އައްޑޫ ސިޓީން ކޮވިޑަށް ޕޮޒިޓިވްވި މީހުންގެ އަދަދު 400ން މައްޗަށް
ހުކުރު ދުވަހު ޕޮޒިޓިވްވި 7 މީހުންނަކީ ވެސް ހިތަދޫން ޕޮޒިޓިވްވި މީހުން
އައްޑޫ ސިޓީން ކޮވިޑަށް ޕޮޒިޓިވްވި މީހުންގެ އަދަދު ވަނީ 403ށް އަރާފައި
އައްޑޫ ސިޓީން އިތުރު 7 މީހަކު ޕޮޒިޓިވްވެ، ޖުމްލަ 403ށް އަރައިފިއެވެ.
އައްޑޫ އެމަރޖެންސީ އޮޕަރޭޝަން ސެންޓަރުން އާއްމުކޮށްފައިވާ ތަފާސްހިސާބުތަކަށް ބަލާއިރު، މިހާތަނަށް 403 މީހަކު ޕޮޒިޓިވްވެފައިވެއެވެ. އަދި 304 މީހުން ބަލިން ރަނގަޅުވެފައިވެއެވެ. ހުކުރު ދުވަހު 173 ސާމްޕަލެއް ނަގާފައިވާ ކަމަށާއި، އޭގެ ތެރެއިން 7 މީހަކު ޕޮޒިޓިވްވެފައިވާ ކަމަށް އެ ސެންޓަރުން މައުލޫމާތުދެއެވެ.
މިހާރު އައްޑޫ ސިޓީގައި 97 އެކްޓިވް ކޭސް ހިމެނޭއިރު އެޑްމިޓްކޮށްގެން ފަރުވާދެމުން ދަނީ އެންމެ މީހަކަށެވެ. އައްޑޫ ސިޓީން މިބަލީގައި ދެ މީހަކު ނިޔާވެފައިވެއެވެ.
އައްޑޫގެ ހާލަތަށް ބަލާއިރު، ހިތަދޫގައި 94 މީހުން، މަރަދޫގައި ދެމީހުން އަދި ފޭދޫން އެކަކު ޕޮޒިޓިވްވެފައިވެއެވެ. ހުކުރު ދުވަހު ޕޮޒިޓިވްވި 7 މީހުންނަކީ ވެސް ހިތަދޫން ޕޮޒިޓިވްވި މީހުންނެއެވެ.
ހިތަދޫގައި ކޮވިޑް-19ގެ ހާލަތު ގޯސްވުމާ ގުޅިގެން އެ އަވަށް އެއް ހަފްތާގެ މުއްދަތަށް މިހާރު ވަނީ ލޮންޑައުންކޮށްފައެވެ. އެގޮތުން ހުއްދައަކާ ނުލައި ބޭރަށް ނިކުތުން މަނާ ކޮށްފައިވާއިރު ކޮންމެ ގޭބީސީއަކަށް ވެސް ބޭރަށް ނިކުތުމަށް ދެ ފާހެއް ދޫކުރެއެވެ. އެ ދެ ފާސް ދޫކުރަނީ ދެ ގަޑިއަކަށް ބަހާލައިގެން ކޮންމެހެން ޒަރޫރީ ބޭނުންތަކަށް އެކަންޏެވެ.
މީގެ އިތުރަށް ދަނޑުވެރިންނާއި މަސްވެރިންނަށް ވަކި ފާހެއް ދޭން ނިންމާފައިވާއިރު ވަޒީފާގެ ގޮތުން ބޭރަށް ދާން ޖެހޭ މީހުން ވަޒީފާއަށް ދާން ޖެހޭ ގަޑިތަކުގައި ފުލުހުންގެ ޕޯޓަލް މެދުވެރިކޮށް ފާސް ނެގޭނެ އިންތިޒާމު ވެސް ވަނީ ހަމަޖައްސާފައެވެ. މީގެ އިތުރަށް ކެފޭ ރެސްޓޯރަންޓުތަކުން ޑެލިވަރީ ނޫން އެހެން ޚިދުމަތެއް ނުދެވޭ ގޮތަށް ހަދާފައިވާއިރު ފަތިހު 4ން ހެނދުނު 8ށް ކަސްރަތުކުރުމުގެ ފުރުސަތު ލިބޭނެ ކަމަށް ވެސް ބުނެފައިވެއެވެ. މިގޮތަށް ކަސްރަތަށް ހުއްދަދީފައިވަނީ ވެސް އެކަނި ކަސްރަތުކުރުމަށް ނުކުމެވޭގޮތަށެވެ.
ހިތަދޫގައި ކޮވިޑް-19 ހާލަތު ގޯސްވެފައިވަނީ އެރަށުގައި އުޅޭ ބިދޭސީންގެ މެދުގައި ކޮވިޑް-19ގެ ބޮޑު ކްލަސްޓަރއެއް އުފެދިގެންނެވެ.
