ޒެމްބިއާގެ ފުރަތަމަ ރައީސް އަވަހާރަވެއްޖެ

ޒެމްބިއާގެ ފުރަތަމަ ރައީސް ކެންނެތު ޑޭވިޑް ކައުންޑާ އަވަހާރަވެއްޖެއެވެ.

ރިޕޯޓުތައް ބުނާގޮތުން އުމުރުފުޅުން 97 އަހަރުގައި އެ މަނިކުފާނު އަވަހާރަވީ ނިއުމޯނިއާ ބައްޔަށް އެ ގައުމުގެ ކެޕިޓަލް ލުސްކާގެ މިލިޓަރީ ހޮސްޕިޓަލްގައި ފަރުވާހޯދައްވަނިކޮށެވެ. އެ ބަލީގައި އެޑްމިޓުކުރީ މި ދިޔަ ހޮނިހިރު ދުވަހު ކަމަށްވެއެވެ. އެހެންނަމަވެސް ކޮވިޑް-19ށް ޕޮޒިޓިވް ނޫން ކަމަށް ރިޕޯޓުތައް ބުނެއެވެ.

ރައީސް ކެންނެތު ކައުންޑާ އަކީ އެފްރިކާގެ މިނިވަންކަން ހޯއްދެވުމުގައި ވެސް އިސް ދައުރެއް އަދާކުރެއްވި ބޭފުޅެކެވެ. އެގޮތުން މިނިވަންކަން ލިބުމަށް ފަހު ޒެމްބިއާގެ ފުރަތަމަ ރައީސްކަން 1964 ވަނަ އަހަރު ކުރެއްވީ ރައީސް ކެންނެތެވެ. ވެރިކަމުން ފައިބައިވަޑައިގެންނެވީ 1991 ވަނަ އަހަރު ބޭއްވި މަލްޓި ޕާޓީ އިންތިހާބުން ނާކާމިޔާބުވެވަޑައިގެންނެވުމުންނެވެ.

އެމަނިކުފާނު އަވަހާރަވުމާ ގުޅިގެން އެކަމުގެ ހިތާމާގައި އެ ގައުމުގައި ކުރިއަށް އޮތް ތިން ހަފްތާ ހުރިހާ އެންޓަޓެއިންމަންޓް ހަރަކާތްތައް ވަގުތީގޮތުން މެދުކަނޑާލުމަށް ވަނީ ނިންމާފައެވެ.