ބޭނުންވާ މައުލޫމާތު ފޯރުކޮށް ނުދޭނަމަ ގާނޫނުގެ ބޭނުން ކުރާނެ ކަމަށް އެޗްއާރްސީއެމުން ބުނެފި
20 ޖޫން 2021 | އާދީއްތަ 06:30މައުލޫމާތު ނުލިބޭތީ މައްސަލަ ނިންމުމުގައި ގޮންޖެހުންތަކެއް ހުރޭ
ފަލަ ސުރުޚީ ޕްރޮގްރާމްގައި އެޗްއާރްސީއެމްގެ މެމްބަރުން ވާހަކަދައްކަވަނީ
ބޭނުންވާ މައުލޫމާތު ފޯރުކޮށް ނުދޭނަމަ ގާނޫނުގެ ބޭނުން ކުރާނެ ކަމަށް އެޗްއާރްސީއެމުން ބުނެފިއެވެ.
ކުރީގެ ރައީސް މުޙައްމަދު ނަޝީދަށް އަމާޒުކޮށްދިން ހަމަލާއާ ގުޅިގެން, ހިއުމަން ރައިޓްސް ކޮމިޝަން (އެޗްއާރްސީއެމް)އިން ހޯދަން އެދުނު މައުލޫމާތު ޑިފެންސް މިނިސްޓްރީން ދީފައި ނުވާތީ އެ މައުލޫމާތު ހޯދުމަށް އެ ކޮމިޝަނުން ޑިފެންސް މިނިސްޓްރީއާ ބައްދަލު ކުރާނެ ކޮމިޝަނަރ މޫމިނާ ވަހީދު ވިދާޅުވިއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަ ދައްކަވަމުން ކޮމިޝަނަރ މޫމިނާ ވަހީދު ވިދާޅުވީ، އެ މައްސަލައިގައި މައުލޫމާތު ހޯދަން އެދުނު މުއައްސަސާތަކުގެ ތެރެއިން ޑިފެންސް މިނިސްޓްރީން އަދި މިހާތަނަށް އެއްވެސް މައުލޫމާތެއް ކޮމިޝަނަށް ދީފައި ނުވާ ކަމަށެވެ. މިކަމާ ގުޅިގެން މި ހަފްތާގައި ކޮމިޝަނުން މިނިސްޓްރީއާ ބައްދަލުކުރާނެ ކަމަށާއި، އެގޮތަށް ވެސް މައުލޫމާތު ނުލިބިއްޖެނަމަ ކޮމިޝަނަށް ލިބިގެންވާ ގާނޫނުގެ ބޭނުން ކުރާނެ ކަމަށް މޫމިނާ ވިދާޅުވިއެވެ.
މޫމިނާ ވިދާޅުވީ، ކޮމިޝަނުން ބަލާ މައްސަލަތަކުގައި ކޮމިޝަނަށް ބޭނުންވާ މައުލޫމާތު ކަމާ ގުޅުންހުރި އިދާރާތަކުން ފޯރުކޮށްނުދޭނަމަ ކޯޓު މެދުވެރިކޮށް ވެސް އެ މައުލޫމާތު ހޯދުމުގެ ބާރު ކޮމިޝަނަށް ލިބިގެންވާ ކަމަށާއި، ހުރިހާ މައްސަލައެއްގައި އެ މަރުހާލާތަކަށް ދާން ބޭނުން ނުވާ ކަމަށެވެ.
މެއި 6 ވަނަ ދުވަހުގެ ރޭ ރައީސް ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން ދައުލަތުގެ ކަމާ ގުޅުންހުރި އިދާރާތަކުން އަމަލުކޮށްފައިވާ ގޮތާއި ކުރަމުންދާ ގޮތް ބަލަމުން އަންނަ ކަމަށް ކޮމިޝަނުންވަނީ ބުނެފައެވެ. އެގޮތުން ތަހުގީގަށް ބޭނުންވާ މައުލޫމާތު ހޯދުމަށް މާލޭ ސިޓީ ކައުންސިލާއި، މޯލްޑިވްސް ޕޮލިސް ސާވިސްއާއި، މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރ އަދި މިނިސްޓްރީ އޮފް ޑިފެންސްއަށް ލިޔުމުން ހުށަހަޅާފައިވާކަމަށް އެޗްއާރްސީއެމުން ބުނެއެވެ. އަދި މިހާތަނަށް، ޑިފެންސް މިނިސްޓްރީ ފިޔަވައި އެހެނިހެން މުއައްސަސާތަކުން، ކޮމިޝަނުން އެދިފައިވާ މައުލޫމާތު، ހިއްސާކޮށްފައި ވާކަމަށް އެޗްއާރްސީއެމުން ބުނެއެވެ.
މޫމިނާ ވިދާޅުވީ، މުއައްސަސާތަކުން މައުލޫމާތު ފޯރުކޮށްދިނުން ލަސްވުމުގެ ސަބަބުން މައްސަލަތައް ނުނިމި ލަސްވަމުންދާކަމަށެވެ. މިއީ ވަރަށް ބޮޑު ގޮންޖެހުމެއްކަން ފާހަގަކުރައްވަމުން މޫމިނާ ވިދާޅުވި، މިކަމުގެ ސަބަބުން ރައްޔިތުން އެ ކޮމިޝަނަށްކުރާ އިތުބާރު ގެއްލޭ ކަމަށެވެ.
