ލޯކަލް ގަވަރމަންޓް އޮތޯރިޓީ (އެލްޖީއޭ) ގެ ބޯޑުގެ ސިޓީ ކައުންސިލްތަކުގެ ގޮނޑިއަށް ވެރިކަން ކުރާ އެމްޑީޕީއަށް ނިސްބަތްވާ ފުވައްމުލައް ސިޓީގެ މޭޔަރު އިސްމާއިލް ރަފީގް (އިއްސެ) ހޮވިއްޖެއެވެ.

އެލްޖީއޭ ބޯޑުގެ ގޮނޑި އިއްސެ ކާމިޔާބު ކުރައްވާފައި ވަނީ އެ ގޮނޑިއަށް އިދިކޮޅު ޕީޕީއެމުން ކުރިމަތިލެއްވި މާލެ ސިޓީގެ މޭޔަރު ޑރ. މުޙައްމަދު މުއިއްޒުއާ ވާދަކުރައްވައިގެންނެވެ. އިއްސެ އިންތިޚާބުވީ ސިޓީ ކައުންސިލް މެމްބަރުންގެ 24 ވޯޓް ހޯއްދަވައިގެންނެވެ. އިއްސެއާ ވާދަ ކުރެއްވި މުއިއްޒަށް ލިބިވަޑައިގަތީ 21 ވޯޓެވެ.

ފުވައްމުލަކު ވޯޓު ފޮށިން އިއްސެއަށް ފަސް ވޯޓު ލިބުނުއިރު މުއިއްޒު އަށް ލިބިވަޑައިގެންނެވީ އެންމެ ވޯޓެކެވެ. މިފޮށިން އެއް ވޯޓް ބާތިލްވެފައިވެއެވެ. ކުޅުދުއްފުށީގައި ބެހެއްޓި ފޮށީގެ ހުރިހާ ވޯޓެއް ލިބިވަޑައިގެންނެވީ ފުވައްމުލަކު މޭޔަރަށެވެ.

މާލެއާއި އައްޑޫ ވޯޓު ފޮށީގެ އަޣުލަބިއްޔަތު ލިބިވަޑައިގެންނެވީ މުއިއްޒުއަށެވެ. އެގޮތުން މާލޭ ވޯޓުފޮށިން މުއިއްޒު އަށް 13 ވޯޓު ލިބިވަޑައިގެންއިރު އިއްސެއަށް ލިބުނީ ހަ ވޯޓެވެ. އައްޑޫ ސިޓީ ވޯޓުފޮށިން މުއިއްޒުއަށް ހަތް ވޯޓު ލިބިވަޑައިގެންނެވިއިރު އިއްސެއަށް ލިބިވަޑައިގެންނެވީ ހަ ވޯޓެވެ.

އައްޑޫ ސިޓީ ވޯޓު ފޮށިން މުއިއްޒު ކުރި ހޯއްދެވިއިރު އެ ކައުންސިލަކީ އެމްޑީޕީގެ މެޖޯރިޓީ އޮންނަ ކައުންސިލެކެވެ. އެގޮތުން ކައުންސިލްގައި އެމްޑީޕީގެ 7 މެމްބަރުން ތިބެއެވެ. އިދިކޮޅު ޕީޕީއެމްގެ ތިބެނީ 3 މެމްބަރުންނެވެ. އަދި އަމިއްލަ 3 މެމްބަރުން ތިބެއެވެ.

އެލްޖީއޭ ބޯޑުގެ އަތޮޅު ކައުންސިލްތަކުގެ ތެރެއިން ކުރިމަތިލެއްވީ ކ. އަތޮޅު ކައުންސިލްގެ ރައީސް މުޙައްމަދު ނިމާލާއި، ނ. އަތޮޅު ކައުންސިލްގެ ރައީސް މުޙައްމަދު ބަޝީރެވެ. އެކަމަކު ބަޝީރު ފޯމު ހުށަހެޅުއްވީ ސުންގަޑި ހަމަވި ފަހުން ކަމަށް ވާތީ އެ ގޮނޑިއަށް އިންތިޚާބަކާއި ނުލައި ނިމާލް ވަނީ ހޮވިފައެވެ.