ރަށްތައް ބަންދުކުރުމުން ކުންފުންޏަށް އެކަމުގެ ގެއްލުން ދައްކާ - ފައުޒީ
މަސްކިރުމުގައި ދަތިތަކާއި ކުރިމަތިލާން ޖެހޭ
މަސްވެރިން ކޫއްްޑޫއަށް މަސްކިރަނީ
ކޮވިޑް-19ގެ ހާލަތު ގޯސްވެ އަތޮޅުތެރޭގެ ގިނަ ރަށްތަކެއް މޮނިޓަރިންއަށް ލުމާއެކު މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ (މިފްކޯ) އަށް ބޮޑެތި ގޮންޖެހުތަކާއި ކުރިމަތިލާން ޖެހިއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މިފްކޯގެ މެނޭޖިންގ ޑިރެކްޓަރު އިސްމާއިލް ފައުޒީ ވިދާޅުވީ ފެލިވަރުގައި ކޮވިޑް-19ގެ ހާލަތު ގޯސްވުމާއި ގުޅިގެން އޮޕްރޭޝަން ހުއްޓާލަން ޖެހުނު ކަމަށެވެ. ނަމަވެސް މިހާރު އާއްމު ހާލަތަށް އާދެވި މުއައްޒަފުންގެ ހާލު ރަނގަޅުކަން ފައުޒީ ފާހަގަކުރެއްވިއެވެ. އަދި ވިދާޅުވީ މިހާރު އޮޕްރޭޝަން ފަށައިގެން ބާރު ސްޕީޑްގައި ކުރިއަށްދާ ކަމަށެވެ.
ދެކުނުގެ އަތޮޅުތަކުގެ ރަށްތަކަށް އަލިއަޅުއްވާލައްވައި ފައުޒީ ވިދާޅުވީ މަސްވެރިކަން ފުޅާ ދާއިރާއެއްގައި ކުރަމުންއައި ރަށްތައް މިހާރު އޮތީ މޮނިޓަރިންގެ ހާލަތުގައި ކަމަށެވެ. އެހެންކަމުން އޮޕްރޭޝަން ކުރިއަށް ގެންދިއުމުގައި ބޮޑެތި ގޮންޖެހުންތަކާއި ކުރިމަތިވާ ކަމަށެވެ. އެގޮތުން މަސްކިރުމުގައި ދަތިތަކާއި ކުރިމަތިވާކަން އޭނާ ފާހަގަކުރެއްވިއެވެ. ފައުޒީ ވިދާޅުވީ ދަތިތަކާއެކު ވެސް އޮޕަރޭޝަން ކުރިއަށް ގެންދާ ކަމަށާއި، ރައްޔިތުންނަށް ދަތިނުވާނެ ގޮތަކަށް ހުރިހާ އިންތިޒާމްތައް ހަމަޖައްސަމުންދާ ކަމަށެވެ. އަދި މުވައްޒަފުން މަސައްކަތް ކުރަމުންދާ ސެންޓަރުތަކުގައި ލޮކްޑައުން ވެގެން ތިބެ ޚިދުމަތްތައް ދެމުންދާ ކަމަށް ފައުޒީ ވިދާޅުވިއެވެ.
ދެކުނުގެ މަސްވެރިކަމަށް އިޝާރާތް ކުރައްވާ ފައުޒީ ވިދާޅުވީ މީގެ ކުރިން ދެކުނުގެ މަސްވެރިކަން ވަރަށް ރަނގަޅު ކަމަށާއި، އޭރު ދުވާލަކަށް 600 ނުވަތަ 700 ޓަނުގެ މަސް ލިބޭ ކަމަށެވެ. ނަމަވެސް މިހާރު ލިބެނީ ގާތްގަނޑަކަށް 200 ޓަނު މަސް ކަމަށް އޭނާ ވިދާޅުވިއެވެ. އަދި ގިނަ ބޯޓުފަހަރުތަކަށް މަހަށް ނުކުމެވޭ ކަމަށްވާނަމަ މިއަދަދު ޑަބަލް ވެގެންދާނެ ކަމަށް ފައުޒީ ވިދާޅުވިއެވެ.
މީގެ އިތުރުން ފައުޒީ ވިދާޅުވީ މިފްކޯގެ މުވައްޒަފުން ކުރަމުންދާ މަސައްކަތްތަކަކީ ގައުމީ މަސައްކަތްތަކެއް ކަމަށެވެ. އަދި ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިންއާއެކު ދުރަށް ވިސްނާ މަސައްކަތުގެ ޕްލޭންއާއެކު ކުރިއަށްގެންދެވެނީ މުވައްޒަފުންގެ ބުރަ މަސައްކަތުން ކަމަށް ފައުޒީ ވިދާޅުވިއެވެ.
