ޑިސެމްބަރ 2019ން ފެށިގެން އެމެރިކާގައި ކޮވިޑް ފެތުރެމުން ދިޔަކަމުގެ ހެކިތަކެއް!
އެމެރިކާގެ 5 ސްޓޭޓަކުން ކޮވިޑްގެ ކޭސްތަކެއް މާކުރިން ފެނިފައިވާކަމަށް ދިރާސާކުރާ ފަރާތްތަކުން ވަނީ ބުނެފައި
އެމެރިކާ - ކޭސްތައް ރިޕޯޓްކުރުމުގެ މާކުރިން ވައިރަސް ފެތުރިފައިވޭ
2019 ވަނަ އަހަރުގެ ޑިސެމްބަރުމަހުގެ ކުރީކޮޅުން ފެށިގެން އެމެރިކާގައި މަޑުމަޑުން ކޮވިޑް ފެތުރެމުން ދިޔަކަމުގެ ހެކިތައް ދިރާސާކުރާ ފަރާތްތަކުން ހޯދައިފިއެވެ.
އެމެރިކާގެ ނެޝަނަލް އިންސްޓިޓިއުޓްސް އޮފް ހެލްތުން ކުރިއަށް ގެންދިޔަ ދިރާސާއެއްގައި ބުނެފައިވަނީ އެމެރިކާގެ 5 ސްޓޭޓަކުން ކޮވިޑްގެ ކޭސްތައް ރަސްމީކޮށް ފެނިގެން ރިޕޯޓް ކުރުމުގެ މާ ކުރިން ވެސް އެ ސްޓޭޓްތަކުގައި ކޮވިޑް ފެތުރެމުން ދިޔަކަމުގެ ހެކިތައް މިހާރު ހޯދިފައިވާ ކަމަށެވެ. މި ސްޓޭޓްތަކުގެ ތެރޭގައި އިލިނޮއި، ވިސްކޮންސިން، ޕެންސިލްވޭނިއާ، މިސިސިޕީ އަދި މެސެޗޫސެޓްސް ހިމެނެއެވެ. މި ހެކިތައް ހޯދިފައިވަނީ ކޮވިޑްގެ ކޭސްތައް ފެނުމުގެ ކުރިން އެ ސްޓޭޓްތަކުގައި ދިރިއުޅުމެން ދިޔަ މީހުންގެ ގައިން ނަގާފައިވާ ލޭގެ ސާމްޕަލްތަކުންނެވެ.
އެންއައިއެޗްގައި މަސައްކަތް ކުރާ ވޮލެންޓިއަރުން ވަނީ މި ދިރާސާއަށް 1 މިލިއަން މީހުންގެ ލޭގެ ސާމްޕަލް ދިރާސާކޮށްފައެވެ. އަދި މީގެ ތެރެއިން 2020 ވަނަ އަހަރު ނަގާފައިވާ 24،000ށް ވުރެ ގިނަ މީހުންގެ ސާމްޕަލްތަކުގެ ތެރެއިން 9 މީހެއްގެ ލެއިން ކޮވިޑާއި ދެކޮޅަށް މަސައްކަތް ކުރާ އެންޓިބޮޑީޒް ފެނިފައިވެއެވެ.
މީގެ ތެރޭގައި ޖެނުއަރީ މަހުގެ 7 ވަނަ ދުވަހު އިލިނޮއި އިން ނަގާފައިވާ ސާމްޕަލްތަކާއި، މެސެޗޫސެޓްސް އިން ޖެނުއަރީ 8 ގައި ނަގާފައިވާ ސާމްޕަލްތަކާއި، ވިސްކޮންސިން އިން ފެބްރުއަރީ 3 ގައި އަދި ޕެސިލްވޭނިއާއިން ފެބްރުއަރީ މަހުގެ 15 ވަނަ ދުވަހު އަދި މިސިސިޕީން މާޗް 6 ގައި ނަގާފައިވާ ސާމްޕަލްތައް ހިމެނެއެވެ. އިލިނޮއިގައި ފުރަތަމަ ކޮވިޑްގެ ކޭސް ރިޕޯޓްކޮށްފައިވަނީ ޖެނުއަރީ މަހުގެ 24 ވަނަ ދުވަހުއެވެ. އެއީ ވުހާނުން އަނބުރާ އައި މީހެކެވެ.
ކޮވިޑް ޖެހޭ ފަހުން ހަށިގަނޑުގައި އެންޓިބޮޑީސް އުފެދެން ފެށެނީ 3 ހަފުތާ ފަހުން ކަމަށާއި، އެހެންކަމުން މި މީހުންނަށް ކޮވިޑް ޖެހިފައިވަނީ 2019 ވަނަ އަހަރުގެ ޑިސެމްބަރު މަހުގައި ކަމަށް ދިރާސާ ކުރާ ޓީމުން ވަނީ ބުނެފައެވެ.
