ހަދަން ފަށާފައިވާ ގެ ނިންމާލުމަށް ގިނަވެގެން 7 ލައްކަ ރުފިޔާ ދެވޭނެ- ރައީސް
14 ޖޫން 2021 | ހޯމަ 17:15ފައިސާ ހޯދުމަށް ގިނަވެގެން 7 ލައްކަ ރުފިޔާ ކޮންމެ ފަރާތަކަށް ދޭނެ
ރައީސް އިބްރާހީމް މުޙައްމަދު ޞާލިޙް- ރައީސް ވަނީ ބޯހިޔާވަހިކަމުގެ ވައުދުތައް ފުއްދަވައިދެއްވާނެ ކަމުގެ ޔަގީންކަން ދެއްވާފައި
ސަރުކާރުން އަތޮޅުތެރެއަށް ޚާއްސަކޮށް ކުރިއަށްގެންދާ ގެދޮރުވެރިކަމުގެ މަޝްރޫއުގެ ދަށުން، ހަދަން ފަށާފައިވާ ގެ ނިންމާލުމަށް ގިނަވެގެން 7 ލައްކަ ރުފިޔާ ދެވޭނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.
"ގެދޮރުވެރިޔާ ލޯނު" މަޝްރޫއު އިފްތިތާހު ކުރުމަށް ހޯމަ ދުވަހުގެރޭ ވާރޗުއަލްކޮށް ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ޞާލިޙު ވިދާޅުވީ، މާލެއާއި ރާއްޖޭގެ އެކި ކަންކޮޅުތަކުގައި ދިރިއުޅޭ ފަރާތްތަކަށް ބޯހިޔާވަހިކަމަކީ ވަރަށް ބޮޑަށް ބޭނުންޖެހިފައިވާ ކަމެއް ކަމަށެވެ. އަދި ސަރުކާރުން އަލަށް މި ފަށާ މަޝްރޫއަކީ ރާއްޖޭގެ އެކި ކަންކޮޅުތަކުގައި ދިރިއުޅޭ ފަރާތްތަކަށް އަމާޒުކޮށްގެން ހިންގޭ ބޯހިޔާވަހިކަމުގެ މަޝްރޫއެއްކަން ފާހަގަ ކުރައްވައި ރައީސް ވިދާޅުވީ، ގެދޮރުވެރިޔާ ލޯނު ސްކީމަކީ ކުޑަ އިންޓްރެސްޓެއްގައި ދިގު މުއްދަތަކަށް ދައްކައި ޚަލާސްކުރާ ގޮތަށް ތައާރަފްކުރާ ލޯނު ސްކީމެއް ކަމަށެވެ.
ރަޢީސް ވިދާޅުވީ، މި ލޯން ސްކީމުގައި ބައިވެރިވުމަށް މޯރގޭޖެއްގެ ގޮތުގައި ހަމައެކަނި ދައްކަންޖެހޭނީ އެމީހާއަށް ލިބިފައިވާ ގޯތި ނުވަތަ އެ ގޯތީގައި ހަދަން ފަށާފައިވާ އިމާރަތް ކަމަށެވެ. އަދި ގިނަވެގެން މަހެއްގެ މައްޗަށް 5000 ރުފިޔާ އަނބުރާ ދައްކަންޖެހޭނެކަން ރައީސް ފާހަގަ ކުރެއްވިއެވެ. އަދި ހަދަން ފަށާފައިވާ ގެ ނިންމާލުމަށް ބޭނުންވާ ފައިސާ ހޯދުމަށް ގިނަވެގެން 7 ލައްކަ ރުފިޔާ ކޮންމެ ފަރާތަކަށް ފޯރުކޮށްދެވޭނެ ކަމަށާއި، މިއީ މުޅި ރާއްޖޭގެ އެކި ކަންކޮޅުތަކަށް އަމާޒުކޮށް ހިންގާ މަޝްރޫއެއް ކަމަށް ރައީސް ވިދާޅުވިއެވެ.
ރާއްޖޭގެ އެކި ކަންކޮޅުތަކަށް އަމާޒުކޮށްގެން ހިންގާ ބޯހިޔާވަހިކަމުގެ މަޝްރޫއުތަކަށް އަލިއަޅުވާލައްވައި ރައީސް އިތުރަށް ވިދާޅުވީ، މާލޭގައި ބޯހިޔާވަހިކަން ފޯރުކޮށްދިނުމަށް ފަށާފައިވާ މަޝްރޫއުވެސް ކުރިއަށްދާ ކަމަށެވެ.
އަދި މިހާރު ސޮއި ކުރެވި މަސައްކަތް ފެށުމަށް 7000 ފްލެޓެއްގެ މަސައްކަތް ތައްޔާރުވެފައިވާ ކަމަށާއި، އިތުރު 4000 ހައުުސިންގ ޔުނިޓެއް އެޅުމަށް ބޭނުންވާ ފައިސާ ހަމަޖެހި، އެކަމަށް ކޮންޓްރެކްޓަރުން ހޯދުމުގެ މަސައްކަތް ކުރިއަށްދާ ކަމަށެވެ.
މި ލޯނު ސްކީމުގެ ދަށުން ދޫކުރާ ލޯނުގެ އިންޓްރެސްޓް ރެޓަކީ 6 އިންސައްތައެވެ. އަދި ގްރޭސް ޕީރިއަޑްގައި އިންޓްރަސްޓެއް ނުނަގާނެ ކަމަށާއި، އެކި މުއްދަތުތަކަށް ބަހާލައިގެން ލޯނު ދެއްކޭނެކަން މި ރަސްމިއްޔާތުގައި ވަނީ އިއުލާނުކުރައްވާފައެވެ.
