ސިއްރުކޮށްގެން ކުރިޔަށްގެންދިޔަ އިމްތިޔާޒު ކޮމިޓީގެ ބައްދަލުވުން ލީކުވި މައްސަލަ ބަލާ ސަބްކޮމިޓީގެ ބައްދަލުވުންތައް ސިއްރު

ޑިފެންސް މިނިސްޓްރީގެ ޑެޕިއުޓީ މިނިސްޓަރު ޙަސަން ޒަމީލް، ރައްޔިތުންގެ މަޖިލީހުގެ އިމްތިޔާޒަށް އަރައިގަތް ކަމަށް ވިދާޅުވެ އެ މައްސަލަ ބަލައިދިނުމަށް އެދިވަޑައިގެން ރައްޔިތުންގެ މަޖިލީހުގެ ރައީސް މުޙައްމަދު ނަޝީދު އިމްތިޔާޒު ކޮމިޓީއަށް ފޮނުއްވި މައްސަލަ ބެލި، އިމްތިޔާޒު ކޮމިޓީގެ ބައްދަލުވުން ސިއްރުކޮށްފައިވަނިކޮށް އެބައްދަލުވުމުގެ މައުލޫމާތުތައް ލީކުކޮށްލާފައިވާތީ އެކަން ބެލުމަށް އެކުލަވާލި ސަބްކޮމިޓީގެ ބައްދަލުވުންތައް ސިއްރުން ބޭއްވުމަށް އެކޮމިޓީން ނިންމައިފިއެވެ.

މިދިޔަ ހަފްތާގެ ބުދަ ދުވަހު ބޭއްވި އިމްތިޔާޒު ކޮމިޓީގެ ބައްދަލުވުމުގައި ތިނަދޫ ދެކުނު ދާއިރާގެ މެމްބަރ ޢަބްދުﷲ ސަނީފް ވަނީ ކޮމިޓީގެ ސިއްރުތައް ލީކުވި މައްސަލަ ބެލުމަށް ހުށަހަޅާފައެވެ. ސަނީފް ވިދާޅުވީ ސިއްރުކޮށްގެން ކުރިޔަށް ގެންދިޔަ ބައްދަލުވުމެއްގެ ޗެޓް ލޮގް ސޯޝަލް މީޑިޔާއަށް ލީކުކޮށްލުމުގެ ސަބަބުން ބައެއް މެމްބަރުންގެ ފުރާނައަށް ނުރައްކާވާ ހިސާބުގައި ކަންތައްތައް ހުރިކަމަށެވެ. އެފަދަ އިންޒާރުގެ މެސެޖްތައް މެމްބަރުންނަށް ލިބިވަޑައިގަންނަވާފައިވާ ކަމަށް ސަނީފް ވިދާޅުވިއެވެ. އެދުވަހުގެ ބައްދަލުވުމުގައި ވަނީ މިމައްސަލަ ދިރާސާކުރުމަށް ސަބްކޮމިޓީއެއް ނަގައިގެން ކުރިޔަށް ގެންދިޔުމަށެވެ.

އެދުވަހުގެ ކޮމިޓީ ބައްދަލުވުމުގައި ސަބް ކޮމިޓީގެ ގޮތުގައި ފާސްވެފައިވަނީ މަކުނުދޫ ދާއިރާގެ މެމްބަރ މުހައްމަދު ރާއީ، ކުޅުދުއްފުށީ އުތުރު ދާއިރާގެ މެމްބަރ ޔާސިރު ޢަބްދުލްލަޠީފް، ނޮޅިވަރަމް ދާއިރާގެ މެމްބަރ މުޙައްމަދު ނަޝީދު ޢަބްދުﷲ، މަނަދޫ ދާއިރާގެ މެމްބަރ އަޙުމަދު ހާރޫން، އަދި ދަނގެތި ދާއިރާގެ މެމްބަރ މުޙައްމަދު ނާޒިމްއެވެ.

ސަބް ކޮމިޓީގެ ބައްދަލުވުން ހޯމަ ދުވަހު ބާއްވާފައިވާއިރު، އެކޮމިޓީގެ މުގައްރިރުކަމަށް ކަނޑައަޅާފައިވަނީ މަކުނުދޫ ދާއިރާގެ މެމްބަރ މުޙައްމަދު ރާއީއެވެ. ނައިބު މުގައްރިރުކަމަށް ކަނޑައަޅާފައިވަނީ މަނަދޫ ދާއިރާގެ މެމްބަރ އަޙުމަދު ހާރޫންއެވެ.

ސަބް ކޮމިޓީގެ މުގައްރިރާއި ނައިބު މުގައްރިރު ކަނޑައެޅުމަށްފަހު ދެން ކޮމިޓީގައި ވާހަކަދެކެވުނީ މިމައްސަލަ ކުރިޔަށް ގެންދާނެ ގޮތަކާއި ގުޅޭގޮތުންނެވެ. އެގޮތުން ހުޅުވާލެވުނު ފުރުސަތުގައި ވާހަކަދައްކަވަމުން މަނަދޫ ދާއިރާގެ މެމްބަރ ވިދާޅުވީ މިކަމަކީ ތުހުމަތުގެ މައްޗަށް ބިނާކޮށް މެމްބަރެއްގެ ނަން ބޭނުންކޮށްގެން ކުރިޔަށް ގެންދެވޭނެ މައްސަލައަކަށްވާތީ އެބައްދަލުވުންތައް އާންމުކޮށް ހުޅުވާނުލައި ކުރިޔަށް ގެންދަން ހުށަހަޅުއްވާކަމަށެވެ.

ހާރޫންގެ ހުށަހެޅުމަށް ތާއީދުކުރައްވަމުން ކުޅުދުއްފުށީ އުތުރު ދާއިރާގެ މެމްބަރ ޔާސިރު ވިދާޅުވީ ހާރޫންގެ ހުށަހެޅުއްވުމަށް ތާއީދުކުރައްވާކަމަށެވެ. އެއީ ހީއެއްގެ މައްޗަށް ބިނާކޮށް މެމްބަރެއްގެ ނުވަތަ މެމްބަރުންތަކެއްގެ ނަންތައް ބޭނުންކުރަންޖެހޭއިރު އެބައްދަލުވުންތައް އާންމުކޮށްގެން ކުރިޔަށް ގެންދިޔުން އެއީ ރަނގަޅު ގޮތެއް ނޫންކަމަށްވާތީ ކަމަށެވެ.

މިހުށަހެޅުން ފާސްވެފައިވަނީ ސަބް ކޮމިޓީގައި ބައިވެރިވެވަޑައިގެންނެވި މެމްބަރުންގެ އަޣްލަބިއްޔަތުންނެވެ.

ޒަމީލް، މަޖިލީހުގެ އިމްތިޔާޒަށް އަރައިގަތް ކަމަށް މަޖިލީހުގެ ރައީސް މުޙައްމަދު ނަޝީދު ނިންމެވީ، އެ މަނިކުފާނު އަވަހާރަކޮށްލަން ބަޔަކު ދިން ޓެރަރިސްޓު ހަމަލައާ ގުޅިގެން މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އިން ކުރިއަށް ގެންދާ އިންކުއަރީއަށް ވަކިވަކި ސިފައިން ހާޒިރު ނުކުރެވޭނެ ކަމަށް އަންގައި، ޑިފެންސް މިނިސްޓްރީގެ ފަރާތުން ޒަމީލް ސޮއިކުރައްވައި ސިޓީއެއް ފޮނުއްވުމާ ގުޅިގެންނެވެ.

ރައީސް ނަޝީދު އިމްތިޔާޒު ކޮމިޓީއަށް މައްސަލަ ފޮނުއްވުމާ ގުޅިގެން ކޮމިޓީގެ ބައްދަލުވުމެއް މިދިޔަ ހަފްތާގެ އާދިއްތަ ދުވަހުގެ ރޭ 9:30 ގައި ބޭއްވުމަށް ތާވަލްކުރިއެވެ. އޮންލައިންކޮށް ކުރިޔަށް ގެންދިޔަ ކޮމިޓީ ބައްދަލުވުން ކުރިޔަށްގެންދިޔައީ ސިއްރުކޮށްގެންނެވެ.

މިބައްދަލުވުމުގައި މި މައްސަލަ ކޮމިޓީން ބަލާނެ ތަނެއްނެތް ކަމަށް ހުށަހެޅުއްވީ ކުރީގެ ޑިފެންސް މިނިސްޓަރުކަން ވެސް ކުރެއްވި ދަނގެތި ދާއިރާގެ ޖުމްހޫރީ ޕާޓީގެ މެމްބަރ މުޙައްމަދު ނާޒިމެވެ. ނާޒިމްގެ މި ހުށަހެޅުއްވުން ފާސްވެފައިވަނީ އެމްޑީޕީގެ މެމްބަރުންގެ ވޯޓާ ވެސް އެކުއެވެ. މި މައްސަލަ ކޮމިޓީން ބޭރުކޮށްލުމަށް ވޯޓު ދެއްވާފައިވާ އެމްޑީޕީގެ މެމްބަރުންނަކީ ގަމު ދާއިރާގެ އެމްޑީޕީ މެމްބަރ މުޙައްމަދު ވިސާމް، ކޮމަންޑޫ ދާއިރާގެ އެމްޑީޕީ މެމްބަރ ޙުސައިން ވަޙީދު، ތިނަދޫ ދެކުނު ދާއިރާގެ އެމްޑީޕީ މެމްބަރ ޢަބްދުﷲ ސަނީފް، މިލަންދޫ ދާއިރާގެ އެމްޑީޕީ މެމްބަރ ޢަލީ ރިޒާއެވެ.

ރައީސް ނަޝީދު ހުށަހެޅުއްވި މައްސަލަ ބޭރުކޮށްލުމަށް މިމެމްބަރުން ވޯޓު ދެއްވިކަން ސޯޝަލް މީޑިޔާއަށް ލީކުވުމާއި ގުޅިގެން އެމްޑީޕީގެ އެތެރޭގައި ވަރަށް ބޮޑަށް މައްސަލަ ހޫނުވެ މިމެމްބަރުންނަށް އަމާޒުކޮށް ބަހުގެ ހަމަލާތައް އަމާޒުވެގެންދިޔަ ތަން ފެނިގެންދިޔައެވެ.