ހިންނަވަރު ބަނދަރުގެ މަސައްކަތް ބާރު ދުވެލީގައި ކުރިއަށް
މި މަޝްރޫއު 350 ދުވަހުގެ ތެރޭގައި ނިންމަން ޖެހޭ
ހިންނަވަރު ބަނދަރު ހެދުމުގެ މަސައްކަތުގެ ތެރެއިން
ޅ. ހިންނަވަރު ބަނދަރުގެ ތަރައްޤީކުރުމުގެ މަސައްކަތް ބާރު ދުވެލީގައި ކުރިއަށްދާކަމަށް މަސައްކަތް ހަވާލުކޮށްފައިވާ އެމްޓީސީސީއިން ބުނެފިއެވެ.
އެމްޓީސީސީއިން ވަނީ، ފާދިއްޕޮޅު ހިންނަވަރު ބަނދަރުގެ އެއްގަމު ތޮށިލުމަށް ބޭނުންވާ ކޮންކްރީޓް އެލް ބްލޮކްތައް އެރަށަށް ގެންގޮޮސްފައިވާކަން ހާމަކޮށްފައެވެ. އެމްޓީސީސީން ބުނީ އެރަށު ބަނދަރު ތަރައްގީ ކުރުމުގެ މަޝްރޫއުގެ ދަށުން، އެއްގަމުތޮށި ލުމަށް ބޭނުންވާ ކޮންކްރީޓް އެލް ބްލޮކްތައް ތިލަފުށިން ހިންނަވަރަށް ލޯޑުކޮށފައިވާ ކަމަށެވެ.
މި މަޝްރޫއުގެ ދަށުން، 3.2 ހެކްޓަރުގެ ބިން ހިއްކައި، 65،170.76 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމަށް ނިންމާފައިވާ އިރު، 421 މީޓަރުގެ ސަރަހައްދެއްގައި އެއްގަމުތޮށި ލުމަށް ހަމަޖެހިފައިވާ ކަމަށް ވެސް އެ ކުންފުނިން ބުނެ އެވެ. މީގެ އިތުރުން 123.9 މީޓަރުގެ ސަރަހައްދެއްގައި ބޭރުތޮށި ލައި، 170.55 މީޓަރުގެ ސަރަހައްދެއްގައި ރިވެޓްމެންޓް ޖެހުމަށް ވެސް މި މަޝްރޫޢުގައި ހިމެނިފައިވާ ކަަމަށް އެމްޓީސީސީން ބުނެއެވެ.
99.52 މިލިއަން ރުފިޔާގެ މި މަޝްރޫއު 350 ދުވަހުގެ ތެރޭގައި ނިންމަން ޖެހޭ އިރު، މި މަޝްރޫއު އެމްޓީސީސިއާ ހަވާލުކޮށްފައިވަނީ މި ދިޔަ އަހަރުގެ ނޮވެމްބަރު މަހުއެވެ.
