މަސްތުގެ ހާލުގައި ތިބިކަމަށް ތުހުމަތުކުރެވޭ 15 މީހަކު މިސްކިތުން ހައްޔަރުކޮށްފިއެވެ.
އެކަމާ ގުޅިގެން ފުލުހުން ބުނީ މަސްތުވާތަކެތި ބޭނުންކުރުމުގެ ރިކޯޑް އޮންނަ، ކުށުގެ ވެށީގައި އުޅޭ މީހުންގެ ތެރެއިން، ބޭނުމެއްނެތި މިސްކިތްތަކަށް ވަދެ، އަދި މަސްތުވެގެން ތިބިކަމަށް ތުހުމަތުކުރެވޭ 15 މީހަކު ފުލުހުންގެ ބެލުމުގެ ދަށަށް އާދިއްތަ ދުވަހުގެ ރޭ ގެނެސްފައިވާކަމަށެވެ.
މިމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 7 މީހަކު ރިމާންޑް ސެންޓަރުގައި 15 ދުވަހަށް ބަންދުކުރުމަށް ކޯޓުން އަމުރުކޮށްފައިވާކަމަށާއި، އަދި 8 މީހަކު ކަސްޓޯޑިއަލް ޖަލެއްގައި 3 ދުވަހުގެ މުއްދަތަށް ބަންދުކުރުމަށް ކޯޓަށް އަމުރުކޮށްފައިވާ ކަމަށް ފުލުހުން ބުނެއެވެ. މިމައްސަލަ ފުލުހުން ގެންދަނީ އިތުރަށް ތަހުގީގުކުރަމުންނެވެ.
ކޮވިޑް-19އާ ގުޅިގެން މާލެ ސަރަހައްދުގައި މިސްކިތްތައް ބަންދުކުރަން ނިންމުމަށްފަހު 37 މިސްކިތެއްގައި ނަމާދު ކުރެވޭނެ އިންތިޒާމު އިސްލާމިކް މިނިސްޓްރީން ހަމަޖައްސާފައިވާއިރު، މަސްތުވާތަކެތި ބޭނުންކުރާ މީހުންގެ ހާއްޔަކަށް މިސްކިތްތައް ހަދާ ކަމުގެ ޝަކުވާ މިފަހަކުން ވަނީ އިންތިހާއަށް ބޮޑުވެފައެވެ.
އެގޮތުން އާންމު މީހަކު ހޮނިހިރު ދުވަހު ކޮށްފައިވާ ފޭސްބުކް ޕޯސްޓެއްގައި ބުނެފައިވަނީ ފަތިސް ނަމާދުގެ ވަގުތުގައި ދެމީހަކު މިސްކިތް ތެރޭގައި ނިދާފައިވާ ކަމަށެވެ. އަދި އެ ދެމީހުންނަށް ގޮސް ގޮވުމުން ނިކުންނަމުން ޚަތިމު ހާވާލުމަށްފަހު "ޕެކެޓެއް" ނަގައިގެން ދިޔަ ކަމަށެވެ. އަދި ފުލުހުން އައިސް ބަލާ ފާސްކުރަމުންދާތީ "ސާމާނު" ކޮޅު ޚަތިމުގެ ތެރެއަށްލައި، ފޮރުވާ ކަަމަށް ވެސް އެމީހާ ބުންޏެވެ.
މިކަންތައްތަކުގެ ހިތްހަމަނުޖެހުން ބޮޑުވެފައިވާއިރު ފުލުހުން ބުނީ މިސްކިތްތަކުގައި މަސްތުވާތަކެތި ބޭނުން ކުރުމާއި، ނިދުމާއި، އެއްޗެހި ދޮވެ، އަދި މިނޫނަސް މިސްކިތްތައް ބޭނުން ކުރުން އެކަށީގެންނުވާ އެހެނިހެން ބޭނުންތަކަށް މިސްކިތްތައް ބޭނުންކުރާ ކަމުގެ ޝަކުވާ ފުލުހުންނަށް ތަކުރާރުކޮށް ލިބެމުންދާ ކަމަށެވެ.
އެގޮތުން ފުލުހުން ކޮންމެ ރެއަކު މިސްކިތްތައް ބަލައި، އެގޮތަށް އަމަލުކުރާ މީހުން ފޮނުވާލުމުގެ އިތުރުން، ފުލުހުންގެ ބެލުމުގެ ދަށަށް ގެނެވޭ ހާލަތްތަކުގައި ފުލުހުންގެ ބެލުމުގެ ދަށަށް ގެނެސް މައްސަލަ ތަހުގީގު ކުރަމުން ގެންދާ ކަމަށެވެ. މީގެ އިތުރުން މިކަންކަމުގެ މައުލޫމާތު ކަމާ ގުޅުންހުރި އެހެނިހެން އިދާރާތަކާއެކު ހިއްސާކޮށް، ހައްލެއް ހޯދުމަށް އެޅެން ހުރި ފިޔަވަޅުތައް ވެސް އަޅަމުން ގެންދާ ކަމަށް ފުލުހުން ކުރިން ބުނެފައިވެއެވެ.
