ޔޫރޯ 2020 ގެ ގްރޫޕް ޑީ ގައި އިންގްލެންޑާއި ސްކޮޓްލެންޑް ބައްދަލުކުރާއިރު، މިއީ 25 އަހަރަށްފަހު މި ދެ ޓީމު އިންގްލެންޑުގެ ރަސްމީ ސްޓޭޑިއަމް ކަމަށްވާ ވެމްބްލީ ސްޓޭޑިއަމުގައި ބައްދަލުކުރާ ފުރަތަމަ ފަހަރެވެ. މި މެޗު ބެލުމަށް ވެމްބްލީ ސްޓޭޑިއަމަށް 22،500 ސަޕޯޓަރުން ވައްދަން ވަނީ ހަމަޖެހިފައެވެ. އެއީ ދަނޑުގެ 25 އިންސައްތައެވެ.

މި ފަހަރުގެ ޔޫރޯގައި އިންގްލެންޑާއި ސްކޮޓްލެންޑް ބައްދަލުކުރާއިރު، މި ދެ ޓީމު އެންމެ ފަހުން ބޮޑު މުބާރާތެއްގައި ބައްދަލުކޮށްފައިވަނީ 1996 ވަނަ އަހަރުގެ ޔޫރޯގައެވެ. ވެމްބްލީ ސްޓޭޑިއަމްގައި ކުޅުނު އެ މެޗު 2-0 ގެ ނަތީޖާއަކުން ކާމިޔާބުކުރީ އިންގްލެންޑުންނެވެ.

ހުކުރު ދުވަހުގެރޭގެ މެޗަށް ނުކުންނައިރު އިންގްލެންޑަށް އޮތް އެންމެ ބޮޑު ހިތްހަމަޖެހުމަކީ ފުރަތަމަ މެޗުން ކްރޮއޭޝިއާ އަތުން 1-0 ގެ ނަތީޖާއަކުން މޮޅުވެފައި އޮތުމެވެ. އަނެއްކޮޅުން ސްކޮޓްލެންޑުން ވަނީ ފުރަތަމަ މެޗުން ޗެކް ރިޕަބްލިކް އަތުން 2-0 ގެ ނަތީޖާއަކުން ބަލިވެފައެވެ.

މި މެޗުގެ ކުރިން އިންގްލެންޑުގެ ކޯޗު ގެރެތު ސައުތުގޭޓު ބުނީ މި މެޗު ކާމިޔާބުކޮށް ދެވަނަ ބުރުގެ ޖާގައެއް ކަށަވަރުކުރުން އެއީ އިންގްލެންޑުގެ އަމާޒު ކަމަށެވެ. އަދި މާޒީއަށް ބަލައިގެން އިންގްލެންޑަށް މިހާރު ތިބެވެން ނެތް ކަމަށާއި، އެގޮތުން މާޒީގައި ސްކޮޓްލެންޑުގައި އޮތް ޓީމަށްވުރެ މި ވަގުތު ސްކޮޓްލެންޑުގައި އޮތް ޓީމަކީ ވަރުގަދަ ޓީމެއް ކަމަށް ވަނީ ބުނެފައެވެ.

ސްކޮޓްލެންޑުގެ ކޯޗު ގްރެގޯ ޓައުންޒެންޑް ބުނީ މި މެޗަކީ މި މުބާރާތުގައި ސްކޮޓްލެންޑުން ކުރިމަތިލާނެ އެންމެ އުނދަގޫ މެޗު ކަމަށާއި، އަދި މި މެޗަށް ނުކުންނައިރު ފުރަތަމަ މެޗުން ބަލިވެފައި އޮތުން އެއީ އެ ޓީމަށް އޮތް ޕްރެޝަރެއް ކަމަށެވެ. އެކަމަކު ސްކޮޓްލެންޑުގެ ސްކޮޑުގައި މި ޕްރެޝަރުގައި ކުޅެވޭނެ ކުޅުންތެރިން އެބަތިބި ކަމަށްވެސް ވަނީ ބުނެފައެވެ. އަދި ޔޫރޯގައި ސްކޮޓްލެންޑުން ކަނޑައެޅި އަމާޒަށް ވާސިލްވުމަށް މި މެޗުން ތިން ޕޮއިންޓް ހޯދަން މަޖުބޫރު ކަމަށްވެސް ޓައުންޒެންޑް ވަނީ ބުނެފައެވެ.

ޔުއެފާ ޔޫރޯގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާއި ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓެއްގެ ގޮތުގައި ބައިވެރިވާނީ ގްރޫޕް ޑީ ގެ އެނަލިސްޓް މުޙައްމަދު ޝިޔާޒް (މޯހަން) އެވެ. މީގެ އިތުރުން ޕްރީ-ޝޯގައި ޚާއްސަ މެހުމާނެއްގެ ގޮތުން އަޙްމަދު ނިމާދު (ނިމާ) ބައިވެރިވެވަޑައިގަންނަވާނެއެވެ.

އިންގްލެންޑާއި ސްކޮޓްލެންޑް ބައްދަލުކުރާ މެޗު ފަށާނީ ހުކުރު ދުވަހުގެރޭ ރާއްޖެ ގަޑިން ދަންވަރު 00:00 ގައެވެ.