ޢަލީ ވަޙީދުގެ ޝަރީއަތް ސިއްރުކޮށްފި

ޖިންސީ ގޯނާގެ ގިނަ ދައުވާތަކެއް ދައުލަތުން އުފުލާފައިވާ ކުރީގެ ޓޫރިޒަމް މިނިސްޓަރު ޢަލީ ވަޙީދުގެ ޝަރީއަތް ސިއްރުކޮށްފިއެވެ.

ހޯމަ ދުވަހުގެ މެންދުރުފަހު 3:00އަށް މައްސަލައިގެ އަޑުއެހުމެއް އޮތީ ތާވަލުކޮށްފައެވެ. ކްރިމިނަލް ކޯޓުން ބުނީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 42 ވަނަ މާއްދާގެ (ނ)އަށް ރިއާޔަތްކޮށް މިމައްސަލައިގެ އަޑުއެހުންތައް ކުރިއަށް ގެންދަނީ އާންމުކޮށް ހުޅުވާލައިގެން ނޫން ކަމަށެވެ.

ގާނޫނު އަސާސީގެ 42ވަނަ މާއްދާގެ (ނ)ގައި ވަނީ ޝަރީއަތް ހިންގަން ޖެހެނީ އާންމުކޮށް ހުޅުވަލައިގެން ނަމަވެސް، މި މާއްދާގައި ބަޔާންކޮށްފައި ވާ ސަބަބު ތަކަށްޓަކައި ދިމިގްރާތީ އުސޫލުތަކާ ޚިލާފު ނުވާނެ ގޮތުގެ މަތިން، ޝަރީއަތެއް އެކުގައި، ނުވަތަ ޝަރީއަތަކުން ބައެއް، އާންމުކޮށް ހުޅުވައިނުލައި ކުރިއަށް ގެންދިޔުމުގެ އިޚްތިޔާރު އެ ޝަރީއަތެއް ކުރާ ފަނޑިޔާރަކަށް ލިބިގެން ވާކަމަށެވެ. އެ ސަބަބު ތަކުގެ ތެރޭގައި މީހަކު ކުރި ކުށެއްގެ ސަބަބުން އަނިޔާ ލިބިފައިވާ ފަރާތެއްގެ މަސްލަހަތު ރައްކާތެރިކުރުން ހިމެނެއެވެ.

ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާ ކުރިކަމުގެ ތުހުމަތުގައި ޢަލީ ވަޙީދުގެ މައްޗަށް އުފުލާފައިވާ ދައުވާތަކަކީ ޖިންސީ އަނިޔާކުރުމުގެ ކުށުގެ ދައުވާ އާއި، ޖިންސީ ގޯނާ ކުރުމުގެ ކުށުގެ ދައުވާ އާއި، ޖިންސީ ގޯނާކުރަން އުޅުމުގެ ކުށުގެ ދައުވާ އާއި، ރޭޕްކުރަން އުޅުމުގެ ކުށުގެ ދައުވާ އާއި، ބޭއަދަބީ ގޮތުގައި ޖިންސީ ގުނަވަން ހާމަކުރުމުގެ ކުށުގެ ދައުވާ އާއި، ހުއްދަނޫން ޖިންސީ މުއާމަލާތެއް ހިންގުމަށް އެދުމުގެ ކުށުގެ ދައުވާއެވެ.

މި ޝަރީއަތް ކެންސަލްކޮށްފައި ވާއިރު އޭނާ ވަނީ އޮންލައިންކޮށް ޝަރީއަތުގައި ބައިވެރިވުމަށް ހުށަހަޅުއްވާފައެވެ. ނަމަވެސް ޢަލީ ވަޙީދު ހުންނެވީ ރާއްޖޭގެ އިޚްތިޞާސް ނުހިނގާ ތަނެއްގައި ކަމަށްވެފައި، އޮންލައިންކޮށް އަޑުއެހުމުގައި ބައިވެރިވުމުން ބޮޑެތި ގޮންޖެހުންތަކެއް ހުންނާނެ ކަމަށް ޕްރޮސެކިއުޓާ ޖެނެރަލް ޙުސައިން ޝަމީމް ވިދާޅުވެފައިވެއެވެ. އަދި އެގޮތަށް ޝަރީއަތް ކުރުމަކީ ނިޒާމާ އެއްގޮތަށް ހިނގާނެ ކަމެއް ކަމަށް ގަބޫލު ނުކުރެއްވޭ ކަމަށް ޝަމީމް ވިދާޅުވެފައިވެއެވެ.