އިދާރީ ގޮތުން ކަމެއް ގޯސްކޮށް ހިނގާފައި އޮތުމަކީ ކޮރަޕްޝަން އޮތް ކަމަށް ބެލެވޭނެ ކަމެން ނޫން، ފްލެޓު ދޫކުރުން ނުހުއްޓުވޭނެ: އަލީ ހުސެއިން
30 މެއި 2025 | ހުކުރު 10:36އޭސީސީން މަސައްކަތް ކުރިއަށް ގެންދާ ގޮތުން އެ ކޮމިޝަންގެ މަސައްކަތްތަކާ މެދު ވަނީ ސުވާލު އުފެދިފައި
ޤާނޫނީ ވަކީލް އަލީ ހުސެއިން ޖޭއެސްސީ ބޭރުގައި ހުންނަވާ ރާއްޖެއެމްވީ އަށް ދެއްވި ބަސްތީގަތުމުގެ ތެރެއިން - 27 ފެބްރުއަރީ 2025
އިދާރީ ގޮތުން ކަމެއް ގޯސްކޮށް ހިނގާފައި އޮތުމަކީ ކޮރަޕްޝަން އޮތް ކަމަށް ބެލެވޭނެ ކަމެއް ނޫން ކަމަށާއި، ގެދޮރުވެރިޔާ ސްކީމްގެ ފްލެޓުތައް ދޫކުރުން އެންޓި ކޮރަޕްޝަން ކޮމިޝަން (އޭސީސީ)އަށް ނުހުއްޓުވޭނެ ކަމަށް މަޝްހޫރު ގާނޫނީ ވަކީލް އަލީ ހުސެއިން ވިދާޅުވެއްޖެ އެވެ.
ބުރާސްފަތި ދުވަހު ފަހި ޔޫނިއަންގެ ފަރާތުން ބޭއްވި ނޫސްވެރިންގެ ބައްދަލުވުމުގައި އަލީ ހުސެއިން ވިދާޅުވީ އޭސީސީން މަސައްކަތް ކުރިއަށް ގެންދާ ގޮތުން އެ ކޮމިޝަންގެ މަސައްކަތްތަކާ މެދު ސުވާލު އުފެދިފައިވާ ކަމަށެވެ. އަދި އޭސީސީއަކީ ދިވެހިރާއްޖޭގައި ކޮރަޕްޝަން ހުއްޓުވުމަށްޓަކައި ކޮރަޕްޝަންއާ ގުޅޭ މައްސަލަތައް ތަހުގީގުކޮށް ފިޔަވަޅުއަޅައި ދައުވާ ކުރުމުގެ ބާރު ލިބިފައިވާ ތަނެއް ކަމަށް އޭނާ ވިދާޅުވިއެވެ.
ގެދޮރުވެރިޔާ ސްކީމްގެ ދަށުން ދޫކުރާ ފްލެޓުގެ މައްސަލައަށް އޭސީސީން ވަދެފައިވާކަން ފާހަގަކުރައްވައި އަލީ ހުސެއިން ވިދާޅުވީ މި މައްސަލައަށް އޭސީސީން ވަދެ، މިހާތަނަށް ކިތައް މީހުންގެ މައްސަލަ ބަލައި، ދައުވާ ކުރަން ފޮނުވާފައިވޭތޯ ސުވާލު އުފެއްދެވިއެވެ.
އަލީ ހުސެއިން ވިދާޅުވީ އިދާރީ ގޮތުން ކަމެއް ދިމާވުމަކީ ނުވަތަ މައްސަލަތަކެއް ފެންމަތިވުމަކީ ކޮރަޕްޝަން އޭގައި ހިނގާފައި އޮތް ކަމަށް ބަލައިގެން ނުުވާނެ ކަމަށެވެ. މިފަދަ އެއްގޮތް މައްސަލަތަކުގައި ދައުލަތުގެ ބަންޑާރަނައިބު ވެސް ނުވަތަ ދައުލަތުގެ ފަރާތުން ވަކާލާތު ކުރަމުންދަނީ ދެގޮތަށް ކަމަށާއި، އެއީ ބަލައިގަނެވޭނެ ކަމެއް ނޫން ކަމަށް އޭނާ ވިދާޅުވިއެވެ.
އަލީ ހުސެއިން ވިދާޅުވީ ފުލުހުންނަށް ޕްރޮމޯޝަން ދިން މައްސަލަ އޭސީސީއަށް ނުހުއްޓުވޭނެ ކަމަށް ބަންޑާރަނައިބު ވިދާޅުވެފައިވާއިރު، ގެދޮރުވެރިޔާ ފްލެޓު ދޫކުރުން ހުއްޓުވޭނެ ކަމަށް ވިދާޅުވާ ވާހަކަ ހަމަނުޖެހޭ ކަމަށެވެ.
އަޅުގަނޑުމެން ފާހަގަކުރަންޖެހޭ ކަމަކީ އިދާރީ ގޮތުން ކަމެއް އަދި ޕްރޮސީޖަރއާ ހަމައަށް ހިންގާފައި އޮތުމަކީ ހިނގާ ކޮންމެ ފަހަރަކީ އެއީ ކޮރަޕްޝަން އޭގައި ހިނގާފައި އޮތް ކަމަކަށް ބަލައިގެން ނުވާނެ އިނގޭތޯ. ތަކުރާރުކޮށް ދަންނަވާނަން. އިދާރީ ގޮތުން ކަމެއް ގޯސްކޮށް އަދި އިޖުރާއަތްތަކާ ހިލާފަށް ހިނގާފައި އޮތުމަކީ އޭގައި ކޮންމެހެން ކޮރަޕްޝަން އޮތް ކަމަށް ބެލެވޭނެ އެއްވެސް ޖާގައެއް އޮތް ކަމެއް ނޫން. އެހެންވީމަ އިދާރީ ގޮތުން ހިންގާ ކަންކަން އިޖުރާއަތް ގޮތުން ކަމެއް ކުރާއިރުގައި އިދާރީ ގޮތުން ވަރަށް ގިނަ މައްސަލަތަކެއް ހުރެދާނެ. ނަމަވެސް އެއީ އޭސީސީން ވަދެ ބަލަންޖެހޭ މައްސަލަތަކެއް ނޫން. އަދި އޭސީސީން ވަދެ ހުއްޓުވަންޖެހޭ މައްސަލައެއް ވެސް ނޫން. އަޅުގަނޑުމެން މިދައްކާ ވާހަކައަށް ބާރުދެނީ ހަގީގަތުގައި ބާރުދެނީ ތާއީދު ކުރަނީ ވެސް މިހާރުގެ އެޓާނީ ޖެނަރަލް. ބަންޑާރަ ނައިބު އެބައޮތް ވިދާޅުވެފައި އެވާހަކަ ވިދާޅުވެފައި އެބައޮތް ފުލުހުން ތެދެއްތޯ. ފުލުހުންނަށް ޕްރޮމޯޝަން ދީގެން އެ ޕްރޮމޯޝަން ދިނީ ގޯސްކޮށް ކަމަށް ބެލިގެން އޭސީސީން އެކަން ހުއްޓުވުމުގެ މައްސަލާގައި ބަންޑާރަނައިބު އެބައޮތް ވިދާޅުވެފައި އޭސީސީއަށް ނުހުއްޓުވޭނެ ކަމަށް އެނގޭތޯ. އެއީ މަދަނީ މުއާމަލާތެއް. އޭގައި ސީދާ ކޮރަޕްޝަންގެ މުއާމަލާތެއް އެކަނި ކަމަށް. ނުވަތަ ދައުލަތުން ހިންގާ މުއާމަލާތްތަކުގެ ތެރެއިން އޭސީސީއަށް ވަދެ އެކަންކަން ނުހުއްޓުވޭނެ ކަމަށް.މަޝްހޫރު ގާނޫނީ ވަކީލް އަލީ ހުސެއިން
އަލީ ހުސެއިން ވިދާޅުވީ ގެދޮރިވެރިޔާ ސްކީމުން ކޮރަޕްޝަން ހިންގާފައިވާ ކަމަށް ކޮމިޝަނުން ބުނާ ކަމަށްވާނަމަ، ކޮރަޕްޝަންގެ އަމަލު ހިންގީ ކާކު ކަމާއި، އޭގެ ނާޖާއިޒް ފައިދާ ލިބުނީ ކާކަށްތޯ ބުނެދޭން ޖެހޭ ކަމަށެވެ. އަދި 4000 މީހުންނަށް ފްލެޓުތައް ދޫކޮށްފައިވާއިރު، އިޖުރާތް ގޮތުން މައްސަލައެއް ހުއްޓޭ ކިޔާފައި ފްލެޓުތައް ދިނުން ހުއްޓުވުމުގެ އެއްވެސް ޖާގައެއް ކޮމިޝަނަށް ނޯންނާނެ ކަމަށް އަލީ ހުސެއިން ވިދާޅުވިއެވެ.
