ހުޅުމާލޭގައި އިމާރާތް ކުރާ 1000 ހައުސިންގ ޔުނިޓުގެ އަމަލީ މަސައްކަތް ފަށައިފި
15 ޖޫން 2021 | އަންގާރަ 11:28ފްލެޓް އެޅުމަށް ނިންމާފައިވަނީ ތިން ކެޓަގަރީއަކަށް ބަހާލައިގެން
ހައުސިންގ ޔުނިޓް ބިންގާ އެޅުން
ހުޅުމާލޭގައި އިމާރާތް ކުރާ 1000 ހައުސިންގ ޔުނިޓުތަކުގެ އަމަލީ މަސައްކަތް ފަށައިފިއެވެ.
މި ހައުސިންގ ޔުނިޓުތަކުގެ އަމަލީ މަސައްކަތް ފައްޓަވައިދެއްވީ ހައުސިން މިނިސްޓަރ މުޙައްމަދު އަސްލަމާއި ހައުސިން ޑިވެލޮޕްމަންޓް ކޯޕަރޭޝަން ލިމިޓެޑް (އެޗްޑީސީ)ގެ މެނޭޖިން ޑިރެކްޓަރ ސުހައިލް އަޙްމަދާއި އެޕޯލޯ ކުންފުނީގެ މެނޭޖިންގ ޑިރެކްޓަރ އަބްދުލް މުޙްސިން ޙުސައިނެވެ.
މި 1000 ފްލެޓް އެޅުމަށް ނިންމާފައިވަނީ ތިން ކެޓަގަރީއަކަށް ބަހާލައިގެންނެވެ. އެއީ ކައުންސިލް ހައުސިންގ އެފޯޑަބަލް ހައުސިންގ އަދި މިޑްރޭޖް ހައުސިންގއެވެ.
ކައުންސިލް ހައުސިންގ ގެ ދަށުން 650 އަކަފޫޓުގެ ދެ ކޮޓަރީ، 800 އަކަފޫޓުގެ 3 ކޮޓަރި އެފޯޑަބަލް ހައުސިންގ 650 އަކަފޫޓުގެ ދެ ކޮޓަރި، 900 އަކަފޫޓުގެ 3 ކޮޓަރި އަދި މިޑްރޭންޖް ހައުސިންގ 750 އަކަފޫޓުގެ 2 ކޮޓަރި، އަދި 1000 އަކަފޫޓުގެ 3 ކޮޓަރި އެޅުމަށް ވަނީ ނިންމާފައެވެ. މި ފްލެޓްތަކުގެ ކޮންސެޕްޓް ޑިޒައިންކޮށް، އިމާރާތް ކުރުމާއި ފައިނޭންސިންގ ކުރިއަށްދާނީ އެޕޯލޯ ހޯލްޑިންގ ކުންފުނީގެ ފަރާތުންނެވެ.
ހައުސިންގ ޔުނިޓުތަކުގެ މަލީ މަސައްކަތް ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑް (އެޗްޑީސީ)ގެ މެނޭޖިން ޑިރެކްޓަރ ސުހައިލް އަޙްމަދު ވިދާޅުވީ މި މަޝްރޫއުގެ ދަށުން ކައުންސިލް ހައުސިންގ ގެ 120 ޔުނިޓް، އެފޯޑަބަލް ހައުސިންގ ގެ 220 ޔުނިޓް، އަދި މިޑްރޭންޖް ހައުސިންގ ގެ 660 ޔުނިޓް އެޅުމަށް ނިންމާފައިވާ ކަމަށެވެ. ސުހައިލް ވިދާޅުވީ މި މަޝްރޫއަކީ ޖާގައިގެ ގޮތުން ތަނަވަސް މަޝްރޫއަކަށް ވެގެންދާނެ ކަމަށެވެ.
ހުޅުމާލޭގައި އިތުރަށް ކުރިއަށް ގެންދިޔުމަށް ހަމަޖެހިފައިވާ މަޝްރޫއުތަކުގެ މައުލޫމާތު ހިއްސާ ކުރައްވަމުން ސުހައިލް ވިދާޅުވީ 355 ރެސިޑެންޝަލް ޔުނިޓް ހިމެނޭ ގޮތަށް 2020 ވަނަ އަހަރު ހަތަރު ފަރާތަކާ ހަވާލު ކުރެވުނު ހައުސިންގ ޕްރޮޖެކްޓްގެ، ދެ ޕްރޮޖެކްޓުގައި ކޮންޓްރެކްޓަރާއެކު ސޮއިކުރެވިފައިވާ ކަމަށާއި، ވިލަރެސް ހައުސިންގ ޕްރޮޖެކްޓްގެ 45 އިންސައްތަ މަސައްކަތް ނިމިފައިވާ ކަމަށެވެ.
