ޔޫރޯ 2020 - ސްޕެއިނާއި ޕޮލެންޑުގެ ކުރިމަތިލުން

ޔޫރޯ 2020 ގެ ގްރޫޕް އީ ގައި ހޮނިހިރު ދުވަހުގެ ސްޕެއިނާއި ޕޮލެންޑް ބައްދަލުކުރާނެއެވެ. މި މެޗަކީ މި ދެ ޓީމަށްވެސް ވަރަށް މުހިންމު މެޗެކެވެ. ސްޕެއިނުން މި މުބާރާތުގައި ކުޅުނު ފުރަތަމަ މެޗުގައި 1-1 ގެ ނަތީޖާއަކުން ސްވިޑެންއާ އެއްވަރުވެފައިވާއިރު، ސްލޮވާކިއާއިން ވަނީ 1-0 ގެ ނަތީޖާއަކުން ޕޮލެންޑް ބަލިކޮށްފައެވެ.

ސްޕެއިނާއި ޕޮލެންޑް ބައްދަލުކުރާ މެޗު ސެވިލްގެ އެސްޓާޑިއޯ ލަ ކަރްތޫޒާ ސްޓޭޑިއަމުގައި ކުޅޭއިރު، މި މެޗަށް ދެ ޓީމުވެސް ވަނީ ވަރަށް ރަނގަޅަށް ތައްޔާރުވެފައެވެ.

ޕޮލެންޑް މެޗުގެ ކުރިން ސްޕެއިންގެ ކޯޗު ލުއިސް އެންރީކޭ ބުނީ މި މެޗުގެ ޕްރެޝަރު އޮތީ ހަމައެކަނި ސްޕެއިނަށް ނޫން ކަމަށާއި، މި މެޗުގެ ޕްރެޝަރު ދެ ޓީމަށްވެސް އެބައޮތް ކަމަށެވެ. އަދި ޕޮލެންޑާ ދެކޮޅަށް ނުކުންނައިރު ލިބޭ ފުރުސަތުތަކުގެ ބޭނުން ހިފަންޖެހޭ ކަމަށާއި، މިދިޔަ މެޗުގައި ސްޕެއިންގެ ފަރާތުން ހަމައެކަނި މަދުވި ކަމަކީ ލަނޑު ޖަހަން ލިބުނު ފުރުސަތުތަކުގެ ބޭނުން ނުހިފުން ކަމަށްވެސް ވަނީ ބުނެފައެވެ.

މި މެޗުގެ ކުރިން ޕޮލެންޑުގެ ކޯޗު ޕައުލޯ ސީޒާ ބުނީ ކުޅުންތެރިންގެ ފެންވަރުން ބަލާނަމަ ސްޕެއިން ޓީމަކީ ވަރުގަދަ ޓީމެއް ކަމަށް ގަބޫލުކުރާ ކަމަށާއި، އެކަމަކު ސްޕެއިނަކީ ބަލި ނުކުރެވޭނެ ވަރުގެ ޓީމެއް ނޫން ކަމަށެވެ. އަދި މި މެޗަކީ ޕޮލެންޑަށް މޮޅުވުން ނޫން ގޮތެއް ނެތް މެޗެއް ކަމަށާއި، އެގޮތުން މެޗުން ޕޮއިންޓެއް ލިބުނަސް އަދި ބަލިވިޔަސް ޕޮލެންޑަށް މުބާރާތުން އަލްވަދާއު ކިޔަން ޖެހޭނެ ކަމަށްވެސް ވަނީ ބުނެފައެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ހެޑް އޮފް ސްޕޯޓްސް ހުސައިން ފަރިޔާޒެވެ. ފަރިޔާޒާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް އީ ގެ އެނަލިސްޓް އިމާދު ލަތީފެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން އެނަލިސްޓް ޓީމުގައި ހިމެނޭ މުޙައްމަދު ޝިޔާޒް (މޯހަން) ބައިވެރިވެވަޑައިގަންނަވާނެއެވެ.

ސްޕެއިނާއި ޕޮލެންޑް ބައްދަލުކުރާ މެޗު ފަށާނީ ހޮނިހިރު ދުވަހުގެރޭ ރާއްޖެ ގަޑިން ދަންވަރު 00:00 ގައެވެ.