކޯޓުން ވަނީ އަމުރު ނެރެދެވެން ނެތް ކަމަށް ކަނޑައަޅައިފައެވެ.