އެމެރިކާގައި ހުންނަވާ ފަލަސްތީނުގެ ސަފީރު އަނބުރާ ޤައުމަށް ގެންދަން ނިންމައިފި

ޤުދުސްއަކީ އިސްރާއީލުގެ ވެރިރަށުގެ ގޮތުގައި އެމެރިކާއިން ބަލައިގަތް މައްސަލައިގައި، "އިތުރަށް ބަލަން ޖެހޭ ކަންތައްތައް ބެލުމަށް' އެމެރިކާގައި ހުންނަވާ ފަލަސްތީނުގެ މަންދޫބު އަނބުރާ ޤައުމަށް ގެންނަން ނިންމައިފިއެވެ.

ފަލަސްތީނުން މިނިންމުން ނިންމާފައިމިވަނީ ޕާކިސްތާނުގައި ހުންނަވާ ފަލަސްތީނުގެ މަންދޫބުވެސް އަނބުރާ ގެނެސްފައިވާ ދަނޑިވަޅެއްގައެވެ. ޕާކިސްތާނުގައި ހުންނަވާ ސަފީރު ގެނެސްފައިވަނީ ޤުދުސްގެ ދިފާޢުގައި އެޤައުމުގައި ބޭއްވި އެއްވުމެއްގައި، އިންޑިއާއިން ޓެރަރިސްޓެއްކަމަށް ކަނޑައަޅާފައިވާ ހާފިޒް ސަޢީދާއިއެކު ހުންނެވުމާއި ގުޅިގެން، އިންޑިއާއިން އެކަމާއި ހިތްހަމަނުޖެހުން ފާޅުކުރުމުންނެވެ.

އެމެރިކާގައި ހުންނަވާ ފަލަސްތީނުގެ މަންދޫބު އަނބުރާ ގެންދަން ފަލަސްތީނުން ނިންމާފައިވާއިރު، ޤުދުސްއަކީ އިސްރާއީލުގެ ވެރިރަށުގެ ގޮތުގައި ބަލައިގަތުމަށް އެމެރިކާއިން ނިންމުމުން، މެދުއިރުމަތީގެ ސުލްހައިގެ ވާހަކަތަކުގައި އެމެރިކާއިން އަދާކުރަމުން އައި މެދުވެރިއެއްގެ ރޯލު ދެން ބަލައިނުގަންނާނެކަމަށް ފަލަސްތީނުގެ ރައީސް މަހްމޫދު ޢައްބާސް ވަނީ ވިދާޅުވެފައެވެ.

ފަލަސްތީނުގައި، އެމެރިކާގެ ނިންމުމާއި ދެކޮޅަށް މުޒާހަރާކުރަމުންދާ މީހުންނާއި އިސްރާއީލް ސިފައިންނާއި ދެމެދު މިހަފްތާ ބަންދުގައިވެސް ކުރިމަތިލުންތައް ހިނގިއެވެ. އަދި މިކުރިމަތިލުންތައް ފެށިފަހުން ޔަހޫދީ ސިފައިން ދިން ޙަމަލާތަކުގައި މިހާތަނަށް 16 މީހަކު ޝަހީދުވެފައިވާކަމަށް ފަލަސްތީނުގެ އޮފިޝަލުން ހާމަކުރެއެވެ.