ހަމަލާގެ ތަހުގީގަށް ބޭނުންވާ މައުލޫމާތު ޑިފެންސް ފިޔަވައި އެހެން ހުރިހާ މުއައްސަސާއަކުން ހިއްސާކޮށްފި – އެޗްއާރްސީއެމް
ހަމަލާ ދިން ރޭ އެޗްއާރްސީއެމްގެ މެންބަރެއް ހިމެނޭ ގޮތަށް ޚާއްސަ ޓީމެއް އޭޑީކޭ ހޮސްޕިޓަލަށް ޒިޔާރަތްކުރި
ރައީސް ނަޝީދުގެ ގެކޮޅު ކައިރީގައި އެއްޗެއް ގޮއްވާލުމާއެކު ސަލާމަތީ ބާރުތަކުން އެ ސަރަހައްދުގައި ހަރަކާތްތެރިވަނީ
ކުރީގެ ރައީސް މުޙައްމަދު ނަޝީދަށް އަމާޒުކޮށްދިން ހަމަލާއާ ގުޅިގެން, ހިއުމަން ރައިޓްސް ކޮމިޝަން (އެޗްއާރްސީއެމް)އިން ހޯދަން އެދުނު މައުލޫމާތު ޑިފެންސް މިނިސްޓްރީ ފިޔަވާ އެހެން ހުރިހާ މުއައްސަސާއަކުން ހިއްސާކޮށްފައިވާކަމަށް އެ ކޮމިޝަނުން ބުނެފިއެވެ.
އެޗްއާރްސީއެމުން މިހެން ބުނެފައިވަނީ އެމްޑީޕީގެ ގައުމީ މަޖިލީހުގައި، 6މެއި ކޮމިޓީގެ މައުލޫމާތު ހާމަކުރައްވަމުން، ހަމަލާގެ މައްސަލައިގައި އެޗްއާރްސީއެމްއިން މަސްއޫލިއްޔަތު އަދާ ނުކުރާކަމަށް ދޭހަވާ މޭރުމަކުން އެ ކޮމިޓީގެ ޗެއަރ އަދި ވިލުފުށީ ދާއިރާގެ މެންބަރު ހަސަން އަފީފް ދެއްކެވި ވާހަކައާއި ގުޅިގެން ނެރުނު ނޫސް ބަޔާނެއްގައެވެ.
އެޗްއާރްސީއެމުން ބުނީ 6 މެއި 2021 ގައި ރައީސް ނަޝީދަށް އަމާޒުކޮށް ނީލޯފަރު މަގުގައި ދެވުނު ނުރައްކާތެރި ހަމަލާގައި އެމަނިކުފާނުގެ ހަށިކޮޅަށް ލިބުނު އަނިޔާތަކަށް އޭޑީކޭ ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށް އެރޭ 21:00 ހާއިރު އެ ކޮމިޝަނުގެ މެންބަރެއް ހިމެނޭ ގޮތަށް ޚާއްސަ ޓީމެއް އެ ހޮސްޕިޓަލަށް ޒިޔާރަތް ކުރި ކަމަށެވެ. އަދި ހާދިސާއާ ގުޅިގެން ހޮސްޕިޓަލުގައި ކަން ހިނގަމުން ދިޔަގޮތް އެރޭ 23:30 އާ ހަމައަށް އެ ކޮމިޝަނުން ބަލަމުން ދިޔަކަމަށް އެޗްއާރްސީއެމުން ބުނެއެވެ.
ހަމައެއާއެކު، އެ އަނިޔާވެރި ހަމަލާއާ ގުޅިގެން އެކަން ކުށްވެރިކޮށް، އެކަމާ ކަންބޮޑުވުން ފާޅުކޮށް، ރައީސް ނަޝީދަށް އަވަސް ޝިފާއަކަށް އެދި، އަދި ހަމަލާ ދިނުމުގައި ޝާމިލުވާ ފަރާތްތަކަށް ހައްގު އަދަބު ދިނުމަށާއި، މި ހާދިސާ މޮނިޓަރ ކުރަމުން ދާކަން ހާމަކޮށް ހާދިސާ ހިނގިރޭގެ 22:05 ގައި ޓްވީޓް ކޮށްފައި ވާކަމަށް އެޗްއާރްސީއެމުން ބުނެއެވެ. އަދި އެރޭ 23:23 ގައި ވެސް އިތުރު ޓްވީޓެއް ކޮށްފައި ވާކަމަށް އެކޮމިޝަނުން ބުނެއެވެ. އެޗްއާރްސީއެމުން ބުނީ، ހަމަލާއާ ގުޅޭ ނޫސް ބަޔާނެއް މެއި 7 ވަނަ ދުވަހު ޓްވިޓާގައި އާންމުކޮށްފައި ވާކަމަށެވެ. އެ ބަޔާނުގައި، ހަމަލާއާ ގުޅިގެން ކަމާބެހޭ މުއައްސަސާތަކުން އަމަލުކުރަމުން ދާގޮތް މޮނިޓާ ކުރަމުން ދާކަމަށް ބަޔާކޮށްފައި ވާކަން ވެސް އެޗްއާރްސީއެމުން ފާހަގަކުރެއެވެ.
މި މައްސަލައިގައި މިހާރު ކުރަމުން ގެންދާ މަސައްކަތްތަކުގެ މައްޗަށް އަލިއަޅުވާލައި އެޗްއާރްސީއެމުން ބުނީ، ދައުލަތުގެ ކަމާ ގުޅުންހުރި އިދާރާތަކުން އަމަލުކޮށްފައިވާ ގޮތާއި ކުރަމުންދާ ގޮތް ބަލަމުން ދާކަމަށެވެ. އެގޮތުން ތަހުގީގަށް ބޭނުންވާ މައުލޫމާތު ހޯދުމަށް މާލޭ ސިޓީ ކައުންސިލާއި، މޯލްޑިވްސް ޕޮލިސް ސާވިސްއާއި، މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރ އަދި މިނިސްޓްރީ އޮފް ޑިފެންސް އަށް ލިޔުމުން ހުށަހަޅާފައިވާކަމަށް އެޗްއާރްސީއެމުން ބުނެއެވެ. އަދި މިހާތަނަށް، ޑިފެންސް މިނިސްޓްރީ ފިޔަވައި އެހެނިހެން މުއައްސަސާތަކުން، ކޮމިޝަނުން އެދިފައިވާ މައުލޫމާތު، ހިއްސާކޮށްފައި ވާކަމަށް އެޗްއާރްސީއެމުން ބުނެއެވެ.
ރައީސް ނަޝީދަށް އަމާޒުކޮށްގެން ދީފައިވާ ހަމާލާ ގުޅިގެން ޚާއްސަ ސަމާލުކަމެއް ދީގެން އެޗްއާރްސީއެމުން މަސައްކަތް ކުރަމުން ގެންދާ ދަނޑިވަޅެއްގައި، އެއްވެސް ފަރާތަކުން ހަގީގަތާއި ޚިލާފު މައުލޫމާތު ފެތުރުމާމެދު އެޗްއާރްސީއެމްގެ ނޫސްބަޔާނުގައި ކަންބޮޑުވުން ފާޅުކޮށްފައިވެއެވެ.
