ޔޫރޯ 2020 - ޔޫކްރޭނާއި އޮސްޓްރިއާގެ ކުރިމަތިލުން

ޔޫރޯ 2020 ގެ ގްރޫޕް ސީ ގައި ޔޫކްރޭނާއި އޮސްޓްރިއާ ބައްދަލުކުރާ މެޗު ހޯމަ ދުވަހުގެރޭ ކުޅޭއިރު، މި މެޗަކީ މި ދެޓީމަށްވެސް މަރުގެ މެޗެކެވެ. މި މެޗުން މޮޅުވާ ޓީމަކަށް ދެވަނަ ބުރުގެ ޖާގައެއް ކަށަވަރުވެގެންދާނެއެވެ.

ޔޫރޯގައި މި ދެ ޓީމުން މިހާތަނަށް ދެ މެޗެއް ކުޅެފައިވާއިރު، ޔޫކްރޭން ވަނީ ފުރަތަމަ މެޗުގައި ނެދަލެންޑްސް އަތުން 3-2 ގެ ނަތީޖާއަކުން ބަލިވެފައެވެ. އެކަމަކު ދެވަނަ މެޗުން ނޯތު މެސެޑޯނިއާ އަތުން ޔޫކްރޭން ވަނީ 2-1 ގެ ނަތީޖާއަކުން މޮޅުވެފައެވެ. މީގެ އިތުރުން ކުޅުނު ފުރަތަމަ މެޗުން އޮސްޓްރިއާއިން ވަނީ ނޯތު މެސެޑޯނިއާ އަތުން 3-1 ގެ ނަތީޖާއަކުން މޮޅުވެފައެވެ. ނަމަވެސް ދެވަނަ މެޗުގައި ނެދަލެންޑްސް އަތުން ވަނީ 2-0 ގެ ނަތީޖާއަކުން ބަލިވެފައެވެ.

މިހާރު ގްރޫޕް ތާވަލު އޮތް ގޮތުން ނެދަލެންޑްސް އެއްވަނައިގައި އޮތީ ކުޅުނު ދެ މެޗުން މޮޅުވެ ހަ ޕޮއިންޓާއެކުއެވެ. ދެވަނައިގައި އޮތް ޔޫކްރޭނާއި ތިންވަނައިގައި އޮތް އޮސްޓްރިއާއަށް ދެ މެޗުން ތިން ޕޮއިންޓް ލިބިފައިވާއިރު، ފުލުގައި އޮތް ނޯތު މެސެޑޯނިއާއަށް ޕޮއިންޓެއް ލިބިފައެއް ނުވެއެވެ.

ކޮންމެ ގްރޫޕަކުންވެސް އެންމެ މޮޅު ދެ ޓީމު ދެވަނަ ބުރަށް ދަތުރުކުރާއިރު، ދެވަނަ ބުރުގެ ޖާގައެއް ދެން ލިބޭނީ ތިންވަނައިގައި ނިންމާ ހަ ޓީމުގެ ތެރެއިން އެންމެ ރަނގަޅު ހަތަރު ޓީމަށެވެ.

އޮސްޓްރިއާ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ޔޫކްރޭނުގެ ކޯޗު އެންޑްރީ ޝެވްޗެންކޯ ބުނީ މި މެޗަކީ މި މުބާރާތުގައި އޭނާގެ ޓީމުން ކުޅޭނެ އެންމެ މުހިންމު އެއް މެޗު ކަމަށެވެ. އަދި އޮސްޓްރިއާއަކީ މޮޅެތި ކުޅުންތެރިންތަކެއް ތިބި ޓީމެއް ކަމަށާއި، އެގޮތުން ޓީމުގެ ކެޕްޓަން ޑޭވިޑް އަލަބާއަށް ސަމާލުކަން ދޭން ޖެހޭ ކަމަށްވެސް ބުންޏެވެ. ނަމަވެސް މެޗާ ކުރިމަތިލާއިރު ޔޫކްރޭން ޓީމުގެ ކުޅުންތެރިންނާ މެދު އިތުބާރު އެބައޮތް ކަމަށްވެސް ވަނީ ބުނެފައެވެ.

އޮސްޓްރިއާގެ ކޯޗު ފްރެންކޯ ފޯޑާ ބުނީ މި މެޗުން މޮޅުވާން ބޭނުންވާ ކަމަށާއި، ނަމަވެސް ޔޫކްރޭނަކީ ސަމާލުވާން ޖެހޭ ޓީމެއް ކަމަށެވެ. އަދި ހާއްސަކޮށް ޝެވްޗެންކޯގެ އިރުޝާދުގެ ދަށުން ޔޫކްރޭނުން މިހާރު ކުޅެމުން އަންނަ ކުޅުމަކީ މޮޅުވާން އުނދަގޫ ކުޅުމެއް ކަމަށާއި، އެކަމަކު ކޮންމެ ޓީމެއްގައިވެސް ބަލި ފައިތަކެއް ހުންނާނެ ކަމަށްވެސް ވަނީ ބުނެފައެވެ. އަދި އެކަންކަން ދެނެގަނެވިފައިވާ ކަމަށާއި، އެހެންކަމުން މި މެޗުގައި އޭގެ ނަތީޖާ ފެނިގެންދާނެ ކަމަށްވެސް ފޯޑާ ވަނީ ބުނެފައެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާ ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ 20:00 ގައި ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސެއިން ފަރިޔާޒެވެ. ފަރިޔާޒާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ސީ ގެ އެނަލިސްޓް އިހުސާން އަބްދުލް ޣަނީ (ސާންތި) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން އަޙްމަދު ނިމާދު (ނިމާ) ބައިވެރިވެވަޑައިގަންނަވާނެއެވެ.

ޔޫކްރޭނާއި އޮސްޓްރިއާ ބައްދަލުކުރާ މެޗު ފަށާނީ ހޯމަ ދުވަހުގެރޭ ރާއްޖެ ގަޑިން 21:00 ގައެވެ.