ހަނިމާދޫ އެއާރޕޯޓް ތަރައްގީކުރަން ބިން ކަނޑައާޅާފައި އޮތީ މުސްތަގުބަލަށް ވިސްނާފައި - ފައްޔާޒު
އެމްއެންޑީއެފްގެ ނޮދަން އޭރިއާގެ މައި މަރުކަޒު ބިނާކުރުމަށް މިހާރު ކަނޑައަޅާފައިވާ ބިމުގެ ބޮޑުބައެއް ބޭނުން ކުރާނެ
ހަނިމާދޫ އިންޓަރނޭޝަނަލް އެއަރޕޯޓް ތަަރައްގީ ކުރުމުގެ ޕްލޭނެއް އެކުލަވާލައި އެކަމަށް އަންނަނީ މަސައްކަތް ކުރަމުން
ހަނިމާދޫ އެއަރޕޯޓް ތަރައްގީކުރުމަށް ޕްލޭން ކޮށްފައި އޮތީ ހުޅުލޭގައި އޮތް ވަރުގެ ރަންވޭއަކާއެކު ކަމަށް އިކޮނޮމިކް މިނިސްޓަރ ފައްޔާޒް އިސްމާއީލް ވިދާޅުވެއްޖެއެވެ.
ހަނިމާދޫގެ ބިމުން ބޮޑުބައެއް އެއަރޕޯޓް ތަރައްގީކުރުމަށާއި އިތުރު އެހެނިހެން ބޭނުންތަކަށް ބޭނުންކުރަން ނިންމާފައިވުމުން އެރަށުގެ ރައްޔިތުންގެ ހުރި ކަންބޮޑުވުންތަކާގުޅޭގޮތުން ހޯމަ ދުވަހުގެ ރޭ ނޫސްވެރިންނާ ބައްދަލު ކުރައްވައި މިނިސްޓަރު ވިދާޅުވީ، ހަނިމާދޫ އެއާޕޯޓް ތަރައްގީކުރުމަށް 853،937 އަކަފޫޓުގެ ބިމެއް ކަނޑައަޅާފައި އެވަނީ މުސްތަގުބަލުގައި އެއާޕޯޓު ބޮޑުކުރުމަށާއި، އެބިމުން ބައެއް، އެމްއެންޑީއެފްގެ ނޮދަން އޭރިއާގެ މައި މަރުކަޒު ބިނާކުރުމަށް ބޭނުންކުރުމަށާއި، އެއަރޕޯޓާއެކު ހަދާ ސިޓީ ހޮޓަލަށް ބޭނުންކުރުމަށް ކަމަށެވެ.
ފައްޔާޒް ވިދާޅުވީ، މުސްތަގުބަލުގައި ހަނިމާދޫ އެއާޕޯޓަކީ ރާއްޖޭގެ ތިން ސަރަހައްދުގައި ތަރައްޤީކުރަން ކަނޑައަޅާފައިވާ އެންމެ ބޮޑެތި ބައިނަލްއަގުވާމީ ވައިގެ ބަނދަރުތަކުގެ ތެރެއިން އެއް ބަނަދަރަށް ވެގެންދާނެ ކަމަށެވެ. މީގެ އިތުރުން އެ ބިމުގެ ގާތްގަނޑަކަށް ދެބައިކުޅައެއްބައި އެމްއެންޑީއެފްގެ ނޮދާން ކޮމާންޑް ސެންޓަރުން ބޭނުންކުރާއިރު އެތަނަކީ ވެސް އެރަަށަށް އިގްތިޞާދީ ގޮތުން ގިނަ ފައިދާތަކެއް ކުރާނެ ތަނަކަށް ވާނެކަމަށް ފައްޔާޒް ވިދާޅުވިއެވެ.
އެއާރޕޯޓްގެ ބޮޑު ޕްރޮޖެކްޓަށް މިހާރު ބިން ކަނޑަ ނާޅައިފިނަމަ އެސަރަހައްދުގައި މީހުން އާބާދުވެ ފަހުން އެބިންތަކުން މީހުން ހުސްކޮށް ތަރައްޤީގެ ޕްރޮޖެކްޓަށް ބިން ހޯދުން ދަތިކަމަކަށް ވާނެ ކަމަށްވެސް މިނިސްޓަރ ފައްޔާޒު ވިދާޅުވިއެވެ. މިހާރު އޮތް ޕްލޭނަކީ ސަރުކާރުން ހަދާފައިއޮތް ޕްލޭން ކަމަށެވެ. ކައުންސިލަށް އައި ބަދަލާއެކު އައު ކައުންސިލާ ބައްދަލުކޮށް އެވާހަކަތައް ހިއްސާކުރުމަށް އަދި ފުރުސަތު ނުލިބޭ ކަމަށެވެ. ރަށުގެ ކައުންސިލާއި ރައްޔިތުން އެއަރޕޯޓާއި ސިޓީހޮޓާ ފަދަ ތަރައްޤީގެ މަޝްރޫޢުތައް ބޭނުން ނުވާނަމަ، އެޕްރޮޖެކްޓްތައް ސަރުކާރުން ކޮންމެހެން ކުރިއަށް ގެންދަން ބޭނުން ނުވާކަމަށް ފައްޔާޒް ވިދާޅުވިއެވެ. ކައުންސިލާ މަޝްވަރާކޮށްފައި ގެންނަން ޖެހޭ ބަދަލުތައް ގެންނަވާނެ ކަމަށް ވިދާޅުވިއެވެ.
