ބިލެތްދޫގެ މޮނިޓަރިންގ އުވާލައި، ރަށް އާންމު ޙާލަތަށް

ފ ބިލެއްދޫގެ މޮނިޓަރިންގ ގެ ޙާލަތު އުވާލާފައިވުމާއެކު، އެ ރަށުގައި ކޮވިޑް-19 އާ ގުޅިގެން އަޅާފައިވާ ބައެއް ފިޔަވަޅުތަކަށް ލުއިތައް ދީފިއެވެ.

ކޮވިޑް-19 ގެ ކޭސްތަކެއް ފެނުމާއި ގުޅިގެން ބިލެއްދޫ މޮނިޓަރިންގ އަށް ލާފައިވަނީ މިދިޔަ މެއި މަހުގެ 19 ވަނަ ދުވަހުއެވެ. އޭރު ކޮވިޑް-19 ކޮންޓްރޯލް ކުރުމުގައި ގިނަ ފިޔަވަޅުތަކެއް އަޅައި، ކަމާބެހޭ އިދާރާތަކުން ގުޅިގެން ވަނީ އެ ފިޔަވަޅުތައް ތަންފީޒުކޮށްފައެވެ.

މިހާރު ބިލެއްދޫގެ ކޮވިޑް-19 ގެ ކޭސްތައް ކޮންޓްރޯލް ކުރެވިފައިވާއިރު، 20 ޖޫން ގައި ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ވަނީ އެރަށުގެ މޮނިޓަރިން ޙާލަތު އުވާލާފައެވެ.

މޮނިޓަރިންގ ގެ ޙާލަތު އުވާލުމާއެކު އެރަށު ކައުންސިލުން ވަނީ ކޮވިޑާއި ގުޅިގެން އަޅާފައިވާ ފިޔަވަޅުތަކަށް ލުއި ދީފައެވެ. އެގޮތުން މިސްކިތްތަކުގައި ނަމާދު ކުރަން ފެށުމާއި، ގައިދުރުކަމާއެކު ކަސްރަތު ކުރުމަށް ނުކުމެ އުޅުމުގެ ހުއްދަ ދިނުމުގެ އިތުރުން، ކުރިއެކޭވެސް އެއްގޮތަށް ވަދު އެޅުމާއި ފަރުމަސްވެރިކަން ކުރުމަށް ދިއުމުގެ ފުރުސަތު ދިނުމަށް ވަނީ ނިންމާފައެވެ.

އޭގެ އިތުރުން، މީހުން ދިރިއުޅޭ ރަށަކަށް ދަތުރުކުރާނަމަ ދަތުރު ކުރާ ރަށާއި، ދާ މީހުންގެ މައުލޫމާތު ކައުންސިލާ ހިއްސާ ކުރުމަށްވެސް ވަނީ އެދިފައެވެ. ނަމަވެސް ކުރިއެކޭވެސް އެއްގޮތަށް ބޭރުގައި އުޅޭއިރު މާސްކް އެޅުމާއި، ގައިދުރުކަން ބެހެއްޓުމަށް ކައުންސިލުން ވަނީ އިލްތިމާސްކޮށްފައެވެ.