އެންޓި ޓޯޗަރ ގާނޫނުގެ ދަށުން 58 މައްސަލައެއް މިހާރު ބަލަމުންދަނީ - އެޗްއާރްސީއެމް
ބައެއް މުއައްސަސާތަކުން މައުލޫމާތު ހިއްސާ ނުކުރޭ
ފަލަ ސުރުޚީ ޕްރޮގްރާމްގައި އެޗްއާރްސީއެމްގެ މެމްބަރުން ވާހަކަދައްކަވަނީ
އެންޓި ޓޯޗަރ ގާނޫނުގެ ދަށުން 58 މައްސަލައެއް ބަލަމުން އަންނަ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން ބުނެފިއެވެ.
ކޮމިޝަނުން މިހާރު ކުރަމުން އަންނަ މަސައްކަތްތަކާ ބެހޭ ގޮތުން ރާއްޖެ ޓީވީގެ ފަލަ ސުރުޚީ ޕްރޮގްރާމްގައި މައުލޫމާތު ހިއްސާ ކުރައްވަމުން ކޮމިޝަނަރ މޫމިނާ ވަހީދު ވިދާޅުވީ، އެ ކޮމިޝަނުން އެކި ދާއިރާތަކާ ގުޅުން ހުރި 633 މައްސަލައެއް މިހާރުވެސް ބަލަމުން އަންނަ ކަމަށެވެ. މި އަހަރުގެ މިހާތަނަށް ވެސް 274 މައްސަލައެއް ކޮމިޝަނަށް ހުށަހެޅި ބަލަމުން އަންނަ ކަމަށް ވިދާޅުވިއެވެ.
ކޮމިޝަނުން ކުރަމުން އަންނަ މަސައްކަތްތަކަކީ ވަރަށް ގިނަ މުއައްސަސާތަކަކާ ގުޅިގެން ކުރަންޖެހޭ މަސައްކަތަކަކަށްވާއިރު، ބައެއް މުއައްސަސާތަކުން ބޭނުންވާ މައުލޫމާތު ފޯރުކޮށްނުދޭކަން މޫމިނާ ފާހަގަކުރެއްވިއެވެ. އެކަމުގެ ސަބަބުން މައްސަލަތައް ނުނިމި ދިގުލައިގެންދާ ކަމަށާއި، މިކަމުގެ ސަބަބުން ކޮމިޝަނަށް ރައްޔިތުންގެ ފަރާތުން އޮންނަ އިތުބާރު ދެމެހެއްޓުމަށް ދަތިތަކެއް ކުރިމަތިވަމުން އަންނަ ކަމުގައި ވިދާޅުވިއެވެ. މައިމޫނާ ވިދާޅުވީ، އެންމެ މުއައްސަސާއަކުން ވެސް މައުލޫމާތު ފޯރުކޮށް ނުދޭނަމަ އެ މައްސަލަ ނިންމަން އުނދަގޫތަކެއް ކުރިމަތިވާ ކަމުގައެވެ.
އެކި ފަހަރުމަތިން އެދިގެން ވެސް މައުލޫމާތު ހިއްސާ ނުކުރާނަމަ ކޯޓު މަރުހަލާއަށް ދިޔުމުގެ ބާރު ވެސް ކޮމިޝަނަށް ލިބެގެންވާ ކަމަށާއި، އެހެންނަމަވެސް ކޮންމެ މައްސަލައެއްގައި އެ މަރުހަލާތަކަށް ދިޔުމަކީ ކޮމިޝަނުން ބޭނުންވާ ގޮތެއް ނޫންކަމަށް މޫމިނާ ވިދާޅުވިއެެވެ.
